ဝ အထူးဒေသတွင် နေထိုင်သူများ မဲပေးခွင့်ရရန် ပြည်သူ့လွှတ်တော်ဥက္ကဋ္ဌ ကူညီမည်

From : ..the voice

ရှမ်းပြည်နယ်အရှေ့ပိုင်း ကျိုင်းတုံမြို့သို့ ရောက်ရှိနေသော ပြည်သူ့လွှတ်တော် ဥက္ကဋ္ဌ သူရဦးရွှေမန်းက ဝအထူးဒေသအတွင်း နေထိုင်သူများ မဲပေးခွင့်ရရန် ကူညီမည် ဖြစ်ကြောင်း ဝအထူးဒေသ (၂) ဆက်သွယ်ရေးတာဝန်ခံ ဦးအားမင်က ပြောကြားသည်။
"ရွေးကောက်ပွဲမှာ ဝပြည်သူတွေ မဲပေးနိုင်ဖို့ သန်းခေါင်စာရင်းကောက်ပြီး မှတ်ပုံတင်လုပ်ပေးဖို့ ပြောတယ်" ဟု ၄င်းကဆိုသည်။

ပြည်သူ့လွှတ်တော်ဥက္ကဋ္ဌ သူရဦးရွှေမန်းနှင့် ဝ ပြည်သွေးစည်းညီညွတ်ရေး တပ်မတော် ဒုတိယစစ်ရေးချုပ် ဦးအိုက်လွင် ဦးဆောင်သောအဖွဲ့တို့ ယနေ့ (စက်တင်ဘာ ၃ ရက်နေ့) နံနက် ၁၁ နာရီ၌ တွေ့ဆုံဆွေးနွေးစဉ် ယင်းသို့ ပြောကြားခဲ့ခြင်းဖြစ်ကြောင်း ၄င်းက ရှင်းပြသည်။

ဝ ပြည်သွေးစည်းညီညွတ်ရေး တပ်မတော်သည် ၁၉၈၉ ခုနှစ်တွင် တပ်မတော် အစိုးရထံ လက်နက်နှင့် ငြိမ်းချမ်းရေးလဲလှယ်ခဲ့ပြီး ၂၀၀၇ ခုနှစ် နယ်ခြားစောင့်တပ် ဖွဲ့စည်းရေးကို လက်မခံခဲ့သော်လည်း ဝ ကိုယ်ပိုင်အုပ်ချုပ်ခွင့်ရ ပြည်နယ်အဆင့် တိုးမြှင့်ပေးရန် တောင်းဆိုထားသည့် လက်နက်ကိုင် အဖွဲ့အစည်းလည်း ဖြစ်သည်။

ဝ အထူးဒေသ (၂) ဆက်သွယ်ရေးတာဝန်ခံ ဦးအားမင်က "ဝပြည်နယ် တောင်းဆိုချက်ကို လိုက်လျောပေးမယ့်အနေအထား ရှိတယ်။ ဒါကြောင့် မဲပေးနိုင်ဖို့ မှတ်ပုံတင် လုပ်ပေးတာဖြစ်မှာပါ။ အခုလည်း ကိုယ်ပိုင်အုပ်ချုပ်ခွင့် ပြည်နယ် တရားဝင် မပေးသေးပေမယ့်လည်း ကိုယ်ပိုင်အုပ်ချုပ်ခွင့် ရနေတာပဲ" ဟု မှတ်ချက်ပြုသည်။

ပြည်သူ့လွှတ်တော်ဥက္ကဋ္ဌ သူရ ဦးရွှေမန်းနှင့် ဝ ပြည်သွေးစည်းညီညွှတ်ရေး တပ်မတော် ဒုတိယစစ်ရေးချုပ် ဦးအိုက်လွင် ဦးဆောင်သောအဖွဲ့တို့ တွေ့ဆုံဆွေးနွေးရာတွင် ဝ အထူးဒေသအတွင်း အောက်ခြေတွင် ဖြစ်ပွားသော ပြဿနာများကို နိုင်ငံတော်သို့ တင်ပြပြီး ညှိနှိုင်းဖြေရှင်းကြရန် သဘောတူညီခဲ့ကြောင်း ယင်းဆွေးနွေးပွဲသို့ တက်ရောက်ခဲ့သည့် ဝ အထူးဒေသ တာဝန်ရှိသူများထံမှ စုံစမ်းသိရှိရသည်။

ပြည်သူ့လွှတ်တော်ဥက္ကဋ္ဌ သူရဦးရွှေမန်းသည် ဝ အထူးဒေသအဖွဲ့နှင့် တွေ့ဆုံပြီး ကျိုင်းတုံမြို့ ဒေသခံများနှင့် နေ့လယ် ၁ နာရီတွင် တွေ့ဆုံခဲ့သည်။

 .. www.MyanmarExpress.net
 

Posted in: သတင်း