ဝေဖန်မှုများရှိနေသည့် ကုလလူ့အခွင့်အရေးဆိုင်ရာ အထူးသံတမန်၏ ရခိုင်ခရီးစဉ်

From :Myit Makha Mediagroup 

ကုလသမဂ္ဂလူ့အခွင့်အရေးဆိုင်ရာ အထူးသံတမန် မစ္စတာ တွမ်မတ်အိုဂျီးယား ကွင်တားနားအနေဖြင့် ရခိုင်ပြည်နယ်ခရီးစဉ်တွင် ဘင်္ဂလီများဘက်မှ ရပ်တည်မှုပြုခဲ့သည်ဟု ဒေသခံများကဝေဖန်ကြသည်။

ဖေဖော်ဝါရီလ(၁၁)ရက်နေ့က ရခိုင်ပြည်နယ်ရှိခဲ့သည့် မစ္စတာကွင်တားနားမှာ ဒုက္ခသည်စခန်းများနှင့် အကျဉ်းထောင်များသို့ သွားရောက်ခဲ့စဉ် ဘင်္ဂလီများဘက်မှ ရပ်တည်ခဲ့သည်ဟု ဝေဖန်ချက်များထွက်ပေါ်ခဲ့ခြင်းဖြစ်သည်။

မစ္စတာ ကင်တားနားသည် ခရီးစဉ်အတွင်း ဒုက္ခသည်များအရေးထက် ၁၉၈၂ ခုနှစ် နိုင်ငံသားဥပဒေ အကြောင်းကို ပို၍ အလေးပေးမေးမြန်းခဲ့သည်ဟု ခရီးစဉ်အတွင်းလိုက်ပါခဲ့သည့် ဒေသခံတစ်ဦးက ပြောကြားခဲ့သည်။

၁၉၈၂ ခုနှစ် နိုင်ငံသားဥပဒေနှင့် ဥပဒေပြင်ဆင်ချက်များအကြောင်း၊ ဘင်္ဂလီတို့၏ နိုင်ငံသားခံယူနိုင်ခွင့် အကြောင်းများ ကို ပြည်နယ်ဝန်ကြီးချုပ် ဦးလှမောင်တင်အား မစ္စတာ ကွင်တားနားက မေးမြန်းရာ ပြည်နယ် ၀န်ကြီးချုပ်က   နိုင်ငံသားဟုတ်/မဟုတ် စစ်ဆေးဆုံးဖြတ်သည့် အလုပ်အား လူဝင်မှုကြီးကြပ် ရေးဝန်ကြီးဌာနက   ဆောင်ရွက်နေခြင်းဖြစ်ကြောင်း ပြန်လည်ရှင်းလင်းပြောကြားခဲ့သည်။

ပြည်နယ်ဥပဒေချုပ် ဦးလှသိန်းကလည်း ၁၉၈၂ ခုနှစ် နိုင်ငံသားဥပဒေနှင့် ပတ်သက်သည့် ကိစ္စအ၀၀မှာ လွှတ်တော်က ဆုံးဖြတ်ဆောင်ရွက်သွားရမည့် ကိစ္စဖြစ်ကြောင်း မစ္စတာကင်တားနား အား ရှင်းပြခဲ့သည်။

အကြမ်းဖက်မှုများဖြစ်ပွားစဉ်ကာလအတွင်း ကုလသမဂ္ဂ ၀န်ထမ်းတစ်ဦးဖြစ်သော ဒေါက်တာ ထွန်းအောင်အပါအ၀င် ဖမ်းဆီးထိန်းသိမ်းခံထားရသည့် အကျဉ်းသားများ၏ အခြေအနေများကို မေးမြန်းရာတွင် အကျဉ်းသားများ အနေဖြင့် ဥပဒေနှင့်အညီ မိမိကိုယ်မိမိ ခုခံကာကွယ်ပိုင်ခွင့် ရှိသည့်အပြင် တရားရုံးများတွင်လည်း အများပြည်သူရှေ့မှောက်၌ စီရင်ဆုံးဖြတ်ခြင်းဖြစ်ကြောင်း ပြည်နယ်ဥပဒေချုပ်က ဖြည့်စွက်ရှင်းပြခဲ့သည်။

 “ကုလသမဂ္ဂရဲ့ အရေးယူဆောင်ရွက်မှုတွေနဲ့ ပတ်သက်ပြီး မကျေနပ်ကြလို့ ရခိုင်အမျိုးသားတွေ ဆန္ဒပြကြတဲ့ သတင်းကို လူ့အခွင့်အရေးဆိုင်ရာ သံတမန်တစ်ယောက်အနေနဲ့ ကျွန်တော်ကြားပြီးပါပြီ။ ရခိုင်အရေးနဲ့ပတ်သက်ပြီး  ကုလသမဂ္ဂရဲ့ တရားမျှတတဲ့ဆုံးဖြတ်ချက်ကို နားလည်စေချင်ပါတယ်။” ဟု မစ္စတာကွင်တားနားက ပြောဆိုခဲ့သည်။

ရခိုင်ပြည်နယ်မှ ပြည်သူများအတွက် လူ့အခွင့်အရေးနှင့်ပတ်သက်သည့် သင်တန်းများ လာရောက် ပို့ချပေးရန်  ကုလသမဂ္ဂမှ စီစဉ်ဆောင်ရွက်နေကြောင်း မစ္စတာကွင်တားနားခရီးစဉ်အတွင်း လိုက်ပါလာသည့် ကုလသမဂ္ဂ အဖွဲ့အစည်းများ ဆိုင်ရာ မြန်မာနိုင်ငံဌာနေ ကိုယ်စားလှယ် မစ္စတာ အရှော့ နစ်ဂမ်က ပြောကြားခဲ့သည်။

သို့သော် မစ္စတာကွင်တားနားမှာ ၄င်း၏ခရီးစဉ်အတွင်း ဒုက္ခသည်များ ပြန်လည် ထူထောင်ရေး ကိစ္စထက် အကြမ်းဖက် မှုဖြစ်စဉ်များကိုသာ အဓိက အလေးပေးမေးမြန်းခဲ့သည်ဟု သတင်းများ ထွက်ပေါ်ခဲ့ကြောင်းကိုလည်း သိရသည်။

ရခိုင်ဒုက္ခသည်များနှင့်တွေ့ဆုံရာတွင် ရခိုင်ဒုက္ခသည်များ၏နေရပ်၊ မီးလောင်မှုဖြစ်ပွားခဲ့ပုံ၊ မည်သူက မည်သည့် အတွက်ကြောင့် ရှို့ရခြင်းဖြစ်ကြောင်း စသည်တို့ကို မေးမြန်းခဲ့သည်ဟုဆိုသည်။

ဘင်္ဂလီဒုက္ခသည်များနှင့် တွေ့ဆုံရာ၌မူ မစ္စတာကွင်တားနားသည် ဘင်္ဂလီဒုက္ခသည်များအား ဒုက္ခသည်စခန်း များတွင် နေထိုင်ရာတွင် အဆင်ပြေ/မပြေ၊ ဘင်္ဂလီတို့၏ လူမျိုးအမည်၊ ဘင်္ဂလီတို့ ရခိုင်ပြည်နယ်အတွင်း    ရောက်ရှိနေထိုင်ခဲ့သည့် ကာလနှင့် အကြမ်းဖက်မှုဖြစ်စဉ်များ စတင် ဖြစ်ပေါ်ခဲ့ပုံတို့ကို မေးမြန်းခဲ့ကြောင်း ခရီးစဉ်အတွင်းလိုက်ပါခဲ့သော ဒေသခံတို့၏ ပြောကြားချက် များအရ သိရသည်။

 “မြေပုံမြို့နယ်က ဒုက္ခသည်စခန်းကိုရောက်တော့ ကွင်တားနားက ဒုက္ခသည်တစ်ယောက်ကို ဘာလူမျိုးလဲ လို့မေးတယ်။ ဒုက္ခသည်ကလည်း သူ့ကိုယ်သူ မူဆလင်လို့ဖြေတယ်။ အဲဒီအချိန်မှာ ကွင်တားနားက မူဆလင်ဆိုတာ လူမျိုးမဟုတ်ဘူးလေ၊ ဘာသာကို ပြောတာ။ ခင်ဗျားက ဘာလဲ၊ ရိုဟင်ဂျာလား၊ ရိုဟင်ဂျာမဟုတ်ဘူးလားလို့ နိမိတ်ြပမေးခွန်းနဲ့ ခဏခဏမေးတယ်။ ဒါနဲ့ မူဆလင် ဒုက္ခသည်တွေလည်း အူကြောင်ကြောင်ဖြစ်ကုန်ကြပြီး ဟုတ်တယ်၊ ကျွန်တော်တို့ ရိုဟင်ဂျာပဲ ဖြစ်ကုန် ကြရော။” ဟု အဆိုပါခရီးစဉ်အတွင်းလိုက်ပါလာသော အမည်မဖေါ်လိုသူ ဒေသခံတစ်ဦးက ပြောသည်။  

ကြိမ်နီပြင်ကျေးရွာရှိ ဒုက္ခသည်စခန်းသို့ရောက်ရှိသည့်အချိန်တွင် မစ္စတာကွင်တားနားက သတင်းထောက်များနှင့် ဓါတ်ပုံဆရာများကို စခန်းတွင်းသို့ဝင်ခွင့်မပေးဘဲ အပြင်ဘက်တွင် ထားခဲ့သည်ဟု သိရသည်။

 “မစ္စတာကွင်တားနားနဲ့အဖွဲ့ ကြိမ်နီပြင်စခန်းကိုရောက်တော့ ကျွန်တော်တို့ကို ဓါတ်ပုံရိုက်ခွင့် မပေးတော့ဘူး။ ဒါ့ကြောင့် သူတို့ ဒုက္ခသည်တွေနဲ့စကားပြောနေကြတာကို စခန်းအပြင်ဘက်ကပဲ ငေးကြည့်ခဲ့ရတယ်။” ဟု ဒေသခံ သတင်းထောက် တစ်ယောက်ကပြောပြသည်။

မစ္စတာကင်တားနားမှာ ခရီးစဉ်အတွင်းတွေ့ရှိချက်များနှင့်ပတ်သက်၍ ဖေဖေါ်ဝါရီလ ၁၆ ရက် ညနေ ၅ နာရီခန့်က ရန်ကုန်အပြည်ပြည်ဆိုင်ရာလေဆိပ်၌ သတင်းစာရှင်းလင်းပွဲပြုလုပ်ခဲ့သည်။

သတင်းစာရှင်းလင်းပွဲ၌ မစ္စတာကွင်တားနားက မြန်မာနိုင်ငံတွင် လူ့အခွင့်အရေးချိုးဖေါက်မှုများ ရှိနေသည့်အလျှောက်   နိုင်ငံသားအားလုံးလူ့အခွင့်အရေး အပြည့်အ၀ရရှိရေးအတွက် ၁၉၈၂ ခုနှစ် နိုင်ငံသားအက်ဥပဒေ ကို ပြင်ဆင်ရန်လိုအပ်သည် ဟုပြောဆိုခဲ့သည်။

 “ မြန်မာနိုင်ငံမှာ အကြမ်းဖက်မှုဖြစ်စဉ်တွေကြောင့် ကယ်ဆယ်ရေးစခန်းတွေမှာ ရောက်နေတဲ့ ဒုက္ခသည် ၁၂၀,၀၀၀ နီးပါးရှိပါတယ်။ အဲဒီဒုက္ခသည်တွေအတွက် လိုအပ်တဲ့ စားနပ်ရိက္ခာ၊ ရေ နဲ့ အဆောက်အဦးတွေ ထောက်ပံ့ပေးဖို့ အစိုးရတာဝန်ရှိ ပုဂ္ဂိုလ်များနဲ့ တွေ့တဲ့အချိန်မှာ ကျွန်တော်တို့ တိုက်တွန်းပြောဆိုခဲ့ပြီးပါပြီ။ ဒါပေမဲ့ ရခိုင်ဒေသခံတွေရဲ့ ခြိမ်းခြောက်မှုကြောင့် မူဆလင်ဒုက္ခသည်တွေ ကျန်းမာရေးစောင့်ရှောက်မှု ပြည့်ပြည့်၀၀ မရရှိတာကိုလည်း တွေ့ခဲ့ရတယ်။ ဒီလိုခြိမ်းခြောက်မှုတွေ ကြောင့် လူ့အခွင့်အရေး လက်လွတ်ဆုံးရှုံးမှုတွေ ဖြစ်ပေါ်စေတဲ့အတွက်   ဒီခြိမ်းခြောက်မှုမျိုးတွေကို ရှင်းလင်းဖယ်ရှားပစ်ဖို့ အစိုးရကို တိုက်တွန်းချင်ပါတယ်။” ဟု မစ္စတာကွင်တားနားက ပြောသည်။

ရခိုင်ဒေသခံ ဒုက္ခသည်များနှင့် ဘင်္ဂလီ ဒုက္ခသည်များအား အကူအညီပေးရာတွင် မျှမျှတတ မရှိသမျှ ကာလပတ်လုံး   ဒေသတွင်းပဋိပက္ခများ ဆက်လက်ဖြစ်ပွားနိုင်ကြောင်း မစ္စတာကွင်တားနားမှ ဖြည့်စွက်ပြောဆိုခဲ့သည်။

အစိုးရနှင့် ကေအိုင်အေကြား အပစ်အခတ်ရပ်စဲရေးသဘောတူညီချက် ခိုင်ခိုင်မာမာ ပေါ်ထွက်လာရန် နိုင်ငံရေးအရ သဘောတူညီချက်များရရှိအောင် ဆောင်ရွက်သွားသင့်ကြောင်းနှင့် လတ်တလော ဆွေးနွေးမှု အခြေအနေများကို အကဲခတ်ခြင်းအားဖြင့် ကချင်ပြည်နယ်ငြိမ်းချမ်းရေးအတွက် တိုးတက် လာသည့် အလားအလာကောင်း များကို တွေ့ရကြောင်းလည်း ပြောကြားခဲ့သည်။

ထို့အပြင် နိုင်ငံသားအားလုံး နိုင်ငံသားအခွင့်အရေးများကို အညီအမျှခံစားနိုင်ရေးအတွက် ၁၉၈၂ ခုနှစ် နိုင်ငံသား အက်ဥပဒေကို ပြင်ဆင်ရန်လိုအပ်ကြောင်း ပြောကြားခဲ့သည်။

 “မစ္စတာ ကွင်တားနားအနေနဲ့ လူ့အခွင့်အရေးကို အကြောင်းပြပြီး နိုင်ငံသား အက်ဥပဒေနဲ့ဆိုင်တဲ့ ကိစ္စတွေမှာ ၀င်ပြီး မစွက်ဖက်သင့်ဘူးလို့ထင်တယ်။ အစိုးရကလည်း ဒီလို ၀င်ရောက် စွက်ဖက်တဲ့ကိစ္စမျိုးကို ခွင့်မပြုသင့်ဘူးဗျ။” ဟု လှိုင်မြို့နယ်နေ ပြည်သူတစ်ဦးက သုံးသပ် ပြောကြား ခဲ့သည်။

မစ္စတာကင်တားနား၏ ခရီးစဉ်အတွင်း ကချင်ပြည်နယ်နှင့် ရခိုင်ပြည်နယ်ရှိကယ်ဆယ်ရေးစခန်းမှ ဒုက္ခသည်များအပြင် ပြည်ထဲရေးဝန်ကြီးဌာန ၀န်ကြီး၊ ပြည်နယ် အစိုးရ၊ ၈၈ မျိုးဆက်ကျောင်းသားများ၊ ဘာသာရေး ခေါင်းဆောင်များနှင့်လည်း တွေ့ဆုံခဲ့သည်။

  www.MyanmarExpress.net

Posted in: မြန်မာ-ကုလား အဓိကရုဏ်းများ,သတင်း