သမ္ဖပလ္လာပ စာနယ်ဇင်းသမားများ

ဂျာနယ်တဒါဇင်လောက်မှာ အပတ်စဉ်ပုံမှန်စာတွေရေးဖြစ်နေတာကြောင့် စာဖတ်ပရိသတ် အမျိုးမျိုးဆီက ဖုန်းဆက်တာတွေ စာရေးတာတွေ အမြဲလိုလို လက်ခံရရှိလေ့ရှိတယ်။ တချို့က အားပေးတယ်။ တချို့က ဝေဖန်ထောက်ပြတယ်။ တချို့က တိုင်တမ်းတယ်။ တချို့က တိုင်ပင်တယ်။ တချို့က ရင်ဖွင့်တယ်။ အမျိုးစုံပါပဲ။


အပြုသဘော ဝေဖန်သုံးသပ်

ဒီအထဲမှာ ဂျာနယ်တွေနဲ့ပတ်သက်ပြီး အားမလိုအားမရဖြစ်လို့၊ မကြိုက်လို့၊ စိတ်ပျက်လို့ ပြောပါဦး၊ ရေးပါဦးလို့ တိုက်တွန်းတဲ့စာမျိုးတွေက အများဆုံးပါပဲ။ အတတ်နိုင်ဆုံး တာဝန်ကျေအောင် ရေးခဲ့ပါတယ်။ စာနယ်ဇင်းသမားဆိုတာ အမြင်မတော်တာ၊ အကြားမတော်တာ မှန်သမျှ၊ တိမ်းစောင်းနေတာမှန်သမျှ အပြုသဘော ဝေဖန်သုံးသပ်တင်ပြရမြဲ ဖြစ်တဲ့အတိုင်း မော်ဒယ်မိန်းကလေးတွေ ဝတ်စားဆင်ယင်ပုံ လျှပ်ပေါ်လော်လီတာက အစ၊ ဝန်ထမ်းကြီးငယ်တွေ အကျင့်ပျက်တာမျိုး အလယ်၊ လူတိုင်းလိုလို သိက္ခာကိုရိက္ခာနဲ့ လဲပစ်နေကြတာမျိုး အဆုံး ကြိမ်ဖန်များစွာ ရေးခဲ့ပါတယ်။ ဒီအထဲမှာ ကိုယ့်တာကိုယ် လုံအောင်လုပ်ဖို့ အတွက် စာနယ်ဇင်းသမားများ လိုက်နာစောင့်ထိန်းရမယ့် ကျင့်ဝတ်တွေ အကြောင်း ရေးခဲ့တာက အများဆုံးဖြစ်ပါတယ်။

သမ္ဖပလ္လာပ ဂျာနယ်လစ်

ကျင့်ဝတ်အကြောင်း ရေးလွန်းအားကြီးလို့ ပွဲတကာလည်တက်ပြီး လက်ဆောင် ယူသူတွေ၊ ဂျာနယ်တွေကို ခုတုံးလုပ်ပြီး ကိုယ့်ကိုယ်ကိုလူရာ ဝင်အောင် လုပ်သူတွေနဲ့ ကြော်ငြာဆောင်းပါးရေးပြီး ပိုက်ဆံရှာသူတွေ စတဲ့ စတဲ့ အသိမ်အဖျင်းရေးသူ ‘သမ္ဖပလ္လာပဂျာနယ်လစ်’ များက ကွယ်ရာမှာ အောက်ကလိအာ ပြောကြတာတွေလည်း အများကြီး ပြန်ကြားရပါတယ်။ ဒါပေမယ့်လည်း အရေးလျှော့လို့ မဖြစ်ဘူး။ စာနယ်ဇင်းဆိုတာ စတုတ္ထမဏ္ဍိုင် ဖြစ်တယ်ဆိုတော့ တည့်မတ်ဖို့ အရေးကြီးတယ်။ ခြစားလောက်ကိုက်လို့လည်း မဖြစ်ဘူး။ ခြတွေလောက်တွေ မကပ်နိုင်အောင် တားဆီးကာကွယ်ရမယ်။ လက်နှီးစုတ်ကို အိမ်ပြင်ထုတ်လှန်းသလိုဖြစ်လည်း မတတ်နိုင်ဘူး။ ရှက်တော့ရှက်တာပေါ့။


ဖန်တရာတေနေပြီ

စာဖတ်ပရိသတ်တွေကတောင် ပြောလာရတာဆိုတော့ ပိုပြီးရှက်စရာကောင်းတယ်။ အကြိမ်ကြိမ်ရေးခဲ့တာ 'ဖန်တရာတေ’ နေပြီဖြစ်ပေမယ့်လည်း စာဖတ်သူများက ရေးစေ၊ ပြောစေချင်တော့ ရေးရပါဦးမယ်။ အခုမှ ဂျာနယ်လောကထဲလှမ်းဝင်ဖို့ ကြံရွယ်တဲ့လူငယ်လေးတွေ ဆင်ခြင်နိုင်ကြစေဖို့ဖြစ်တယ်။ အံတိုနေပြီဖြစ်တဲ့ 'သမ္ဖပလ္လာပ ဂျာနယ်လစ်' များ မဖတ်ဘဲ ကျော်လွှားသွားကြပါလိမ့်မယ်။


အများဆုံး ညည်းညူသံ

စာဖတ်သူများရဲ့ အများဆုံး ညည်းညူသံကတော့ သတ်ပုံမှားတာနဲ့ စာအကျအပေါက်မှားတာတွေ ဖြစ်တယ်။ ဝါကျတခုမဆုံးခင် စာကြောင်းက ပြတ်သွားပျောက်သွားတော့ အဓိပ္ပာယ်ဆက်စပ်မရဘဲ ဖြစ်တာကို သူတို့ တော်တော် စိတ်ပျက်ကြတယ်။ တခါတလေ စာပိုဒ်တပိုဒ်လုံးကျန်ခဲ့လို့ စာရေးသူဘာပြောမှန်း မသိလိုက်ရဘူးလို့ ဆိုကြတယ်။ တချို့က ညွှန်းတဲ့စာမျက်နှာမှာ အဆက်ကို ရှာမရတာလည်း စိတ်မရှည်ကြဘူး။ တချို့က စာမျက်နှာ နံပါတ်ထိုးတာ မထင်မရှား ဖြစ်နေတာကို မကြိုက်ကြဘူး။ ကာတွန်းတွေမှာပါတဲ့ စာက သတ်ပုံမှားနေတာကိုတော့ အများဆုံး ထောက်ပြကြတယ်။ ကာတွန်းဆိုတော့ ပိုပြီးသိသာထင်ရှားနေတာကိုး။


သတ်ပုံလေးတောင် မယုံရတော့

ဒီအချက်တွေအားလုံး အမှန်တွေချည်းပါပဲ။ ရှေးကဆိုရင် ကလေးတွေ သတ်ပုံမသိလို့မေးတဲ့အခါ နီးရာ သတင်းစာ၊ ဂျာနယ်၊ မဂ္ဂဇင်းတစောင်ဆွဲယူပြီး “အဲဒီထဲမှာရှာကြည့်” လို့ ပြောလိုက်ရုံပဲ။ အဲဒီလောက်အထိကို စာဖတ်ပရိသတ်က ယုံကြည် စိတ်ချထားကြတာ။ ခုခေတ်တော့ သတ်ပုံလေးတခုတောင်မှ စိတ်ချလက်ချ ယုံကြည်လို့ရတဲ့ စာနယ်ဇင်းတခုမှကို မရှိတော့ဘူးလို့ပြောရင် လွန်မယ်မထင်ဘူး။ နောက်ပြီး ကလေးတွေကို တောင်းရမ်းစားသောက်ခိုင်းတဲ့ သတင်းဖော်ပြရာမှာ ကလေးငယ်တွေရဲ့ဓာတ်ပုံကို ထင်ထင်ရှားရှားကြီး ဖော်ပြတာကိုလည်း စာဖတ်သူများက ထောက်ပြဝေဖန်ကြတယ်။

ဂျာနယ်လစ်ဆိုပြီးတော့ ကလေးသူငယ် ကာကွယ်စောင့်ရှောက်ရေး ဥပဒေကို မသိရကောင်းလားလို့ အပြစ်တင် ကြတယ်။ ဒါလည်းမှန်တယ်။ မှုခင်းသတင်းတွေ ဖော်ပြရာမှာ ကလေးသူငယ်ဆိုင်ရာ သတင်း၊ လူပုဂ္ဂိုလ် တဦးတယောက်ရဲ့ ဂုဏ်သရေကို ထိခိုက်နစ်နာသွားစေတဲ့သတင်းနဲ့ တရားရုံးကို မထေမဲ့မြင်ပြုရာ ရောက်တဲ့ ရေးသားမှုမျိုးကို သတင်းထောက်နဲ့ အယ်ဒီတာတိုင်း သိရှိနားလည်ထားဖို့ လိုအပ်ပါတယ်။ ဒီခေတ်မှာ ဒီသုံးချက်နဲ့ လွတ်ကင်းအောင် မရေးတတ်ကြတာ များတယ်။ မှုခင်းဂျာနယ်မဂ္ဂဇင်းတွေက အဆိုးဆုံးဖြစ်တယ်။ အထူးသဖြင့် ရဲအမှုထမ်းတွေနဲ့ အငြိမ်းစား ရဲအမှုထမ်းတွေရေးတဲ့ သတင်းဆောင်းပါးမှန်သမျှဟာ တဖတ်သတ် ရဲအမြင်နဲ့ ရေးသားလေ့ရှိပြီး ရုံးတော်ကစီရင်ချက် မချမီကတည်းက စွပ်စွဲခံရသူများကို ပြစ်မှုကျူးလွန်သူအဖြစ် ကြိုတင် သတ်မှတ်ပြီး ဖြစ်ကြတာကို တွေ့ရတယ်။


ရဲက စွပ်စွဲသူသာ ဖြစ်တယ်

ရဲအလုပ်က ပြစ်မှုကိုခိုင်လုံအောင်တည်ဆောက်ပြီး ရုံးတင်တရားစွဲဖို့ ဖြစ်တယ်။ တရားစွဲတင်ခံရသူဟာ ရဲက တရားခံအဖြစ် စွဲတင်သူသာ ဖြစ်တယ်။ အမှန်တကယ် ပြစ်မှုကျူးလွန်သူ ဟုတ်၊ မဟုတ် တတ်အပ်သေချာ ဘယ်သူမှ မပြောနိုင်သေးဘူး။ သက်သေအထောက်အထားခိုင်လုံလို့ ရုံးတော်က အပြစ်ရှိကြောင်း စီရင်ချက် ချပြီးမှသာ အပြစ်ရှိတယ်လို့ ပြောနိုင်တာ ဖြစ်တယ်။ ဒါတောင် အောက်ရုံး အဆင့်ဆင့်က အပြစ်ရှိတယ်လို့ ဆုံးဖြတ်ထားခဲ့ပေမယ့် အမြင့်ဆုံး ရုံးတော်က အယူခံမှာ ကွင်းလုံးကျွတ် လွှတ်ပေးလိုက်တာမျိုးတွေ ရှိတတ်သေးတယ်ဆိုတာ သိထားရမယ်။


ပေါ့ပေါ့သဘောထားတဲ့ကိစ္စများ

စာဖတ်ပရိသတ်များက မသိကြလို့ ပြောတဲ့ရေးတဲ့အထဲမှာမပါပေမယ့် ခုခေတ်ဂျာနယ်သမားတွေ ပေါ့ပေါ့သဘောထားပြီး မှားတတ်ကြတာတွေလည်း ထောက်ပြချင်တယ်။ ပထမတချက်ကတော့ စာရေးသူတယောက် ရေးတဲ့စာကို ဂျာနယ် အယ်ဒီတာကလွဲပြီး တခြားသူကို ဂျာနယ်ထဲမပါခင်မှာ ပေးဖတ်တဲ့ အလေ့ဖြစ်တယ်။ (စာပေစိစစ်ရေးကို ဝတ္တရားအရ ပေးဖတ်ရတာက သီးခြားကိစ္စပါ)။ ဥပမာ လူထုစိန်ဝင်း နာမည်နဲ့ ရေးခဲ့တဲ့ ဆောင်းပါးတပုဒ်ပါ အယူအဆတရပ်ကို တခြား စာရေးသူတဦးက စောဒကတက်တာ၊ ကန့်ကွက်ချေပတာ လုပ်ဖို့ ရေးလိုက်တဲ့ဆောင်းပါးကို လူထုစိန်ဝင်းကို လာပြတာမျိုး ဖြစ်တယ်။ ဒါမျိုးက လုံးဝ မလုပ်အပ်တဲ့ကိစ္စ ဖြစ်တယ်။ အဲဒီဆောင်းပါးကို ဂျာနယ်ရဲ့ပေါ်လစီနဲ့ ညီ၊ မညီသုံးသပ်ပြီး အယ်ဒီတာက ထည့်လိုက ထည့်နိုင်တယ်။ ပယ်လိုက ပယ်နိုင်တယ်။ တခြားသူများကို မပြရပါဘူး။

မဖြစ်မနေထည့်ရတဲ့ကိစ္စ

စာတပုဒ်ဂျာနယ်မှာ ထည့်ခြင်း၊ မထည့်ခြင်းဟာ ဂျာနယ်ရဲ့ပေါ်လစီနဲ့ ညီ၊ မညီဆိုတဲ့အချက်နဲ့ပဲ ဆုံးဖြတ်ရတယ်။ ဗဟုခေတ်မို့ ကိုယ့်ပေါ်လစီနဲ့ ဆန့်ကျင်တဲ့အယူအဆကို ထည့်ရမယ်ဆိုတဲ့ စည်းကမ်းသတ်မှတ်ချက် မရှိဘူး။ ဂျာနယ်က ဝတ္တရားအရ မထည့်မနေထည့်ပေးရမယ့် စာကတမျိုးပဲရှိတယ်။ သတင်းဆောင်းပါးပါ အချက်အလက် မှားယွင်းတဲ့အတွက် မှားယွင်းဖော်ပြခံရသူက အထောက်အထား ခိုင်ခိုင်လုံလုံနဲ့ တင်ပြတာမျိုးဆိုရင် အယ်ဒီတာအဖွဲ့က သီးခြား အတည်ပြုချက် ပြုလုပ်ပြီး မှားယွင်းကြောင်းသေချာပါက ပြင်ဆင်ချက်နဲ့ မှားယွင်း ဖော်ပြခံရသူကို တောင်းပန်ချက်ကို သိသာထင်ရှားစွာ ဖော်ပြပေးရခြင်းဖြစ်တယ်။ အမှားပါတဲ့ သတင်း၊ ဆောင်းပါးကို ပြူးတူးပြဲတဲ ဖော်ပြထားခဲ့ပြီး အမှားပြင်ဆင်ချက်နဲ့ တောင်းပန်ချက်ကျတော့ မသိမသာ၊ မထင်မရှား ဖော်ပြထားတာမျိုး လုံးဝ မလုပ်သင့်ဘူး။


ဗိုက်အငှားနဲ့ ဓားထိုးခံ

နောက်မလုပ်သင့်တဲ့ အချက်တခုကတော့ ဂျာနယ်မဂ္ဂဇင်းတစောင်ကို နာမည်တပ်ပြီးဆန့်ကျင်ဝေဖန်တဲ့ (တခါတရံ ပုတ်ခတ်တိုက်ခိုက်တဲ့) စာမျိုးကို ကိုယ့်ဂျာနယ်မှာ ထည့်ပေးတာမျိုး ဖြစ်တယ်။ ဒါမျိုးက ‘ဗိုက်အငှားနဲ့ ဓားထိုးခံသလို’ ဖြစ်ရုံမက စာနယ်ဇင်းအချင်းချင်း စည်းမစောင့်ရာလည်း ရောက်တယ်။ နောက်တချက်ကတော့ ရိုက်မစစ်ရဘဲနဲ့ ကလောင်နာမည်ကို အလွယ်တကူ ဖွင့်ဟပြောကြားမှုမျိုး ဖြစ်တယ်။ မြန်မာစာရေးဆရာ အများစုဟာ ‘ကလောင်အမည်’ တခုခုခံယူပြီး စာရေးလေ့ရှိကြတယ်။ တချို့ ကလောင်နာမည်တွေ အများကြီးထားပြီး ရေးကြတယ်။ သူ့အကြောင်းနဲ့သူ အမျိုးမျိုး ရှိကြတယ်။ တချို့က လူမသိစေချင်လို့ ကလောင်နာမည်ခွဲပြီး ရေးတာမျိုးလည်းရှိတယ်။


အယ်ဒီတာဆိုတာ နှုတ်စောင့်စည်းရတယ်

ဒီလို လူမသိစေချင်လို့ နာမည်ဝှက်နဲ့ရေးနေတာကို အယ်ဒီတာတွေက ခပ်လွယ်လွယ်၊ ခပ်ပေါ့ပေါ့နဲ့ လူရှေ့သူရှေ့မှာ ထုတ်ပြောလေ့ရှိကြတယ်။ ဒါဟာ အယ်ဒီတာတယောက် စောင့်ထိန်းရမယ့် ကျင့်ဝတ် စည်းကမ်းကို ဂရုမစိုက်၊ အလေးမထားရာ ရောက်ပါတယ်။ အထူးသဖြင့် ဝေဖန်ရေးစာမျိုး ရေးတဲ့အခါ ရေးသူများဟာ သူတို့ရေးမှန်း လူမသိစေချင်ကြပါဘူး။ ဒါကို အယ်ဒီတာက နှုတ်စောင့်စည်းရပါတယ်။ အဲဒီ စာရေးတာ ဘယ်သူလဲလို့မေးသူကလည်း မမေးအပ်ပါဘူး။ စာရေးသူ အချင်းချင်း စောင့်ထိန်းအပ်တဲ့ ကျင့်ဝတ်မျိုးပါ။


မြောင်းထဲရောက်ပြီမှတ်

ဂျာနယ်မဂ္ဂဇင်းသမားတယောက်ကိုသွားပြီး “စောင်ရေဘယ်လောက်ရှိသလဲ” ဆိုတဲ့မေးခွန်းမျိုးလည်း မမေးအပ်ဘူး။ သူတို့ဟာ သူတို့ပြောချင်ပြောပါစေ။ ကိုယ်ကတော့ မမေးအပ်ပါဘူး။ ဒါမျိုးကို လုပ်ငန်းလျှို့ဝှက်ချက် (Trade Secret) လို့ ခေါ်ပါတယ်။ ဒီလိုကိစ္စမျိုးတွေက စာနယ်ဇင်းပညာ စာအုပ်ကြီးတွေထဲမှာ ဘယ်ပါမှာလဲ။ လူကြီးသူမတွေက လုပ်ရင်းကိုင်ရင်း လူငယ်တွေကို နှုတ်က ပြောကြ၊ ဆုံးမသွားကြတာပါ။ အခုခေတ်တော့ အဲဒီလိုဆုံးမသွန်သင်မယ့် လူကြီးသူမတွေရှိကြတော့တာ မဟုတ်လေတော့ လူငယ်လေးတွေမှာ စမ်းတဝါးဝါးနဲ့ မှားပြီးရင်း မှားနေကြတာ တွေ့နေရတယ်။ လွန်ကဲလာတဲ့အခါ စာဖတ်ပရိသတ် မျက်စိ ဆံပင်မွေးစူးစရာ ဖြစ်လာတယ်။ အဲဒီကတဆင့်တက်ပြီး မျက်စိနောက်လာပြီဆိုရင်တော့ မြောင်းထဲရောက်သွားပြီသာ မှတ်ပေတော့။


လူထုစိန်ဝင်း

Myanmar Express

Posted in: ဘာလဲဟဲ့ စတုတ္ထမဏ္ဍိုင်,လူထုစိန်ဝင်း