ရခိုင်ပြည်နယ် ဝန်ကြီးချုပ် ဦးမောင်မောင်အုန်းနှင့် တွေ့ဆုံခြင်း

From : .. The Voice

(အောင်မြင့်ထွန်း)

ထိုင်း၊ အင်ဒိုနီးရှား၊ မလေးရှားနိုင်ငံများသို့ ခိုးဝင်သည့် လှေစီးသွားလာသူများတွင် မြန်မာနှင့် ဘင်္ဂလားဒေ့ရ်ှနိုင်ငံတို့မှ ထွက်ပြေးလာသူများ ဖြစ်သည်ဟုဆိုကာ နိုင်ငံတကာက ဝေဖန်ဖိအားပေးမှုများ မြင့်တက်နေသည်။ မြန်မာနိုင်ငံ၊ ရခိုင်ပြည်နယ်မှ ဘင်္ဂါလီများသည့် လူ့အခွင့်အရေး ချိုးဖောက်ခံရမှုများကြောင့် ထွက်ပြေးကြသည်ဟု စွပ်စွဲမှုများရှိနေရာ ယင်းကိစ္စများနှင့် ပတ်သက်၍ ရခိုင်ပြည်နယ် ဝန်ကြီးချုပ် ဦးမောင်မောင်အုန်းကို The Voice က မေးမြန်းဖော်ပြလိုက်ပါသည်။

Voice: လှေစီးသွားလာသူတွေထဲမှာ ရခိုင်ပြည်နယ်က ထွက်ပြေးလာသူတွေ အများအပြား ပါဝင်နေတယ်ဆိုပြီး နိုင်ငံတကာ မီဒီယာတွေမှာ၊ နိုင်ငံတကာ အသိုင်းအဝိုင်းမှာ ပြောဆိုနေကြပါတယ်။ ရခိုင်ပြည်နယ်က ထွက်ပြေးလာတယ် ဆိုတာနဲ့ ပတ်သက်လို့ ဝန်ကြီးချုပ် ဘာပြောချင်လဲ။

UMMO: နိုင်ငံတကာကတော့ ပြဿနာတစ်ခု ဖြစ်လို့ရှိရင် မြန်မာနိုင်ငံက ရိုဟင်ဂျာတွေ ဆိုပြီးတော့ မြန်မာနိုင်ငံကို ပုံချတာများတယ်။ အခုလည်း Boat People ဆိုတဲ့ ကိစ္စကလည်း တကယ်တော့ လူကုန်ကူး ပွဲစားတွေရဲ့ လူကုန်ကူးမှု ဖြစ်စဉ်ကြီးပဲ။ အဲဒါကို ဇောင်းမပေးဘဲနဲ့ မြန်မာနိုင်ငံမှာ Slow Genocide (တမြေ့မြေ့ လူမျိုးတုံး သတ်ဖြတ်မှု) ပုံစံမျိုးတွေ ကျင့်သုံးလို့၊ မနေနိုင်လို့ ထွက်ပြေးလာရတဲ့ ပုံစံမျိုးလုပ်ပြီး ပြည်နယ်အစိုးရအပေါ်မှာရော မြန်မာနိုင်ငံအပေါ်မှာရော မီဒီယာတွေနဲ့ တချို့နိုင်ငံတွေက ပြောဆိုနေတာ ရှိပါတယ်။ Slow Genocide ကျင့်သုံးလို့၊ မနေနိုင်လို့ ထွက်ပြေးလာရတဲ့ ပုံစံမျိုးလုပ်တာကို လုံးဝလက်ခံပါဘူး။
အခုဖြစ်နေတဲ့ လူတွေက ဒို့ဆီမှာ (ရခိုင်ပြည်နယ်) အကြောင်းအမျိုးမျိုးနဲ့ မနေနိုင်အောင်လုပ်လို့ သွားတာ မဟုတ်ဘဲနဲ့ သူတို့မှာ ပါလာတဲ့ လူတွေကို ဘယ်ကမှန်း အတိအကျ မသိရသေးဘူးလေ။ မြန်မာနိုင်ငံက အနည်းအကျဉ်းလောက်ပဲလို့ မှန်းပါတယ်။ များသောအားဖြင့်တော့ ဘင်္ဂလားဒေ့ရ်ှနိုင်ငံကနေ များတယ်။ လူကုန်ကူးတဲ့သူတွေက သူတို့ဘာသူတို့ အစီအစဉ်နဲ့ ချိတ်ဆက်ပြီးတော့မှ ခေါ်ယူခြင်းသာ ဖြစ်ပါတယ်။
အဲဒါကို ဘာသက်သေပြချင်လဲဆိုတော့ မနေ့က (မေလ ၂၁) ညနေ ၃ နာရီခွဲလောက်မှာ ကိုယ်တို့ရေပိုင်နက်မှာ ဘင်္ဂါလီ Boat People တွေ စီးလာတဲ့ စက်လှေနှစ်စီး တပ်မတော်(ရေ) က ဖမ်းမိတယ်။ ဘုတ်တစ်စီးက အခွန်၊ တစ်စီးလူပါတယ်။ အဲဒီအပေါ်မှာ လူ ၂၀၈ ယောက် ပါတယ်။ သင်္ဘောသား ၁၇ ယောက်ပါတယ်။ ပွဲစားလိုလို ဘာလိုလိုက နှစ်ယောက်ပါတယ်။ အားလုံးကို အငူမော်ကနေ ကားနဲ့ အလယ်သံကျောက်ကို ပို့လိုက်တယ်။ ဒီနေ့ နေ့ခင်း (မေလ ၂၂ ရက်) မှာတော့ ယာယီ Camp တွေကိုတော့ ရောက်သွားပြီ။ အားလုံးဟာ ဘင်္ဂလားဒေ့ရ်ှနိုင်ငံသားတွေ ဖြစ်တယ်။ များသောအားဖြင့် အသက် ၂၀ နဲ့ ၃၀ ယောက်ျားတွေ များတယ်။ ဝမ်းဗိုက် (စက်လှေ) ဖွင့်လိုက်တဲ့အခါမှာ တချို့တွေလည်း အစာရေစာ ပြတ်နေတာပေါ့။ အားအင်ကုန်ခမ်းနေတာပေါ။ ဒါကြောင့် မြန်မာနိုင်ငံအစိုးရနဲ့ ပြည်နယ်အစိုးရတို့က လိုအပ်တဲ့ ကူညီပေးထားတယ်။ ဝန်ကြီးတစ်ပါးလည်း သွားရောက် စီမံကွပ်ကဲနေတယ်။ နယ်ခြားစောင့်ရဲက ရဲမှူးချုပ်တင်ကိုကို ကိုယ်တိုင်စောင့်ရှောက်နေတယ်။ ယူအန်အိုင်အန်ဂျီအိုတွေလည်း သွားရောက်စောင့်ရှောက်နေတယ်။

Voice: ဖမ်းမိထားတဲ့ ဘင်္ဂလားဒေ့ရှ် နိုင်ငံသားတွေကို ဘယ်လိုလုပ်ဆောင်မလဲ။

UMMO: ဘင်္ဂလားဒေ့ရ်ှနိုင်သားတွေ ဖြစ်တဲ့အတွက် စိစစ်ပြီးရင်တော့ တစ်ဖက်နိုင်ငံကို လွှဲပြောင်းတာတွေ လုပ်ရမှာပေါ့။ ဆိုလိုချင်တာကလည်း အခုမိတဲ့အထဲမှာ ကိုယ်တို့နိုင်ငံသားတွေ တစ်ယောက်မှ မပါဘူး။ အဲတော့ နိုင်ငံတကာက စွပ်စွဲတာတွေဟာ ပါးစပ်ထဲမှာ ရှိတာတွေကို လျှောက်ပြောသလို ဖြစ်နေတယ်။ ကိုယ်တို့နိုင်ငံက ဒါတွေကို အကူအညီမပေးသလို ဖြစ်နေတယ်။ အဲလိုပြောတာကို လုံးဝလက်မခံဘူး။ ကိုယ်တို့ဘက်က အတတ်နိုင်ဆုံး လုပ်တယ်ဆိုတာကို အလေးအနက်ထား ပြောချင်တယ်။ ပြည်နယ်အစိုးရ အနေနဲ့ Boat People ကိစ္စမှာ အတတ်နိုင်ဆုံး ထိန်းသိမ်းတယ်။ အခုလည်း လူသားချင်းစာနာသောအားဖြင့် ကိုယ့်နိုင်ငံသား မဟုတ်ပေမယ့် တစ်ဖက်နိုင်ငံသားကို ကယ်တင်စောင့်ရှောက်ထားတယ်။ ပြီးရင် တစ်ဖက်နိုင်ငံကို လွှဲပေးမယ်။

Voice: ဒါဆိုရင် ဘင်္ဂလားဒေ့ရ်ှက ထွက်ပြေးလာသူတွေဟာ နိုင်ငံတကာရောက်ရင် သူတို့ဟာ မြန်မာနိုင်ငံက ထွက်ပြေးလာတဲ့ ရိုဟင်ဂျာတွေပါလို့ ဘာကြောင့် နာမည်ခံတာလို့ ဝန်ကြီးချုပ် ယူဆလဲ။

UMMO: ပြောရရင်တော့ ပွဲစားတွေက ဖမ်းမိလို့ရှိရင် မြန်မာနိုင်ငံကို ပုံချတာပေါ့။ ဘာလို့လဲဆိုတော့ လာသမျှလူကို မြန်မာနိုင်ငံက ရိုဟင်ဂျာပါဆိုပြီး ပွဲစားတွေက ပြောတာဖြစ်သလို ကမ္ဘာက ပုံဖော်နေတာကလည်း မြန်မာနိုင်ငံကို ကောင်းကျိုးတွေ မဖြစ်စေဘဲနဲ့ ဆိုးကျိုးတွေ ဖြစ်စေချင်တဲ့ နိုင်ငံတွေက ပြဿနာဖြစ်တာနဲ့ မြန်မာနိုင်ငံကပဲလို့ စွပ်စွဲတာရှိတယ်။ အဲဒီလို လူတွေကို ရခိုင်ပြည်နယ်ကို ခေါ်ပြီးတော့ Face to Face (မျက်နှာချင်းဆိုင်) ကို ဆွေးနွေးချင်ပါတယ်။ လက်ဆုပ်လက်ကိုင် ပြောဖို့လိုတယ်။ ကိုယ့်စကားကို ကိုယ်တာဝန်ယူဖို့တော့ လိုတာပေါ့။ ဒီကိစ္စတွေမှာတော့ ရခိုင်တိုင်းရင်းသားတွေရဲ့ ဂုဏ်သက္ခာကိုလည်း အကျမခံဘူး။ နိုင်ငံတကာက ပြောဆိုတာလည်း လက်မခံဘူး။ ဥပဒေနဲ့အညီ ကိုယ့်တိုင်းရင်းသားတွေဘက်က ရပ်တည်ပြီး ပြတ်ပြတ်သားသား ကိုင်တွယ်သွားမှာပါ။
ဘင်္ဂါလီ Camp တွေမှာ ရိုဟင်ဂျာ ဆိုတာကို သိပ်မပြောတော့ဘူး။ အစိုးရရဲ့ စေတနာတွေကို ဘင်္ဂါလီ IDP တွေ သိတဲ့အခါမှာ သိပ်မပြောတော့ဘူး။ ဒါပေမဲ့ နောက်ကွယ်မှာရှိတဲ့ သူတွေကို ရိုဟင်ဂျာ ဆိုတာကို ဇောင်းပေးပြီးတော့မှ မဖြစ်ဖြစ်အောင် ဒီမှာရှိတဲ့ IDP တွေကို တွန်းအားပေးနေတယ်လို့ သိရပါတယ်။ ဒီကိစ္စတွေကတော့ ကျယ်ပြန့်ပါတယ်။ ပြည်နယ်အစိုးရ အနေနဲ့တော့ လူသားချင်းစာနာတဲ့ ကိစ္စတွေကို အလေးအနက်ထားလုပ်တယ် ဆိုတာကို သက်သေပြနေပါတယ်။

Voice: လှေစီးသူတွေဟာ ရခိုင်ပြည်နယ်က ထွက်ပြေးလာတယ် ဆိုတာကို ပါးစပ်နဲ့ ပြောနေရုံ မပြီးဘဲ သက်သေခိုင်ခိုင်လုံလုံပြဖို့ လိုတယ်လို့ ဝန်ကြီးချုပ် ဆိုလိုချင်တာလား။ သက်သေပြနိုင်ရင် စိစစ်လက်ခံမှာလား။

UMMO: သူတို့ လျှောက်မပြောနဲ့လေ။ မြန်မာနိုင်ငံက ထွက်လာတယ်ဆိုရင် ဘယ်လိုထွက်တာလဲ။ ဘယ်လိုသက်သေပြမလဲ။ ကိုယ်တို့ဆီကို ပင်လယ်ကူး သင်္ဘောကြီးတွေ ရောက်ဖို့ဆိုတာ အခြေအနေ မပေးပါဘူး။ အဆင့်ဆင့် သွားရတာလေ။ သူဟာသူ ပွဲစားတွေနဲ့ လုပ်တဲ့ကိစ္စ။ ဒုက္ခသည်တွေ အခုမေးမြန်းတဲ့အခါမှာ မြန်မာနိုင်ငံက မှန်ရင်ပြော။ မှန်ရင်တော့ လက်ခံမှာပေါ့။ လူသားချင်းစာနာတယ် ဆိုပြီးတော့ မြန်မာနိုင်ငံမှာအပေါ်မှာ ဘာကြောင့် စာနာစိတ် မရှိတာလဲ။ အဲဒါကြောင့် ဘဝင်မကျဘူး။ နောက်ဆုံးပြောချင်တာတော့ ရခိုင်ပြည်နယ်ကို လာခဲ့ပါ။ ကိုယ်နဲ့တွေ့ပါ။ ဒီမှာရှိတဲ့ ဘင်္ဂါလီ Camp တွေကို လိုက်ကြည့်ပါ။ ပူးပေါင်း ညှိနှိုင်းအဖြေရှာပါ။ အဲလိုမဟုတ်ဘဲနဲ့ ဒီလိုသာ လုပ်နေမယ်ဆိုရင် ရခိုင်ပြည်နယ်ရဲ့ တည်ငြိမ်မှု Progress (တိုးတက်မှု) ကတော့ နှေးနေမှာ။ ကိုယ်တို့ကတော့ အတတ်နိုင်ဆုံး မြန်အောင်လုပ်နေတာ။

Voice: ရခိုင်ပြည်နယ်ကနေ ခိုးထွက်တာတွေ ရခိုင်ပြည်နယ်ကို ခိုးဝင်တာတွေ မရှိအောင် ဘယ်လိုစီမံထားလဲ။

UMMO: စီမံထားတာက အများကြီးပေါ့။ နေ့စဉ် လှေဝင်လှေထွက်တွေ၊ ပင်လယ်ထွက် ငါဖမ်းတာတွေကို စိစစ်တာတွေ ရှိပါတယ်။ ဒီလိုပဲ နယ်ခြားစောင့်ရဲကလည်း နယ်စပ်တစ်လျှောက်မှာ စစ်ဆေးတာတွေ ရှိတာပေါ့နော်။ တပ်မတော် (ရေ) ကလည်း ပင်လယ်ပြင်မှာ တားဆီးပိတ်ဆို့တာတွေ ရှိပါတယ်။ ခိုးဝင်တာကိုလည်း တားဆီးပါတယ်။ ပြန်ထွက်သွားတာကိုလည်း တားဆီးနေတယ်။ သို့သော်လည်း လူကုန်ကူးတဲ့ ပွဲစားတွေရဲ့ စည်းရုံးမှုနဲ့ ဒီမှာမနေချင်ဘဲ သွားတဲ့သူ တချို့တလေလည်း ရှိကောင်းရှိမှာပေါ့။ လွတ်သွားတာမျိုးလည်း ရှိနိုင်တာပေါ့။ ဒါကတော့ သူဘာသူ ဆန္ဒရှိလို့ သွားတဲ့ဟာကိုတော့ မတတ်နိုင်ဘူးပေါ့။ ရဲရဲတင်းတင်း ပြောရဲတာကတော့ ဒီမှာရှိတဲ့ ဘင်္ဂါလီ IDP တွေ အပါအဝင် ဘင်္ဂါလီတွေဟာ ရသင့်ရထိုက်တဲ့ လူသားချင်းစာနာတဲ့ အထောက်အထားကို နိုင်တကာအကူအညီ၊ နိုင်ငံတော်အကူအညီနဲ့ အထောက်အပံ့နဲ့ အပြည့်စုံဆုံး လုပ်ပေးထားတယ်။ ကိုယ် သူတို့ကိုလည်း အမြဲတမ်း ပြောပါတယ်။ IDP ဟာ IDP အခွင့်အရေး ရမယ်။ နိုင်ငံသားအခွင့်အရေး လိုချင်တော့ နိုင်ငံသားဖြစ်အောင် လုပ်။ နိုင်ငံသားဖြစ်အောင် ဆိုရင်တော့ ရိုဟင်ဂျာ စကားလုံးက မလိုဘူး။ ရိုဟင်ဂျာဆိုပြီး နိုင်ငံသားအခွင့်အရေး လိုချင်တယ် ဘယ်လိုမှ မဖြစ်နိုင်ဘူး။ ရခိုင်ကျေးရွာတွေကို ကြည့်လိုက်လို့ရှိရင် IDP ထက်နိမ့်တဲ့ ကျန်းမာရေးရော၊ တချို့ဆိုရင် အိမ်သာမရှိ၊ ရေမရှိတဲ့ရွာတွေ အများကြီးရှိတယ်။

Voice: မြန်မာနိုင်ငံမှာ ရိုဟင်ဂျာမရှိဘူး ဆိုတာကို အသိပညာရှင်၊ အတတ်ပညာရှင်တွေနဲ့ ကမ္ဘာကို တင်ပြမယ်ဆိုပြီး Mr. George Soros (အမေရိက ဘီလီယံနာ သူဌေးကြီး) နဲ့ တွေ့ဆုံခဲ့တုန်းက ပြောခဲ့တယ်လို့ ဝန်ကြီးချုပ်က The Voice နဲ့ အင်တာဗျုးတစ်ခုမှာ ပြောဆိုဖူးပါတယ်။ အဲဒီကိစ္စရော ဘယ်လိုဖြစ်နေပြီလဲ ခင်ဗျာ။

UMMO: ရခိုင်တိုင်းရင်းသား ပါမောက္ခ ဒေါက်တာအေးချမ်းတို့နဲ့ တကယ့်ပညာတတ်တွေနဲ့ ဒါတွေကို လုပ်နေတယ်။ နိုင်ငံတကာပညာရှင်တွေနဲ့ ပေါင်းစပ်ပြီးတော့ ကျယ်ကျယ်ပြန့်ပြန့် လုပ်ဖို့တော့ စီမံနေတာပေါ့။ ဒေါက်တာအေးချမ်း အပါအဝင် ရခိုင်ပညာရှင်တွေ ပြုစုထားတဲ့ အင်္ဂလိပ်လိုရော၊ မြန်မာလိုရော ကမ္ဘာကို ဖြန့်မယ့်စာအုပ်တွေကတော့ ရှိပြီးသားပါ။ သို့သော်လည်း ကိုယ့်အမျိုးသားတွေရေးတဲ့ စာတွေကို နိုင်ငံတကာက လက်မခံတော့ ကိုယ်အမျိုးသားတွေ ရေးတဲ့စာတွေအပြင် တခြားနိုင်ငံတကာအသိပညာရှင်၊ အတတ်ပညာရှင်တွေနဲ့ ထိထိမိမိ။ ဆွေးနွေးတဲ့နေရာမှာ အရေးကြီးတဲ့နေရာမှာ အရေးကြီးတဲ့ လူတွေကို ဆွေးနွေးမှ အရာရောက်မှာကို။ ဒါလေးကတော့ စီမံဆောင်ရွက်နေတယ်လို့ပဲ ပြောပါရစေ။

Voice: ဘယ်အချိန်ကာလမှာ တင်ပြနိုင်မယ်ဆိုတဲ့ သတ်မှတ်ချက်များ ရှိလား။

UMMO: လက်ရှိကတော့ ရွေးကောက်ပွဲကာလတွေမှာ တစ်ခုပြီးတစ်ခု ရခိုင်ကိုပဲ ပြဿနာရှာနေတော့ ကိုယ်တို့မှာလည်း ဒီကိစ္စဘက်ကို တစိုက်မတ်မတ် လုပ်ဖို့ဆိုတာ နည်းနည်းတော့ နှေးတော့ နှေးနေတာပေါ့။ အတတ်နိုင်ဆုံး မြန်မြန်နဲ့ တစ်ဖက်တစ်လမ်းကလည်း ကိုယ်တို့ တိုင်းရင်းသားတွေဘက်က ရရှိမယ့် အခွင့်အလမ်းနဲ့ ရပ်တည်ချက်ကို ပြနိုင်အောင်တော့ ရတဲ့အချိန်မှာ ဆက်လက်ကြိုးစားသွားမှာပါ။

.. https://www.facebook.com/MyanmarExpress
 

Posted in: မြန်မာ-ကုလား အဓိကရုဏ်းများ