လွှတ်တော်ထဲမှ အသံများ

23 ရက်နေ့ က ပြန်လည်စတင်တဲ့ ပြည်သူ့လွှတ်တော်အစည်းအဝေးကို NLD မတက်ရောက်ဖြစ်တဲ့အပေါ် NLD နဲ့ အခြားလွှတ်တော်ကိုယ်စားလှယ် တချို့ရဲ့ မှတ်ချက်တွေပါ။

ပြည်သူ့လွှတ်တော် ဥပဒေကြမ်း ကော်မတီဝင် ရှမ်းပြည်နယ် ကွန်ဟိန်းအမတ် ဒေါ်နန်းဝါနု က-
"သူတို့မှ မလာဘူးဆိုတော့ ကျွန်မတို့တော့ စိတ်မကောင်းဘူးပေါ့။ လာစေချင်တယ်။ သူတို့ ဖြစ်စေချင်တဲ့ ဒီဥပဒေပြင်တယ်ဆိုတာက သူတို့ဒီကို လာပြီးတော့မှ ပြင်လို့ရတာလေ။ လွှတ်တော် ပြင်ပနေမှ ပြင်လို့မှ မရတာ။ လွှတ်တော်အတွင်းကိုလာ၊ ပြီးတော့ ၂၀% က အဆိုပြုရမှာ။
ပြီးတော့ ဆွေးနွေး၊ ပြီးတော့ ၇၅% ကထောက်ခံမှုနဲ့ ဒါက ပြင်လို့ ရတယ်။"

လွှတ်တော်ထဲမှာ ကြံ့ခိုင်ဖွံ့ဖြိုးရေးနဲ့ စစ်တပ်အမတ်တွေက ကြီးစိုးထားတဲ့ အတွက် ဒီလိုပြင်ဆင်ရေး ဖြစ်နိုင်မလားဆိုပြီး မေးခွန်းထုတ်သူတွေ ရှိနေပါတယ်။

ဒီအပေါ် တိုင်းရင်းသား စည်းလုံးညီညွတ်ရေးပါတီရဲ့ စစ်ကိုင်းတိုင်း
မော်လိုက်ပြည်သူ့လွှတ်တော် ကိုယ်စားလှယ် ဦးသောင်း က-

"လွယ်ပါ့မလားဆိုတာတော့ ပြောလို့ မရဘူး။ သူ့ဆန္ဒ ကိုယ့်ဆန္ဒ တူညီတာ မတူညီတာတွေ ရှိတယ်လေ။ တချို့ကိစ္စတွေဆို မတူညီဘူးလို့ ယူဆထားပေမယ့် တူညီလာတာတွေလည်းရှိတယ်။ တူညီလိမ့်မယ်လို့ ယူဆပေမဲ့ မတူညီလာတာတွေလည်း ရှိတယ်။ ၇၀% ပေမယ့် သဘောတူညီမှုရလာတဲ့ သာဓကတွေ အများကြီး ရှိပါတယ်။ ဥပဒေပြုသည့်အာဏာ ပြင်သည့် အာဏာသည် ပြည်ထောင်စု လွှတ်တော်မှာပဲ ရှိတယ်။ အပြင်ကနေပြီးတော့ ပြင်ပေးပါဆိုတာ သမ္မတ ကိုယ်တိုင်လည်း မပြင်နိုင်ဘူး တကယ်တန်းကျတော့။"

ရွေးချယ်ခံ NLD ပြည်သူ့လွှတ်တော်ကိုယ်စားလှယ် ဒေါက်တာမေ၀င်းမြင့် က-

"ကျွန်မတို့က စာတင်ထားတာလေ။ အဖြေကို ကျွန်မတို့ စောင့်နေပါတယ်။ ကျန်တဲ့ ကိုယ်စားလှယ်တွေလည်း အကုန်လုံး အဆင်သင့်ပါဘဲ။ ဒီက အဖြေရမှပဲ ကျွန်မတို့ အဖွဲ့က ဆုံးဖြတ်မှာ ဖြစ်ပါတယ်။"

ကျမ်းကျိန်စာသား ပြင်မပေးသ၍ NLD က လွှတ်တော်မတက်တော့ဘူးလား ဆိုတဲ့ အမေးကို NLD အမတ် ဦးမင်းသူ က-

"အဲဒီလိုတော့ အပြီးအပြတ်ပြောလို့ မရသေးဘူးဗျ။ အဲဒါကို ကျွန်တော်တို့ ခေါင်းဆောင်တွေက အဓိက ကတော့ အဖွဲ့ချုပ်ခေါင်းဆောင်
ဒေါ်အောင်ဆန်းစုကြည်ပေါ့လေ။ လွှတ်တော်ရဲ့ ဂုဏ်သိက္ခာ၊
နောက် နိုင်ငံတော်ရဲ့ ဂုဏ်သိက္ခာပေါ့လေ။ အဲဒီအတွက်က အရေးကြီးတဲ့ စာသား ဖြစ်နေတဲ့အတွက် လွှတ်တော်ကိုယ်စားလှယ်တွေ လက်ရှိ အခြေအနေမှာ မတက်သေးပါဘူး။ ဒီဥစ္စာလေး ပြင်ပေးပါဆိုတဲ့ဟာ
ပြောထားတာပါ။ မတက်ဖြစ်ဘူး မဟုတ်ဘူးနော်။ မတက်ဘူးလည်း မဟုတ်ပါဘူး။ တက်ဖို့အတွက်ကို ကြိုးစားနေတယ်လို့ပဲ ပြောတာပါ။"

ဒီမိုကရက်တစ်ပါတီ ဦးသုဝေ က-

"ကျွန်တော့်အမြင်ကတော့ ဒီပြဿနာဟာ ပြဿနာ မဖြစ်လောက်တဲ့
ပြဿနာလို့ မြင်တာပေါ့။ ကျွန်တော်ကတော့ အန်အယ်ဒီကို လွှတ်တော် တက်စေချင်ပါတယ်။ ပြီးတဲ့အခါမှ လွှတ်တော် အပြင်ပဲ ဖြစ်ဖြစ် အတွင်းပဲ ဖြစ်ဖြစ် ကြိုက်တာပြော ကြိုက်တာပြင်ပေါ့ဗျာ။ အဲလို ဖြစ်ချေင်ပါတယ်။ သူတို့အချင်းများနေတဲ့ စကားလုံးလေးတွေ
ဟာ ကျွန်တော်တို့ အတွက်တော့ မထူးခြားဘူး။ ကျွန်တော့်အမြင်ပြောတာပေါ့နော်။ ဒါပေမယ့် တချို့ကတော့လည်း ဒီလိုဟာလေးတွေကို အလေးထားတာ ရှိရင်လည်း ရှိမှာပေါ့။ ကျွန်တော်တို့ကတော့ ထူးထူးခြားခြားကြီး ဘာမှကွဲလွဲမှုမရှိဘူးလို့ ထင်တာဘဲ။ "
 
Myanmar Express 

Posted in: သတင်း