ကချင်ပြည်နယ် ငြိမ်းချမ်းရေးအတွက် နိုင်ငံရေးနည်းလမ်းဖြင့် ဆွေးနွေးအဖြေရှာမှု ဘယ်တော့မှ လက်မလျှော့ဟု မြန်မာ့ ငြိမ်းချမ်းရေး ဖခင် ဦးအောင်မင်း ပြောကြား

From : 7day

အစိုးရတပ်မတော်နှင့် ကေအိုင်အေတို့ကြား တိုက်ပွဲများပြင်းထန်စွာ ဖြစ်ပွားနေသော်လည်း ကေအိုင်အို၊ ကေအိုင်အေနှင့် ငြိမ်းချမ်းရေးရရှိရန် နိုင်ငံရေးနည်းလမ်းဖြင့် ဆွေးနွေးအဖြေရှာမှုကို မဖြစ်ဖြစ်အောင် ဆောင်ရွက်မည်ဟု
ကတိပေးကြောင်း ပြည်ထောင်စုငြိမ်းချမ်းရေး ဖော်ဆောင်ရေးလုပ်ငန်း ကော်မတီ ဒုဥက္ကဋ္ဌ ပြည်ထောင်စုဝန်ကြီး ဦးအောင်မင်းက ဇန်န၀ါရီ ၁ ရက်တွင် ပြောကြားလိုက်သည်။

“ကတိပေးတယ်ဗျာ။ ဖြစ်အောင်လုပ်မယ်။ ဘယ်တော့မှ မလျှော့ဘူး။ တပ်အတွက်လည်း မဟုတ်ဘူး။ အစိုးရအတွက်လည်း မဟုတ်ဘူး။ ပြည်သူသန်း ၆၀ အတွက်၊ စစ်ဆိုတာ ကောင်းမှ မကောင်းတာဗျာ” ဟု ၀န်ကြီး ဦးအောင်မင်းက ပြောသည်။

ကေအိုင်အိုအဖွဲ့မှလွဲ၍ ကျန်အပစ်အခတ်ရပ်စဲထားသော တိုင်းရင်းသား အဖွဲ့အစည်းများနှင့်မကြာမီ နိုင်ငံရေးဆွေးနွေးပွဲများ စတင်တော့မည်ဖြစ်ရာ ထိုဆွေးနွေးပွဲများတွင် ကေအိုင်အိုကိုပါ ပါဝင်လာအောင် ဆောင်ရွက်သွားမည်ဟု ၀န်ကြီးဦးအောင်မင်းက ဆိုသည်။

“အပြန်အလှန်တိုက်ရင်းနဲ့ အမှတ်တစ်ခုကို ရောက်တော့မယ်။ အဲဒီအမှတ်က ဒီထက်တက်လာမယ်ဆိုရင် အကြီးအကျယ် ပိုပြီးပြဿနာဖြစ်လာနိုင်တဲ့ အနေအထားရှိတယ်။ လူမျိုးရေးအမြင်မျိုးတွေ ပိုကြီးလာမှာကိုလည်း စိုးရိမ်တယ်” ဟု ပဋိပက္ခရေးရာ ကျွမ်းကျင်သူ၊ ငြိမ်းချမ်းရေးစင်တာမှ အပစ်အခတ်ရပ်စဲရေး ဒါရိုက်တာ ဒေါက်တာမင်းဇော်ဦးကပြောသည်။
ထို့အပြင် ဒေါက်တာမင်းဇော်ဦးက စစ်ပွဲများဖြင့် ငြိမ်းချမ်းရေးရရန် မလုပ်နိုင်ကြောင်း၊ တွေ့ဆုံဆွေးနွေး ညှိနှိုင်းခြင်း နည်းဖြင့်သာ ငြိမ်းချမ်းရေးဖော်ဆောင်နိုင်ကြောင်း ပြောသည်။ လက်ရှိ အခြေအနေတွင် မြန်မာ့တပ်မတော်နှင့် ကေအိုင်
အေတို့ကြားစစ်ရှိန်လျှော့ချနိုင်ရန်မှာ တွေ့ဆုံဆွေးနွေးမှုအဆင့်သို့သွားရန် အရေးကြီးသောအဆင့်ဖြစ်ကြောင်း ပြော သည်။

၂၀၁၂ ဒီဇင်ဘာလ နောက်ဆုံးပတ်အတွင်း ကေအိုင်အိုဌာနချုပ်အနီးတွင် တိုက်ပွဲများ ပြင်းထန်လာခဲ့ပြီး လက်နက်ကြီးများဖြင့် အပြန်အလှန်ပစ်ခတ်ခဲ့ကြသည်။

နိုင်ငံတော်သမ္မတ ဦးသိန်းစိန်က ကေအိုင်အိုဌာနချုပ် တည်ရှိရာ လိုင်ဇာမြို့ကို မသိမ်းရန် တပ်မတော်ကို မှာကြားထားကြောင်း ၀န်ကြီးဦးအောင်မင်းကဆိုသည်။

သမ္မတ ဦးသိန်းစိန် လက်ထက်တွင် တိုင်းရင်းသားလက်နက်ကိုင် ၁၀ ဖွဲ့နှင့် အပစ်အခတ် ရပ်စဲရေး သဘောတူနိုင်ခဲ့သော်လည်း ကေအိုင်အိုနှင့်မူ အပစ်အခတ်ရပ်စဲရေး သဘောတူညီမှု မရသေးဘဲ တိုက်ပွဲများဖြစ်ပွားခဲ့သည်မှာ တစ်နှစ်နှင့်ခြောက်လကျော် ကြာခဲ့ပြီဖြစ်သည်။

  www.MyanmarExpress.net
 

Posted in: တိုက်ပွဲသတင်း,သတင်း