ဘုရင့်နောင် ခုံးကျော်တံတားနှင့် ရွှေဂုံတိုင် ခုံးကျော်တံတားနှစ်စင်း ရာခိုင်နှုန်း ၉၀ ခန့် ပြီးစီး

From : .. eleven

ရန်ကုန်မြို့ရှိ တည်ဆောက်ဆဲ ခုံးကျော်တံတား စီမံကိန်း နှစ်ခုဖြစ်သည့် ဘုရင့်နောင်နှင့် ရွှေဂုံတိုင် ခုံးကျော်တံတား နှစ်ခုစလုံးမှာ ရာခိုင်နှုန်း ၉၀ ခန့် ပြီးစီးနေပြီဖြစ်ကြောင်း ရန်ကုန်မြို့တော် စည်ပင်သာယာရေး ကော်မတီမှ သိရသည်။

ရန်ကုန်မြို့တွင်း ယာဉ်ကြောပိတ်ဆို့မှုများ ပြေလည်စေရန်အတွက် ယာဉ်ကြောပိတ်ဆို့မှု အများဆုံး ဖြစ်ပွားသည့် လမ်းဆုံများဖြစ်သော လှည်တန်း၊ ရွှေဂုံတိုင်၊ ဘုရင့်နောင်နှင့် တာမွေငါးလမ်းဆုံ မီးပွိုင့်တို့တွင် ခုံးကျော်တံတားများ တည်ဆောက်ရန် စီစဉ်ခဲ့ကြောင်း၊ ထို့နောက် လှည်းတန်းခုံးကျော်တံတားကို စတင်ဆောက်လုပ် ခဲ့ပြီးနောက်ပိုင်း ဘုရင့်နောင်နှင့် ရွှေဂုံတိုင် ခုံးကျော်တံတားများကို ဆက်လက်ဆောက်လုပ် ခဲ့ကြောင်း၊ တာမွေငါးလမ်းဆုံ မီးပွိုင့်မှာမူ ခုံးကျော်တံတား ဆောက်လုပ်ရန် မလိုအပ်ခြင်းကြောင့် မဆောက်လုပ်ဖြစ် ခဲ့တော့ကြောင်း ထုတ်ပြန်ခဲ့သည်။

"ဘုရင့်နောင် ခုံးကျော်တံတား စီမံကိန်းနဲ့ ရွှေဂုံတိုင် ခုံးကျော်တံတား စီမံကိန်း နှစ်ခုစလုံး ၉၀ ရာခိုင်နှုန်းလောက် ပြီးနေပါပြီ။ ဒီနှစ်ကုန်ပိုင်းမှာ အပြီးသတ်နိုင်မှာ ဖြစ်ပါတယ်" ဟု ရန်ကုန်မြို့တော် စည်ပင်သာယာရေး ကော်မတီမှ တာဝန်ရှိသူ တစ်ဦးက ပြောကြားသည်။

လှည်းတန်းခုံးကျော်တံတားအား ရွှေတောင်ကုမ္ပဏီမှ တာဝန်ယူ တည်ဆောက်ခဲ့ကာ ယခုနှစ် ဧပြီလ ၁၀ ရက်တွင် စတင်အသုံးပြုခွင့် ပေးခဲ့ကြောင်း၊ လှည်းတန်းခုံးကျော်တံတား ဆောက်ပြီးသော်လည်း ယင်းအနီးတစ်ဝိုက်သာ ယာဉ်ကြောပိတ်ဆို့မှု ပြေလည်ပြီး တံတားအဆင်းဖြစ်သော စိုက်ပျိုးရေးမှတ်တိုင် အနီးမှ စတင်၍ ယာဉ်များပိတ်ဆို့နေကြောင်း သိရသည်။

ယခု ရွှေဂုံတိုင်နှင့် ဘုရင့်နောင်လမ်းဆုံ ခုံးကျော်တံတား တည်ဆောက်ရေး လုပ်ငန်းခွင်များကြောင့်လည်း အနီးပတ်ဝန်းကျင်များတွင် ယာဉ်ကြောပိတ်ဆို့မှုများ ဆိုးရွားနေပြီး အချိန်များစွာ ကုန်ဆုံးနေရကြောင်း ယာဉ်မောင်းများက ဆိုသည်။ ရွှေဂုံတိုင် ခုံးကျော်တံတား စီမံကိန်းအား နိုဝင်ဘာလ တတိယပတ်တွင် အပြီးတည်ဆောက်မည်ဟု တံတားအား တာဝန်ယူ တည်ဆောက်နေသည့် Capital Development Co.Ltd မှ ထုတ်ပြန်ထားပြီး ယခု လက်ရှိတွင် တံတားဆောက်လုပ်ရေး လုပ်ငန်းများကြောင့် ရွှေဂုံတိုင် မီးပွိုင့်အား ကမ္ဘာအေး ဘုရားလမ်းပေါ်မှ ခရီးသည်တင်ယာဉ်နှင့် ယာဉ်ကြီးများ ဖြတ်သန်းခွင့် ယာယီပိတ်ထား၍ ရှောင်ကွင်းလမ်းများဖြစ်သည့် ရေတာရှည်လမ်း၊ အနောက်ရွှေဂုံတိုင် လမ်းများမှ ဖြတ်သန်းသွားလာ နေရသည်။

ဘုရင့်နောင် ခုံးကျော်တံတားကို FMI ကုမ္ပဏီမှ တာဝန်ယူ တည်ဆောက်နေကာ ဒီဇင်ဘာတွင် အပြီးတည်ဆောက်သွားမည်ဟု ထုတ်ပြန်ထားသည်။ ဘုရင်နောင် ခုံးကျော်တံတားမှာ နှစ်ထပ်တံတားဖြစ်ပြီး လက်ရှိအချောသပ် လုပ်ငန်းများသာ ကျန်ရှိတော့သည်ဟု သိရသည်။

ရွှေဂုံတိုင် ခုံးကျော်တံတား ဆောက်လုပ်ရေး လုပ်ငန်းခွင်အား အောက်တိုဘာ ၁၀ ရက်က တွေ့ရစဉ် (ဓာတ်ပုံ-အောင်မျိုးသန့်)

.
. www.MyanmarExpress.net
 

Posted in: သတင်း