ဦးခင်ညွန့် နိုင်ငံရေးမလုပ်၊ ရွေးကောက်ပွဲမ၀င်

From : .. hot news

ရွှေမှော်ဝန်းလူမှုယဉ်ကျေးကူညီရေး အဖွဲ့ စတုတ္ထအကြိမ်မြောက် ကူညီစောင့် ရှောက်ရေးအခမ်းအနားကို ၂၀၁၅ ခုနှစ် မေလ ၃၁ရက်၉နာရီအချိန်တွင်ကျောက် တန်းမြို့နယ်ဓမ်္မာရုံ(ရွှေမှော်ဝန်းသာသနာ့ ဗိမာန်)၌ ကျင်းပသည်။ ထိုအခမ်းအနား သို့ ရွှေမှော်ဝန်း လူမှုယဉ်ကျေးကူညီရေး အဖွဲ့ ရာသက်ပန်နာယကကြီး ဦးခင်ညွန့် တက်ရောက်အမှာစကားပြောကြားသည်။ ထိုသို့ပြောရာတွင် ဦးခင်ညွန့်က ““ကျွန် တော်တို့ရွှေမှော်ဝန်းလူမှု ယဉ်ကျေးကူညီ ရေးအဖွဲ့ကို ဖွဲ့စည်းရခြင်း ရည်ရွယ်ချက် က ရွှေမှော်ဝန်းဒေသအတွင်းမှာရှိကြတဲ့ ပညာရေးလိုအပ်ချက်၊ လူမှုကျန်းမာရေး ဆိုင်ရာလိုအပ်ချက်တွေကိုကူညီအားဖြည့် ပေးဖို့ လူငယ်များအတွင်းမှာ မြန်မာ့ယဉ် ကျေးမှု ဓလေ့ထုံးတမ်းစဉ်လာများ ထွန်း ကားရေးကူညီစောင့်ရှောက်ဖို့၊ရွှေမှော်ဝန်း ဒေသအတွင်းရှိဆင်းရဲနွမ်းပါးသော သက် ကြီးရွယ်အိုများကို ကူညီစောင့်ရှောက်ဖို့၊ ဘာသာ၊ သာသနာဆိုင်ရာတွေကို ကူညီ ထောက်ပံ့ဖို့၊ ရွှေမှော်ဝန်း ဒေသအတွင်း စာပေနဲ့စာကြည့်တိုက်များဖွံ့ဖြိုးရေးကူညီ ထောက်ပံ့ဆောင်ရွက်ပေးဖို့  အခုအခါ သဘာဝပတ်ဝန်းကျင် ထိန်းသိမ်းရေးလုပ် ငန်းတွေမှာပါ ပံ့ပိုးကူညီဆောင်ရွက်ပေး ဖို့ပါ။ အခုလောလောဆယ်မှာ ဘဏ္ဍာ ရေးအခြေအနေအရ ရွှေမှော်ဝန်းဒေသ (ကျောက်တန်းမြို့နယ်အတွင်း) မှာသာ လုပ်ဆောင်နေသေးပေမယ့် နောင်မှာငွေ ကြေးတောင့်တင်းလာရင် အခြားမြို့နယ် များမှာပါ ကူညီဆောင်ရွက်သွားမှာ ဖြစ် ပါတယ်။ ဒီလိုဆောင် ရွက်တာဟာ ကျွန် တော့်ကို နိုင်ငံတော်ရဲ့ကြီးလေးတဲ့တာဝန် တွေကို ထမ်းဆောင်နိုင်အောင် မွေးထုတ် ပေးလိုက်တဲ့ ကိုယ့်ရပ်ကိုယ့်ဒေသကို  ပြန် ပြီးကျေးဇူးပြုတဲ့အနေနဲ့ ကျွန်တော့်ဒေသ တိုးတက်ရေးအတွက်တတ်နိုင်သလောက် ဆောင်ရွက်ပေးမယ်ဆိုတဲ့ ရည်ရွယ်ချက် နဲ့ လုပ်နေတာ ဖြစ်ပါတယ်။ ကျွန်တော့် အသက်လည်းကြီးပါပြီ။ နိုင်ငံရေးလည်း မလုပ်ဘူး။ ရွေးကောက်ပွဲလည်း မ၀င်ပါ ဘူးဆိုတာအခုကြွရောက်လာကြတဲ့ပုဂ်္ဂိုလ် များ ရော၊ မီဒီယာများကိုပါ ကျွန်တော် ယတိပြတ် ပြောလိုက်ပါတယ်”

ဆက်ပြီး ဦးခင်ညွန့်က ““မကြာခင်က နိုင်ငံတော်အစိုးရအနေနဲ့ မှော်ဝန်းချောင်း ရဲ့ တောင်ခြမ်းနဲ့မြောက်ခြမ်းကို ဆက် သွယ်ပေးတဲ့ ၀ဲကြီး-ပန်းချောင်းတံတား ကြီးကို တည်ဆောက်ပေးခဲ့တဲ့အတွက် ကျွန်တော်အလွန်အင်မတန် ၀မ်းမြောက် ၀မ်းသာဖြစ်ရပါတယ်။ ဒီမှော်ဝန်းချောင်း ကူး ၀ဲကြီး-ပန်းချောင်းတံတားကို တည် ဆောက်ဖို့ ကျွန်တော်တို့ရဲ့ တပ်မတော် အစိုးရလက်ထက်မှာ ကျွန်တော်ကြိုးစား ခဲ့ပါတယ်။  အဲဒီတုန်းက  ဘဏ္ဍာငွေ အကန့်အသတ်ကြောင့် ခွင့်ပြုချက်မရခဲ့ တဲ့အတွက် အဲဒီတံတားကို ကျွန်တော် မတည်ဆောက်နိုင်ခဲ့ပါဘူး။ ဒီတံတားဟာ ကျောက်တန်းမြို့နယ်ဖွံ့ဖြိုးရေးအတွက် အဓိကလိုအပ်ချက်ဖြစ်ပါတယ်။ ဒီလိုအပ် ချက်ကို လက်ရှိနိုင်ငံတော်အစိုးရကအမှန် တကယ်လိုအပ်တယ်လို့ ယူဆပြီး ဖြည့် ဆည်းပေးခဲ့တဲ့အတွက် ကျွန်တော်အလွန် မှ ကျေးဇူးတင်ဝမ်းမြောက်ပါတယ်။ မြို့ နယ်သူ၊ မြို့နယ်သားတွေကလည်း လက် ရှိအစိုးရကို တကယ့်ကိုကျေးဇူးတင်ကြရ ပါမယ်။ ကျေးဇူးတင်ထိုက်သူကို ကျေးဇူး တင်ခြင်းဟာ ဗုဒ်္ဓဘုရားရှင်ရဲ့အဆုံးအမ မင်္ဂလာတရားတော်နဲ့ညီပါတယ်””စသည် ဖြင့် ပြောကြားသွားသည်။

ဆက်လက်၍အခမ်းအနားကို အစီ အစဉ်အတိုင်းကျင်းပရာ ရွှေမှော်ဝန်းလူမှု ယဉ်ကျေးကူညီရေးအဖွဲ့ ရာသက်ပန် နာယကကြီး ဦးခင်ညွန့်နှင့် တက်ရောက် လာသူများက အသက်၈၅နှစ်နှင့်အထက် အဘိုး၊အဘွားများအား ပူဇော်ကန်တော့ ငွေများပေးအပ်လှူဒါန်းခြင်း၊ကျောက်တန်း မြို့နယ်စာသင်ကျောင်းများနှင့် ကျောင်း သားကျောင်းသူများအားပညာသင်စရိတ် ထောက်ပံ့ငွေနှင့် စာအုပ်နှင့်စာရေးကိရိ ယာများ ထောက်ပံ့ပေးသည်။

ထို့နောက်  Mal  Myint International Co.Ltd  နှင့် NAC Company Ltd. တို့က ရွှေမှော်ဝန်းလူမှုယဉ်ကျေးမှု ကူညီရေးအဖွဲ့သို့ ခေတ်မီ အရေးပေါ် လူနာတင်ယာဉ်တစ်စီးကို လှူဒါန်းခဲ့ပြီး အခမ်းအနားကို နံနက် ၁၁ နာရီတွင် အောင်မြင်စွာ ရုတ်သိမ်းခဲ့သည်။                  


မောင်ကျော်
 
.. https://www.facebook.com/MyanmarExpress
 

Posted in: သတင်း