စတုတ္ထမဏ္ဍိုင်နှင့် ၂၀၁၅ အထွေထွေရွေးကောက်ပွဲ

  

၂၀၁၅ ခုနှစ်အထွေထွေရွေးကောက်ပွဲကြီးကို လာမယ့် နိုဝင်ဘာလ ၈ ရက်နေ့မှာ ကျင်းပတော့မှာဖြစ်ပါတယ်။ ဥပဒေပြုရေး မဏ္ဍိုင်နဲ့ အုပ်ချုပ်ရေး မဏ္ဍိုင်မှ တာဝန်ရှိသူအားလုံးနီးပါးဟာ ကိုယ်စားလှယ်လောင်း ဝင်ရောက်ယှဉ်ပြိုင်ကြမယ့်သူတွေ ဖြစ်တာကြောင့် အထိုက်အလျောက် နှေးကွေး ရပ်တန့်သွားပါလိမ့်မယ်။ ရွေးကောက်ပွဲကာလမှာ အဓိက အလုပ်လုပ်ရမယ့်သူတွေကတော့ ရွေးကောက်ပွဲကော်မရှင်နဲ့ မီဒီယာ တို့ပဲဖြစ်ပါတယ်။ ရွေးကောက်ပွဲမှာ မီဒီယာရဲ့ အခန်းကဏ္ဍက ကော်မရှင်ထက် အလုပ်ပိုများသလို အများကြီးလည်း အရေးကြီးပါတယ်။

မြန်မာနိုင်ငံမှာ ၄၈-၆၂ ပါလီမန်ဒီမိုကရေစီခေတ်ကာလတုံးက လွတ်လပ်တဲ့ သတင်းမီဒီယာများရှိပေမယ့် ဘက်လိုက်မှု ကင်းတယ်။ မီဒီယာကျင့်ဝတ်များနဲ့ ညီတယ်လို့တော့ မဆိုနိုင်ပါဘူး။ ဒီနောက်မှာတော့ ပြည်တွင်းမီဒီယာ များဟာ အစိုးရရဲ့ တင်းကြပ်တဲ့ ထိန်းချုပ်မှုအောက်မှာ နေခဲ့ရပါတယ်။ ၂၀၀၅ နောက်ပိုင်းမှာ ပြည်တွင်း မီဒီယာတွေဟာ အရင်ကထက်စာရင် စီးပွားရေး၊ လူမှုရေးသတင်းတွေကိုပိုပြီး လွတ်လွတ်လပ်လပ် ရေးလာနိုင်တယ်။ ပုဂ္ဂလိက ဂျာနယ်လောက ဖွံ့ဖြိုးလာတယ်ဆိုပေမယ့် ဒီမိုကရေစီစံတော့ အပြည့်အ၀ မရသေးပါဘူး။ သို့သော် ဆန္ဒခံယူပွဲကာလ၊ အခြေခံဥပဒေ အတည်ဖြစ်လာရင် ပေါ်လာမယ့် ရွေးကောက်ပွဲ ကာလများကြရင် ယခုထက်ပိုပြီး လွတ်လပ်ခွင့် တွေပေးရတော့မှာပါပဲ။ အဲဒီအချိန်ကျရင် ဒီမိုကရေစီနဲ့ ကျင့်သားမရသေးတဲ့ စာနယ်ဇင်းမိတ်ဆွေများ ရုတ်တရက်ရလာတဲ့ လွတ်လပ်ခွင့်ကို အကျိုးရှိအောင် ဘယ်လို သုံးကြမှာလဲလို့ စဉ်းစားရပါမယ်။ 

ပြည်သူတွေ ပြောရေးဆိုခွင့်ရှိတယ်ဆိုရင် လွတ်လပ်မှုရှိတယ်လို့ဆိုပါတယ်။ အစိုးရက ပြည်သူတွေ ပြောဆိုတာကို အလေးထားနားထောင်ရင် ဒီမိုကရေစီရှိတယ်လို့ဆိုတယ်။ ပြည်သူတွေပြောတာကို အစိုးရက ကြားအောင်လုပ်ပေးတာက မီဒီယာဖြစ်တယ် ဆိုတဲ့ အဆိုတစ်ခုမှတ်သားဖူးပါတယ်။ ဒါ့ကြောင့် ဒီမိုကရေစီ စနစ်မှာ မီဒီယာက အဓိကမဏ္ဍိုင် တစ်ခုအဖြစ်နဲ့ ပါနေတာပေါ့။

ဒါပေမယ့် မီဒီယာတွေဟာ လွတ်လပ်စွာထုတ်ဖော်ရေးသားခွင့်ရှိရုံနဲ့ မလုံလောက်ပါဘူး။ ပြည်သူ တွေအတွက် ဘက်မလိုက်ဘဲ ယုံကြည်စိတ်ချရတဲ့ သတင်းတွေကို ပေးနိုင်ဖို့လည်းလိုပါတယ်။ ကွဲပြားခြားနားတဲ့ အမြင်အမျိုးမျိုးကို တင်ပြနိုင်ရမယ်။

အဲဒီတော့ မှန်ကန်တဲ့ မီဒီယာသမားတစ်ယောက်က ဒီအချက်တွေနဲ့ ပြည့်စုံဖို့ လိုပါတယ်။ (၁) တိကျမှန်ကန်မှု Accuracy ၊ (၂) သမာသမတ်ကျခြင်း Impartility ၊ (၃) တာဝန်သိတတ်ခြင်း Responsibility။ 

မီဒီယာများရဲ့ ယုံကြည်စိတ်ချရမှုနဲ့ ဘက်မလိုက်မှုများဟာ ရွေးကောက်ပွဲကာလမှာ ပိုပြီးအရေးကြီးပါတယ်။ မီဒီယာတွေကတစ်ဆင့် ပြည်သူတွေဟာ နိုင်ငံတကာလူ့အခွင့်အရေး ကြေညာစာတမ်းမှာပါတဲ့ လွတ်လပ်စွာပြောဆိုခွင့်ဆိုတဲ့ အခွင့်အရေးကို အသုံးချနိုင်ပါတယ်။ မီဒီယာကပေးတဲ့ သတင်း အချက်အလက်တွေက ပြည်သူတွေကို သူတို့ရဲ့ ဒီမိုကရေစီ အခွင့်အရေးဖြစ်တဲ့ မဲပေးရွေးချယ်မှုကို မှန်မှန်ကန်ကန် ကျင့်သုံးနိုင်အောင် အကူအညီ ပေးနိုင်ပါတယ်။ ဒါပေမယ့် မီဒီယာတွေဟာ တရားမျှတတဲ့ ရွေးကောက်ပွဲဖြစ်စေဖို့အတွက် ခိုင်မာတဲ့ သတင်းအချက်အလက်တွေကို ပေးတာအပြင် အောက်ပါအချက်နှစ်ချက်ကိုလဲ လိုက်နာဖို့လိုပါတယ်။

ပထမတစ်ချက်ကတော့ ရွေးကောက်ပွဲကာလမှာ တစ်ခုထက်ပိုတဲ့ နိုင်ငံရေးပါတီတွေ ပါဝင်သလို ပြည်သူတွေ သတင်းရနိုင်တဲ့ မီဒီယာဟာလည်း တစ်ခုထက်မက ရှိသင့်ပါတယ်။ ဒါမှသာ ပြည်သူတွေအနေနဲ့ ကွဲပြားခြားနားတဲ့ သတင်းအချက်အလက်များကို ရရှိနိုင်မှာပါ။

ဒုတိယအချက်ကတော့ မီဒီယာများရဲ့ လွတ်လပ်မှုဖြစ်ပါတယ်။ မီဒီယာများဟာ အစိုးရရဲ့ ချုပ်ချယ်ကန့်သတ်မှုများ လွတ်ကင်းဖို့လိုအပ်သလို ပါတီတစ်ခု၊ အုပ်စုတစ်ခု၊ ဒါမှမဟုတ် အထူးအကျိုးစီးပွားတစ်ခုကို ကိုယ်စားပြုသူများကနေ သတင်းဖော်ပြမှုများအပေါ် ကန့်သတ်ခြင်း၊ ခြိမ်းခြောက်ခြင်း၊ ပိတ်ဆို့ခြင်း၊ သေးသိမ်အောင် ဆောင်ရွက်ခြင်းတို့ကနေ ကင်းလွတ်ဖို့လိုပါတယ်။ ဆိုလိုတာကတော့ မီဒီယာများရဲ့ လွတ်လပ်ခွင့်ဆိုတာ အစိုးရနဲ့သာမက အတိုက်အခံများ၊ စီးပွားရေး သမားများအပါအ၀င် အထူးအကျိုးစီးပွားတစ်ခုကို ကိုယ်စားပြုတဲ့ အဖွဲ့အစည်းများရဲ့ နှောင့်ယှက်မှုကနေ ကင်းလွတ်ခြင်း ဖြစ်တယ်လို့ဆိုလိုတာပါ။

ဒီအချက်အလက်တွေနဲ့ ပြည့်စုံဖို့အတွက် အစိုးရက ရွေးကောက်ပွဲကာလမှာ မီဒီယာများကို ကြီးကြပ်ဖို့အတွက် သီးခြားလွတ်လပ်တဲ့ အဖွဲ့အစည်းတစ်ခု ဖွဲ့ပေးတာ၊ ဥပဒေနဲ့ အကာအကွယ်ပေးတာများကို လုပ်ပေးဖို့လိုပါတယ်။

အဲဒီလို လွတ်လပ်တဲ့မီဒီယာတွေက ရွေးကောက်ပွဲကာလမှာ ဘယ်လိုသတင်းအချက်အလက်တွေကို ပြည်သူတွေ အတွက်သတင်းပေးမလဲ။ ယေဘုယျအားဖြင့် မီဒီယာတွေက နိုင်ငံရေးပါတီများနဲ့ လွှတ်တော်အမတ်လောင်းများအကြောင်း၊ ပါတီအသီးသီးက တင်ပြတဲ့ မူဝါဒများ ၊ မဲပေးမှုအခြေအနေ ၊ ဒီလိုသတင်းအချက်အလက်တွေကို ပေးနိုင်ဖို့အတွက် လွတ်လပ်တဲ့ မီဒီယာပတ်ဝန်းကျင် အခြေအနေတစ်ရပ်ရှိဖို့ လိုသလို မီဒီယာသမားတွေရဲ့ အရည်အချင်း ပြည့်ဝမှု၊ မီဒီယာကျင့်ဝတ်မှုများကို လိုက်နာမှုများကလည်း အရေးကြီးပါတယ်။ 


ဒေါက်တာမျိုးချစ်
 
.. https://www.facebook.com/MyanmarExpress
 

Posted in: ဘာလဲဟဲ့ စတုတ္ထမဏ္ဍိုင်,ဆောင်းပါး,ရွေးကာက်ပွဲသတင်း