ဆီးရီးယားပြည်တွင်းစစ်တွင် ရုရှားနိုင်ငံမှ အစိုးရကို ကူညီ ၍ EU မှ အတိုက်အခံကို ကူညီ

From : ..voa

နိုင်ငံရပ်ခြားက ဆီးရီးယားအပေါ် စစ်ရေးအရ ကျူးကျော်ဝင်ရောက်လာလျှင် တုံ့ပြန်ကာကွယ်ဖို့ အဆင့်မြင့် ဝေဟင်ပစ် မစ်ဇိုင်းဒုံးကျည်တွေ ဆီးရီးယားနိုင်ငံကို ပေးအပ်မှာဖြစ်ကြောင်း ထိပ်တန်း ရုရှားသံတမန်တစ်ဦးက ပြောကြားခဲ့ပါတယ်။

ရုရှား လက်ထောက် နိုင်ငံခြားရေးဝန်ကြီး ဆာဂေ လဗ်ရော့ဗ် (Sergei Ryabkov) က အဆင့်မြင့် S-300 လေယာဉ်ပစ် ဒုံးကျည်တွေကို ပေးပို့သွားမယ့်အကြောင်း အင်္ဂါနေ့က ပြောဆိုခဲ့ပြီး ဒါဟာ ဆီးရီးယားနိုင်ငံ တည်ငြိမ်မှုအတွက် ဖြစ်လိမ့်မယ်ဆိုပြီး ပြောပါတယ်။

မော်စကိုအနေနဲ့ ဒီလို လုပ်တာဟာ ဆီးရီးယားနိုင်ငံက ပဋိပက္ခတွေ ရပ်တန့်အောင် နိုင်ငံတကာက စစ်ရေးအရ ၀င်ရောက် စွက်ဖက်လာမှာကို တားဆီးနိုင်လိမ့်မယ်ဆိုပြီး ယုံကြည်တဲ့အကြောင်း သတင်းထောက်တွေနဲ့ တွေ့ဆုံစဉ်  ပြောခဲ့တာပါ။ ဒါပေမဲ့ ဒီလေကြောင်း ကာကွယ်ရေး လက်နက်တွေကို ဘယ်ချိန်မှာ ပေးပို့မလဲ ဆိုတာကိုတော့ ရည်ညွှန်းပြောဆိုတာမျိုး မရှိပါဘူး။

ဒမတ်စကတ်က ဒီလက်နက်တွေ ရုရှားနိုင်ငံဆီက ၀ယ်ယူဖို့ လွန်ခဲ့တဲ့ နှစ် အတော်ကြာကတည်းက စာချုပ် ချုပ်ထားခဲ့တာပါ။

ဆီးရီးယားနိုင်ငံရဲ့ ဒီလေကြောင်း ကာကွယ်ရေးစနစ်ဟာ  အစ္စရေးလ်နိုင်ငံရဲ့ လုံခြုံရေးကို ခြိမ်းခြောက်နိုင်သလို ဆီးရီးယားနိုင်ငံတွင်း စစ်ရေးအရ ၀င်ရောက်ဖို့ လိုအပ်တဲ့အချိန်မှာ ရှုတ်ထွေးမှုတွေ ဖြစ်နိုင်တဲ့အတွက် အစ္စရေးလ်နဲ့ အမေရိကန်ဘက်က ရုရှားအနေနဲ့  ဒီလိုလက်နက်ရောင်းဝယ်ဖို့ ကိစ္စကို ဆက်ပြီး မလုပ်ဖို့  တိုက်တွန်းထားတာပါ။

အစ္စရေးလ် ကာကွယ်ရေးဝန်ကြီး မိုရှေ ယလွန်း (Moshe Yaalon) က တကယ်လို့  ဒီလေကြောင်း ကာကွယ်ရေး လက်နက်တွေကို တင်ပို့မယ်ဆိုရင် အစ္စရေးလ်အနေနဲ့ ဘယ်လို တုံ့ပြန်ရမယ်ဆိုတာ သိတဲ့အကြောင်း အင်္ဂါနေ့က ပြောပါတယ်။

ခုချိန်ထိတော့ ဒီလက်နက်တွေ တင်ပို့တာ မရှိသေးဘူးလို့လည်း သူက ပြောပါတယ်။ 

ဆီးရီးယား အတိုက်အခံတွေကို စစ်ရေးအရ အထောက်အကူ ဖြစ်စေနိုင်တဲ့ လက်နက်တင်ပို့မှု တားမြစ်ချက်ကို ပြင်ဆင်ရေး အဖွဲ့ဝင် ၂၇ နိုင်ငံ ပါဝင်တဲ့ ဥရောပသမဂ္ဂ (EU) က သဘောတူလိုက်တဲ့အကြောင်း ဗြိတိန်နိုင်ငံခြားရေးဝန်ကြီး ၀ီလျံ ဟိတ် (William Hague) က ပြောလိုက်ပါတယ်။

ဆီးရီးယား သူပုန်တွေကို အားပေးရေးအတွက် သဘောထား ကွဲလွဲမှုတွေ ပေါ်ပေါက်ခဲ့ရာက ဘယ်လ်ဂျီယံနိုင်ငံ ဘရတ်ဆဲလ်မြို့မှာ အချေအတင် ဆွေးနွေးပြီး တနင်္လာနေ့ကပဲ သဘောတူလိုက်ကြတာပါ။

ဗြိတိန်နဲ့ ပြင်သစ်နိုင်ငံတို့က ဆီးရီးယား အတိုက်အခံ တပ်ဖွဲ့တွေကို လက်နက် ထောက်ပံ့ဖို့ တိုက်တွန်းနေတာ ဖြစ်ပေမဲ့ သြစတြီးယားနဲ့ တခြား EU နိုင်ငံတချို့ကတော့ ဒီအစီအစဉ်ကြောင့် ဆီးရီးယား ပြည်တွင်းစစ် ပိုမို ကြီးထွားလာမှာကို စိုးရိမ်ပြီး ဆန့်ကျင်နေကြတာ ဖြစ်ပါတယ်။

တချိန်တည်းမှာပဲ ဆီးရီးယားနိုင်ငံမှာ ပြည်တွင်းစစ် အဆုံးသတ်စေရေး နိုင်ငံတကာ ညီလာခံတရပ် ကျင်းပဖို့ ကြိုးပမ်းတဲ့အနေနဲ့ အမေရိကန် နိုင်ငံခြားရေးဝန်ကြီး ဂျွန် ကယ်ရီ (John Kerry) နဲ့ ရုရှားနိုင်ငံခြားရေးဝန်ကြီးတို့ ပြင်သစ်နိုင်ငံမှာ တွေ့ဆုံ ဆွေးနွေးခဲ့ကြပေမဲ့ သိသိသာသာ တိုးတက်မှု တစုံတရာတော့ မရခဲ့ကြပါဘူး။

ရှေ့လထဲ ဂျနီဗာမြို့မှာ ညီလာခံကျင်းပရေးဟာ လွယ်ကူလှတဲ့ အစီအစဉ် တစ်ခုတော့ မဟုတ်တဲ့အကြောင်း ရုရှားနိုင်ငံခြားရေးဝန်ကြီး ဆာဂေ လဗ်ရော့ဗ် (Sergei Lavrov) က တနင်္လာနေ့ ဆွေးနွေးပွဲ အပြီးမှာပဲ ပြောဆိုလိုက်တာပါ။

ဆွေးနွေးပွဲ အဆိုပြုချက်ကိုတော့ ရုရှားနိုင်ငံက ထောက်ခံမှုပေးထားတဲ့ ဆီးရီးယား အစိုးရက မူအားဖြင့် လက်ခံကြောင်း ပြောဆိုထားပေမဲ့ အမေရိကန်က ထောက်ခံထားတဲ့ အတိုက်အခံတွေ ကြားမှာတော့ သဘောထား ကွဲလွဲမှုတွေ ရှိနေတာကြောင့် တရားဝင် တုံ့ပြန်တာမျိုးတော့ မရှိသေးပါဘူး။

အမေရိကန်နဲ့ သဘောထား ကွဲလွဲနေတဲ့ ကိစ္စတစ်ခုအဖြစ် တွေ့မြင်ခဲ့ရတာကတော့ ပြီးခဲ့တဲ့နှစ်ထဲ ဂျနီဗာမြို့က ဆီးရီးယား ငြိမ်းချမ်းရေး အစီအစဉ်ကို လက်ခံခဲ့ကြတဲ့ အင်အားကြီး နိုင်ငံတွေအပြင် တခြားနိုင်ငံတွေကို ညီလာခံမှာ ထည့်သွင်းဖို့ လိုလားတဲ့အကြောင်း ရုရှားနိုင်ငံခြားရေးဝန်ကြီးက ပြောဆိုခဲ့တာပဲ ဖြစ်ပါတယ်။

ရုရှားထိပ်တန်း သံတမန်ကတော့ အီရန်နိုင်ငံကို ရည်ညွှန်းပြီး ဆီးရီးယားအရေးနဲ့ ပတ်သက်လို့ သြဇာညောင်းသူတွေ အားလုံး ပါဝင်သင့်တယ်လို့ ပြောဆိုခဲ့တာပါ။ ရုရှားနဲ့ အီရန် ၂ နိုင်ငံဟာဆိုရင် ဆီးရီးယား သမ္မတ ဘက်ရှာ အယ်လ် အာဆဒ် (Bashar al-Assad) ရဲ့ နောက်ဆုံး မဟာမိတ် ၂ နိုင်ငံလည်း ဖြစ်ပါတယ်။

ဒီအတောအတွင်း အမေရိကန် ပြည်ထောင်စုက ထိပ်တန်း အထက်လွှတ်တော် အမတ်တစ်ဦးဖြစ်တဲ့ John McCain ဟာ အစိုးရကို ဖြုတ်ချဖို့ ကြိုးပမ်းနေတဲ့ အတိုက်အခံတွေနဲ့ တွေ့ဆုံဖို့အတွက် ရုတ်တရက် ဆီးရီးယားနိုင်ငံကို သွားရောက်ခဲ့ပါတယ်။

လက်ထောက်ဖြစ်သူတွေကတော့ အထက်လွှတ်တော်အမတ် McCain ဟာ တနင်္လာနေ့ကပဲ ဆီးရီးယား လွတ်မြောက်ရေး သူပုန်တပ်ဖွဲ့တွေရဲ့ တပ်မှူးတစ်ဦးဖြစ်တဲ့ ဗိုလ်ချုပ်ကြီး ဆလမ် အီဒရစ် (Salam Idris) နဲ့အတူ အိမ်နီးချင်း တူရကီနိုင်ငံကတဆင့် ဆီးရီးယား နိုင်ငံထဲကို နာရီအတော်ကြာ ၀င်ရောက်ခဲ့တာ ဖြစ်တယ်လို့ ပြောပါတယ်။ 

.. www.MyanmarExpress.net
 

Posted in: ကမ္ဘာ့သတင်း