လှေစီးဒုက္ခသည်များအားလုံး၏ ဇစ်မြစ်သည် မြန်မာနိုင်ငံဖြစ်ကြောင်း ကုလ စွပ်စွဲ

From : .. 7day

 အရှေ့တောင်အာရှ လှေစီးဒုက္ခသည်များ ပြဿနာ၏ ဇစ်မြစ်သည် မြန်မာနိုင်ငံဖြစ်ကြောင်း ကုလသမဂ္ဂ စွပ်စွဲပြောကြားချက်ကို မြန်မာဘက်မှ ငြင်းဆိုခဲ့ကြောင်း သတင်းရရှိသည်။

 မေ ၂၉ ရက်တွင် ထိုင်းနိုင်ငံ၊ ဘန်ကောက်မြို့၌ ဘင်္ဂါလီ ရေမျောဒုက္ခသည်များ အရေးအတွက် ဒေသတွင်း နိုင်ငံများ အစည်းအဝေးတစ်ရပ် ကျင်းပရာ ကုလသမဂ္ဂ ကိုယ်စားလှယ်က အဆိုပါ ဒုက္ခသည်များ ၎င်းတို့နေရပ်ကို စွန့်ခွာလာခြင်းအတွက် မြန်မာတွင် အဓိက တာဝန်ရှိကြောင်း စွပ်စွဲခဲ့ခြင်း ဖြစ်သည်။

ကုလသမဂ္ဂ ဒုက္ခသည်များဆိုင်ရာ အေဂျင်စီ (UNHCR)မှ အဆင့်မြင့် လက်ထောက် ကော်မရှင်နာ ဗော်လ်ကာတာ့ခ်က ယခုဖြစ်ရပ်တွင် မြန်မာနိုင်ငံက အဓိက တာဝန်ရှိကြောင်း၊ နိုင်ငံမဲ့ ဘင်္ဂါလီများကို မြန်မာအစိုးရက နိုင်ငံသားအဖြစ် မသတ်မှတ်ခြင်းသည် ပြဿနာ တစ်ခုလုံး၏ သော့ချက်ဖြစ်ကြောင်း အဆိုပါအစည်းအဝေးတွင် ပြောကြားခဲ့သည်။

ယင်းနှင့်ပတ်သက်၍ မြန်မာ နိုင်ငံခြားရေး ဝန်ကြီးဌာနမှ အထူးကိုယ်စားလှယ် ဦးထင်လင်းက ယခုဖြစ်ရပ်ကို မြန်မာတစ်နိုင်ငံတည်းအပေါ် ပုံချနေခြင်းကို လက်ခံမည် မဟုတ်ကြောင်း တုံ့ပြန်ခဲ့သည်။ “UNHCRက ကျွန်တော့်ရဲ့ ခင်မင်ရင်းနှီးရတဲ့ လုပ်ဖော်ကိုင်ဖက် အနေနဲ့ အခုထက် ပိုကောင်းတဲ့ သတင်းပေးမှုမျိုး လိုအပ်ပါတယ်။ လက်ညှိုးထိုးခြင်းက အရာရာကို ဖြေရှင်းနိုင်မှာ မဟုတ်ပါဘူး။ ဒီလုပ်ရပ်ကနေ ဘာရလဒ်မှ ထွက်ပေါ်လာမှာ မဟုတ်ဘူး”ဟု ၎င်းက ပြောကြားခဲ့သည်။

တာ့ခ်က ဘင်္ဂါလီများကို ရိုဟင်ဂျာဟုပင် အမည်သတ်မှတ် သုံးစွဲခေါ်ဝေါ်ပြီး ၎င်းတို့သည် မြန်မာနိုင်ငံတွင် ဖိနှိပ် ညှင်းပန်းမှုများ ကြုံနေရခြင်းကြောင့် အခြားနိုင်ငံများသို့ တိမ်းရှောင် ထွက်ပြေးရခြင်းဟု စွပ်စွဲခဲ့သော်လည်း မြန်မာကိုယ်စားလှယ်များဘက်က ဘင်္ဂါလီများသည် မြန်မာနိုင်ငံသားများ မဟုတ်ကြောင်း အခိုင်အမာ ငြင်းချက်ထုတ်ခဲ့သည်။

တစ်ရက်ကြာ ကျင်းပသည့် အစည်းအဝေးတွင် အာဆီယံ နိုင်ငံများအပြင် ဩစတြေးလျ၊ နယူးဇီလန်၊ အာဖဂန်နစ္စတန်၊ အီရန်နိုင်ငံများမှ ကိုယ်စားလှယ်များ တက်ရောက်ခဲ့သလို UNHCR၊ IOM အစရှိသည့် နိုင်ငံတကာ အဖွဲ့အစည်းများကလည်း ကိုယ်စားလှယ်များ စေလွှတ်ခဲ့သည်။

ထိုင်းနိုင်ငံခြားရေး ဝန်ကြီးနှင့် ဒုတိယ ဝန်ကြီးချုပ်ဖြစ်သူ တာနာဆက် ပါတီမပ်ရာဂွန်က ယခုအစည်းအဝေးတွင် အဓိက ရည်ရွယ်ချက် သုံးခုကို ဦးတည်အဖြေရှာမည်ဖြစ်ပြီး ယင်းတို့မှာ လက်ရှိ ပင်လယ်ထဲ မျောပါနေသည့် ရွှေ့ပြောင်းလုပ်သားများကို အကာအကွယ်ပေးရန်၊ လူမှောင်ခိုမှုနှင့် လူကုန်ကူးမှုများကို ကာကွယ်တားဆီးရန်နှင့် မူမှန်မဟုတ်သည့် ရွှေ့ပြောင်းမှုများအတွက် အရင်းအမြစ်ကို ရှာဖွေရန်တို့ဖြစ်ကြောင်း ပြောကြားခဲ့သည်။

.. https://www.facebook.com/MyanmarExpress
 

Posted in: မြန်မာ-ကုလား အဓိကရုဏ်းများ