နိုင်ငံခြားသားများအား မြ၀တီနယ်စပ်ဂိတ်တွင် တစ်ပတ်ဗီဇာထုတ်ပေးမည်

From : ..7day

ရန်ကုန်- မြ၀တီနယ်စပ်ဂိတ်တွင် ထိုင်းနိုင်ငံသားများ အပါအ၀င် ကမ္ဘာလှည့် ခရီးသွားများအား တစ်ပတ်ဗီဇာထုတ်ပေးနိုင်ရန် စီစဉ်
နေပြီဖြစ်ကြောင်း ကရင်ပြည်နယ် ၀န်ကြီးချုပ်ဦးဇော်မင်းက ပြောကြားသည်။

“မြ၀တီ၊ ဘားအံ၊ မော်လမြိုင်နဲ့ ကျိုက်ထီးရိုးတို့ကို လည်ပတ်နိုင်ဖို့အတွက် ခြောက်ညအိပ် ခုနစ်ရက် ဗီဇာ၊ ပြည်ဝင်ခွင့်ပေးဖို့လုပ်နေတာပါ။ တတ်နိုင်သမျှအမြန်ဆုံး လုပ်နေပါတယ်” ဟု ၀န်ကြီးချုပ်ဦးဇော်မင်းက ဧပြီ ၂၈ ရက်တွင် ပြောသည်။

ထိုင်းနိုင်ငံသားများအပြင် မြန် မာနိုင်ငံသားများပါ ထိုင်းနိုင်ငံသို့ မြ ၀တီမဲဆောက်ဝင်ပေါက်မှတစ်ဆင့် သွားရောက်နိုင်ရန် ညှိနှိုင်းထားပြီး လုံခြုံရေးနှင့် ငွေလဲသည့်ကိစ္စသာ ကျန်ရှိတော့ကြောင်း ၀န်ကြီးချုပ်ကပြောသည်။

“မြ၀တီကသာ ဖွင့်ပေးလိုက်ရင် စားရိတ်တော့ တအားသက်သာသွား တဲ့အတွက် တော်တော်များများလာ ကြမှာ။ နယ်စပ်ဖြတ်ကျော် ခရီးသွား တွေကလာကြမှာ” ဟု Tour De Myanmar ခရီးသွားကုမ္ပဏီ အုပ်ချုပ်မှုဒါရိုက်တာ မဒါလီက ပြော သည်။ ယခင်က မြ၀တီကတစ်ဆင့် ထိုင်းဘက်မှ ၀င်လာမည့်ဧည့်သည် များအားကုမ္ပဏီစီစဉ်မှုဖြင့် ဆိုပါက ကြိုတင်ခွင့်ပြုချက်ဖြင့် ၀င်ရောက် ခွင့်ပြုပြီး ကိုယ်ပိုင်အစီအစဉ်ဖြင့် တစ်ဦးချင်း FIT များ၏ ဧည့်သည်များကိုမူ ဆိုက်ရောက်ဗီဇာထုတ်ပေး ခြင်းမျိုးမရှိခဲ့ပေ။

ယင်းကဲ့သို့ ဖွင့်ပေးလိုက်ပါကဘားအံ၊ ကျိုက်ထီးရိုးနှင့် မော်လမြိုင်မြို့များတွင် ဟိုတယ်အခန်း မလုံလောက်မှုများ ဖြစ်လာနိုင်ကြောင်း မဒါလီက သုံးသပ်သည်။

မြ၀တီနယ်စပ်ဝင်ပေါက်မှာက ကမ္ဘာလှည့်ခရီးသွားများ ၀င်ထွက် သွားလာနိုင်ရန် နိုင်ငံကူးလက်မှတ် စစ်ဆေးသည့်စက်များ တပ်ဆင်နေပြီဖြစ်ကြောင်း လူဝင်မှုကြီးကြပ်ရေးနှင့် ပြည်သူ့အင်အား ၀န်ကြီးဌာနမှ ပြည်ထောင်စုဝန်ကြီး ဦးခင်ရီက ဖေဖော်ဝါရီလဆန်းတွင် ပြောသည်။

ထိုင်းနိုင်ငံသားများသည် မြန်မာနိုင်ငံသို့ လာရောက်မှုစာရင်းတွင် အများဆုံးဖြစ်ပြီး ကျိုက်ထီးရိုးဘုရားအား သွားရောက်ဖူးမြော်လေ့ရှိ
သည်။ ယခုနှစ် ဇန်န၀ါရီလမှ မတ်လကုန်အထိ ရန်ကုန်လေဆိပ်မှ ထိုင်းနိုင်ငံသား သုံးသောင်းကျော် မြန်မာနိုင်ငံသို့ လာရောက်ခဲ့သည်ဟု စာရင်းဇယားများအရ သိရသည်။

 .. www.MyanmarExpress.net

 

Posted in: သတင်း