Monday, August 17, 2015
ME
From :
..- ကျော်ကြီး(MDY)
ဒီဆောင်းပါးခေါင်းစဉ်လေးက ကွယ်လွန်သွားပြီဖြစ်တဲ့ ဆရာလူထုစိန်ဝင်းရဲ့
မရေးဖြစ်ခဲ့တဲ့ဆောင်းပါးလေးပါ။ ဆရာမကွယ်လွန်ခင်အချိန်တုန်းက
မိတ်ဆွေဖြစ်တဲ့ ဆရာကြီးဦးဝင်းတင်ကို “ကိုဝင်းတင်ရေ … မော်စီတုန်း
ပြောသလိုပဲ (Bombard the Headquarters) NLD ဌာနချုပ် ဗုံးခွင်း မှ
ဖြစ်တော့မယ် ထင်တယ်၊ ကျွန်တော်တော့ ဆောင်းပါး ရေးတော့မယ်ဗျာ၊ ဒီတိုင်းဆို NLD မြေလျှိုးလိမ့်မဗျို့၊ မိုးပျံလမ်း မမြင်တော့ဘူး”ဆိုပြီးပြောတော့
ဦးဝင်းတင်က ခဏနေပါအုံး စောင့်ကြည့်ပါအုံးဗျာလို့တားခဲ့ရာက
မရေးဖြစ်ခဲ့တဲ့ဆောင်းပါးလေးဖြစ်ပါတယ်။ ဒီအကြောင်းကို ဦးဝင်းတင်ရဲ့
''ကိုစိန်ဝင်း မရေးဖြစ်တဲ့ ဆောင်းပါး'' ထဲမှာဖတ်ရလို့သိရှိရပါတယ်။
ယနေ့အချိန်မှာ NLD ပါတီမှာ ဂိုဏ်းဂဏတွေ ကွဲနေမှု အချင်းချင်း ကတ္တီပါ
လက်သီးပုန်းတွေ “ကစ်” နေပြီး ဗဟိုအလုပ်မှုဆောင်တွေရဲ့ အောက်ခြေကို
ထည့်မတွက် ထင်ရာစိုင်းလုပ်နေတဲ့အချိန်မှာ ဆရာလူထုစိန်ဝင်းကို
ပြေးသတိရမိပါတယ်။ ဆရာသာရှိရင် ဘယ်လိုများပြောမလဲ ဘယ်လိုများ
ဝေဖန်သုံးသပ်မလဲဆိုတာ နားထောင်ချင်နေမိတယ်။ တိုင်းပြည်နဲ့
ပြည်သူမျက်နှာကလွဲလို့ ဘယ်သူ့မျက်နှာမှမထောက်ခဲ့ပဲ
ရဲရဲဝံ့ဝံ့ဝေဖန်ပြောဆိုရဲတဲ့သူဟာ ဒီနေ့တိုင်းပြည်မှာ
လက်ချိုးရေလို့ရတဲ့အနေအထားမှာ ဆရာလူထုစိန်ဝင်း၊ ဆရာကြီး ဦးဝင်းတင်လို ဆရာသမားများကို တမ်းတမိတာအမှန်ပါပဲ။
ယနေ့ NLD ပါတီရဲ့ ထိပ်ပိုင်းခေါင်းဆောင်များရဲ့လုပ်ဆောင်မှုတွေဟာ
အောက်ခြေပါတီဝင်များနဲ့ လူထုတွေရဲ့ သဘောဆန္ဒကို မျက်ကွယ်ပြုပြီး
ဒီမိုကရေစီနည်းမကျ အာဏာရှင်ဆန်ဆန် လုပ်ဆောင်နေကြတာ တွေ့ရပါတယ်။
အနီးစပ်ဆုံးကိစ္စတစ်ခုဖြစ်တဲ့ လာမယ့် ၂၀၁၅ ရွေးကောက်ပွဲအတွက်
လွတ်တော်ကိုယ်စားလှယ်လောင်း ရွေးချယ်မှုကိုကြည့်တာနဲ့ NLD
ပါတီခေါင်းဆောင်ပိုင်းတွေရဲ့ လုပ်ဆောင်မှုအမှားများ
ကိုထင်ရှားစွာတွေ့မြင်ရမှာပါ။ ကိုယ်စားလှယ်လောင်းရွေးချယ်မှုမှာ
အောက်ခြေပါတီဝင်တွေထောက်ခံတဲ့ ၊ ပြည်သူအများစုကြိုက်တဲ့
ပုဂ္ဂိုလ်များမပါဝင်ပဲ မိမိတို့နဲ့ နီးစပ်ရာ ပနာသင့်ရာတွေကိုပဲ
အာဏာရှင်ဆန်စွာရွေးချယ်ခဲ့တဲ့အတွက် ပါတီအတွင်း လူထုအတွင်း
ဝေဖန်သံတွေဆူညံသွားခဲ့ပါတယ်။
ပခုက္ကူမြို့ နဲ့ ရန်ကုန်လှည်းကူးမှာဆိုရင် ဗဟိုကရွေးချယ်ပေးတဲ့
ကိုယ်စာလှယ်လောင်းတွေကို ကျေနပ်မှုမရှိတဲ့အတွက် ပါတီဝင်တွေဟာ
ဆန္ဒပြတဲ့အထိဖြစ်ပွားခဲ့ပါတယ်။ အခြားမြို့နယ်အများစုမှာလဲ
ကျေနပ်မှုမရှိတဲ့အသံတွေ ပါတီဝင်တွေနှုတ်ထွက်ကြတဲ့အသံတွေကို
ဆူညံစွာကြားနေရပါတယ်။ ဒီလိုပြည်သူတွေက ဒီမိုကရေစီနည်းကျစွာ တောင်းဆိုမှုဝေဖန်မှု ပြုကြပေမယ့်လည်း ပြန်လည်ပြင်ဆင်မှုမလုပ်နိုင်ဘူးလို့
အာဏာရှင်ဆန်စွာဆုံးဖြတ်ခဲ့တာကိုလည်း အံ့အားသင့်စွာကြားသိရပါတယ်။
ဒီနေရာမှာကိုယ်စားလှယ်များကို ရွေးချယ်ခဲ့တဲ့ ပါတီခေါင်းဆောင်များကို
ပါတီဝင်တွေကိုယ်စား ပြည်သူတွေကိုယ်စား မေးခွန်းထုတ်စရာတွေ ပေါ်လာမိပါတယ်။ NLD ပါတီ စီအီးစီတွေအနေနဲ့ လွတ်တော်ကိုယ်စားလှယ်ရွေးချယ်မှုနဲ့ပတ်သတ်ပြီး
ပါတီဝင်များနဲ့ ပြည်သူများရဲ့ ဆန္ဒကို ဘာကြောင့် မျက်ကွယ်ပြုခဲ့ရပါသလဲ။
ကျွန်တော်ဟာ NLD ကိုထောက်ခံတဲ့ သာမာန်ပြည်သူတယောက်ပါ။ နိုင်ငံရေးသုတေသနပညာရှင်မဟုတ်တဲ့အတွက် ပြည်သူတယောက်အမြင်နဲ့ပြောဆိုတယ်ဆိုတာကိုတော့ ကြိုပြောပါရစေ။
လွတ်တော်ကိုယ်စားလှယ်များရွေးချယ်မှုနဲ့ပတ်သတ်ပြီး
တစ်ချက်လေးပဲနှိုင်းယှဉ်မေးခွန်းထုတ်ပါရစေ။ ပြီးခဲ့တဲ့နှစ်က နေပြည်တော်ကပုဗ္ဗသီရီ မြို့နယ်ရောက်တော့ ဒေသခံအချို့နဲ့ စကားစပ်မိကြရင်းနဲ့သူတို့ရဲ့ရွေးချယ်တင်မြှောက်ခဲ့တဲ့ NLD လွတ်တော်ကိုယ်စားလှယ်ဖြစ်တဲ့ ကိုဖြိုးဇေယျာသော်အကြောင်း ပြောသံကိုနားထောင်ခဲ့ရပါတယ်။ သူတို့အနေနဲ့
သူတို့လွတ်တော်ကိုယ်စားလှယ်ရဲ့ စွမ်းဆောင်မှုနဲ့ပတ်သတ်ပြီး
ကျေနပ်အားရမှု မရှိကြပါဘူး။ မဲဆွယ်တုန်းကသာလာရောက်ပြီး
ကိုယ်စားလှယ်ဖြစ်သွားတဲ့နောက်ပိုင်း လာရောက်မှု၊
မဲဆန္ဒရှင်ပြည်သူတွေနဲ့တွေ့ဆုံမှု လိုအပ်ချက်များကို မေးမြန်း
ဖြည့်ဆည်းပေးမှုဟာ မရှိသလောက်နည်းပါးတယ် ဆိုတဲ့အကြောင်း
လွတ်တော်ကိုယ်စားလှယ်တဦးဖြစ်ပြီး ဒေါ်ဆောင်ဆန်းစုကြည်ရဲ့နောက်က
လိုက်နေတာနဲ့ အချိန်ကုန်နေတဲ့အကြောင်း ဝေဖန်ပြောဆိုသံများကို
ကိုယ်တိုင်ကြားသိခဲ့ရပါတယ်။
သူတို့တွေရဲ့ပြောဆိုမှုများဟာ မှန်ကန်မှုရှိမရှိဆိုတာပြီးခဲ့သော
ကြားဖြတ်ရွေးကောက်ပွဲမှ ယနေ့ထိ ကိုဖြိုးဇေယျာသော်ရဲ့
လွတ်တော်အတွင်းစွမ်းဆောင်မှုများ ဘယ်လောက်ရှိခဲ့သလဲဆိုတာနဲ့
ချိန်ထိုးကြည့်ရင် သိရမှာဖြစ်ပါတယ်။
ဒီလိုစွမ်းဆောင်မှုအားနည်းသောကိုယ်စားလှယ်များ ပါတီအတွင်း နာမည်ပျက်ရှိသောလွှတ်တော်ကိုယ်စားလှယ်များကိုကြ ရွေးချယ်ခဲ့ကြပြီး
အလုပ်လုပ်နိုင်မှုစွမ်းရည်ကောင်းမွန်သဖြင့် နာမည်ကောင်းရရှိနေသူ
လူထုထောက်ခံမှု ပါတီဝင်တွေရဲ့ထောက်ခံမှုအပြည့်အ၀ရရှိထားသူ
ရန်ကုန်တိုင်းဒေသကြီး လွှတ်တော်ကိုယ်စားလှယ် ဒေါက်တာ ဒေါ်ညိုညိုသင်းလိုပုဂ္ဂိုလ်မျိုးကြတော့ ဘာလို့ ပြန်လည်မရွေးချယ်ခဲ့သလဲဆိုတာ မေးခွန်းထုတ်စရာ သံသရဖြစ်စရာ တွေ့မြင်ရပါတယ်။
ဒေါက်တာဒေါ်ညိုညိုသင်းဟာ ပြီးခဲ့တဲ့ လွတ်တော်သက်တမ်းတလျောက်မှာ ပါတီအတွက် ပြည်သူအတွက် တာဝန်ကျေပွန်တဲ့ကိုယ်စားလှယ်
တစ်ရောက်ဆိုရင် မှားမယ်မထင်ပါဘူး။ ထို့ကြောင့်ပါတီဝင်တွေရဲ့ထောက်ခံမှု
လူထုရဲ့ထောက်ခံမှုကို ယနေ့ထိတိုင် အပြည့်အ၀ ရယူနိုင်ခဲ့သူတဦးဖြစ်ပါတယ်။
ဒီလိုပါတီရဲ့ပုံရိပ်ကိုကောင်းမွန်စေခဲ့သူ တစ်ဦး၊
လူထုထောက်ခံမှုအပြည့်အ၀ရရှိသူတစ်ဦးကို
ဘာ့ကြောင့်ပြန်လည်မရွေးချယ်ခဲ့တာလဲ။ ဒေါက်တာဒေါ်ညိုညိုသင်းကိုယ်တိုင်က မိမိဟာ ကိုယ်စားလှယ်အရည်အချင်းသတ်မှတ်မှု ၄ ချက်စလုံးနဲ့ ကိုက်ညီပေမယ့်
မရွေးချယ်ခဲ့သည့်အပေါ် ခေါင်းဆောင်များကိုမေးမြန်းခဲ့ပေမယ့်
ယနေ့ထိဘာကြောင့်မှန်းဆိုတာ မသိရဘူးလို ပြောကြားပါတယ်။
နောက်တစ်ယောက်ကတော့ ၈၈ အဖွဲ့အစည်းမှ ဦးကိုကိုကြီးဟာ လူထုကြားမှာ ပုံရိပ်ကောင်းမွန်ပြီး မိမိပါတီအတွက် ၀န်းရံအင်အားဖြည့်ဖို့အတွက် ၀င်လာတာကို ဘာကြောင့်မရွေးချယ်ခဲ့တာလဲ။ ဒီလိုမျိုးမရွေးချယ်ခဲ့တဲ့အတွက် NLD နဲ့ ၈၈ ကြားဆက်ဆံရေးမှာ အက်ကြောင်းဖြစ်ပေါ်သွားခဲ့ရတယ်ဆိုတာ
ပြောပြဖို့လိုမယ်မထင်ပါဘူး။
NLD ပါတီခေါင်းဆောင် စီအီးစီများဟာ လွှတ်တော်ကိုယ်စားလှယ်များ ရွေးချယ်မှုနဲ့ ပတ်သတ်ပြီး မည်သည့်စံနှုန်းများနဲ့ ရွေးချယ်သလဲဆိုတာ ပါတီဝင်များရော လူထုကပါ သိရှိနေချင်ကြပါတယ်။ မှုဝါဒနဲ့ လုပ်ဆောင်ချက်တွေဟာ မကိုက်ညီတာ တွေ့မြင်နေရပါတယ်။ ဒေါက်တာဒေါ်ညိုညိုသင်းကို မြို့နယ်အဆင့် တိုင်းအဆင့်က ထောက်ခံတင်ပေးလိုက်သော်လည်း ဒေါ်အောင်ဆန်းစုကြည်နှင့်
ပုဂ္ဂိုလ်ရေးရင်းနှီးကျွမ်းဝင်သည့် CEC နှစ်ဦးကကန့်ကွက်ခဲ့လို့
ပယ်ချခဲ့တယ်လို့ ဒေါက်တာညိုညိုသင်းက ကိုယ်တိုင်ကပြောကြားခဲ့တာကို
စိတ်မကောင်းစွာ ကြားသိရပါတယ်။
NLD ဗဟိုအလုပ်အမှုဆောင် CEC တွေ့ရဲ့ဆောင်ရွက်မှုတွေဟာ
အောက်ခြေပါတီဝင်တွေရဲ့ သဘောဆန္ဒနဲ့ ထပ်တူမကျဖြစ်နေတာကြာပါပြီ။
ပါတီဝင်တွေဟာ ဗဟိုဦးစီးစနစ်ကို မကြိုက်နှစ်သက်ကြပါဘူး။
ဒီမိုကရေစီပါတီတစ်ခုက အာဏာရှင်စနှစ်ဆန်နေသော လုပ်ရပ်တွေကို
မနှစ်မြို့ကြပါဘူး။ ဒါကို ခေါင်းဆောင်ဖြစ်တဲ့ ဒေါ်ဆောင်ဆန်းစုကြည်အနေနဲ့
သတိထား ပြုပြင်သင့်တယ်လို့မြင်မိပါတယ်။ မိမိဘေးရှိ
စီအီးစီတွေရဲ့ပြောစကားပဲ နားယောင်မနေပဲ အောက်ခြေပါတီဝင်များရဲ့
သဘောဆန္ဒများကိုလည်း အလေးထားသင့်ပါတယ်။ ငါတကောမကောပဲ အပေါ်နဲ့အောက် အပြန်အလှန်လေးစားမှု ထားသင့်ပါတယ်။ ယနေ့ စီအီးစီတွေကိုယ်တိုင်ဟာ ပါတီဝင်တွေရဲ့ ဒီမိုကရေစီနည်းလမ်းတစ်ကျ ရွေးကောက်တင်မြှောက်ထားတာ မဟုတ်ပါဘူး။ ထို့အတွက်ကြောင့် ဒီမိုကရေစီနည်းကျ ပြန်လည်ရွေးကောက်တင်မြှောက်မှု အမြန်ဆုံး ပြုလုပ်သင့်နေပါပြီ။
ဒေါ်အောင်ဆန်းစုကြည်အနေနဲ့ ထိပ်ပိုင်းခေါင်းဆောင်များထဲမှာ
နောက်ကျောဓားနဲ့ထိုးမယ့်သူ ပူးသတ်မည့်သူများ ပါဝင်နေသလားဆိုတာ
ဆန်းစစ်သင့်တဲ့ အချိ်န်ရောက်နေပါပြီ။ သို့မဟုတ်ပါက
ဆရာလူထုစိန်ဝင်းပြောခဲ့သလို ပါတီဟာ မိုးမပျံပဲ မြေလျိုးသွားပါလိမ့်မယ်။
နောက်ဆုံးအနေနဲ့ပြောချင်တာက NLD ဗဟို အလုပ်အမှုဆောင်များအနေနဲ့
ပါတီဝင်များနှင့် ပြည်သူသဘောဆန္ဒများကို မျက်ကွယ်ပြုပြီး
လွတ်တော်ကိုယ်စားလှယ်ရွေးချယ်မှုနဲ့ပတ်သတ်ပြီး ပါတီခေါင်းဆောင်များအနေနဲ့ မှန်ကန်တယ်လို့ ယူဆပါက လူထုကို လာမယ့်ရွေးကောက်ပွဲ မှာ အောင်မြင်မှုရရှိဖို့အတွက် တာဝန်ခံကြောင်း ကြိုတင်တရားဝင်ပြောဆို အာမခံသင့်ပါတယ်။ တခုခုချွတ်ချော်မှု လွဲချော်မှုဖြစ်ခဲ့ပါက ပါတီသာမက နောက်ကွယ်က ပြည်သူတွေပါ နစ်နာမယ်ဆိုတာ သတိချပ်သင့်ပါတယ်။ ၂၀၁၅
ရွေးကောက်ပွဲမှာ ထွက်ပေါ်လာသည့်ရလဒ်အပေါ် မည်သို့တာဝန်ခံမည်ဆိုတဲ့အကြောင်းကို ဗဟိုအလုပ်အမှုဆောင် စီအီးစီများအနေနဲ့ ပြည်သူကို ကြိုတင်တရားဝင်အသိပေးသင့်ကြောင်း ပါတီနဲ့ ပြည်သူအတွက် စေတနာရှေ့ထား ရေးသားလိုက်ရပါတယ်။
..
https://www.facebook.com/MyanmarExpress
.jpg)
.jpg)
.jpg)
.jpg)
.jpg)
.jpg)
