ရခိုင်ပြည်နယ် ဘူးသီးတောင်တွင် သံဃာတော်တစ်ပါးအား ဘင်္ဂါလီနှစ်ဦးက ကိုယ်ထိလက်ရောက် ကျူးလွန်မှု ဖြစ်ပွားခဲ့ပြီး မသင်္ကာသူ နှစ်ဦးအား ဖမ်းဆီးထား

From : ..eleven

ရခိုင်ပြည်နယ် ဘူးသီးတောင် အကျဉ်းထောင်အနီးရှိ ဓမ္မမဏ္ဍိုင် ဘုန်းကြီးကျောင်းတွင် သတင်းသုံးနေသည့် သံဃာတော်တစ်ပါးအား ဘင်္ဂါလီနှစ်ဦးက မတ်လ ၂၈ ရက် ညနေ ၇ နာရီ မိနစ် ၃ဝ ခန့်တွင် ကိုယ်ထိလက်ရောက် ကျူးလွန်မှုတစ်ခု ဖြစ်ပွားခဲ့ပြီး မသင်္ကာသူ နှစ်ဦးအား ဖမ်းဆီးထားကြောင်း ရခိုင်ပြည်နယ် ရဲတပ်ဖွဲ့မှ သတင်းရရှိသည်။
အဆိုပါ သံဃာတော်မှာ ဦးပညာသီရိ (သက်တော် ၃ဝ နှစ်) ဖြစ်ပြီး ဓမ္မမဏ္ဍိုင်ဘုန်းကြီးကျောင်း အနောက်ဘက် တောင်ကုန်းပေါ်ရှိ ဝါးကျောင်းတွင် တစ်ပါးတည်း တရားထိုင်နေစဉ် အဆိုပါ ဘင်္ဂါလီနှစ်ဦး ရောက်ရှိလာပြီး ဆေးလိပ်တောင်းကြောင်း၊ ၄င်းက ဆေးလိပ်မရှိကြောင်း ပြန်ပြောရာ ဝါးကျောင်းပေါ်သို့ အဆိုပါ ဘင်္ဂါလီနှစ်ဦး တက်လာကြကြောင်း၊ ထို့နောက် ၄င်း၏ နောက်ကျောကို ဝါးချွန်ကဲ့သို့ အချွန်တစ်ခုဖြင့်ထောက်ပြီး နားရွက်တစ်ဖက်ကိုဆွဲကာ ကျောင်းအောက်သို့ ဆွဲခေါ်ကြကြောင်းနှင့် ကိုယ်ထိလက်ရောက် ရိုက်နှက်ခဲ့ကြောင်း သိရသည်။
ယင်းဖြစ်စဉ်ပြီးနောက် ၄င်းအနေဖြင့် ဓမ္မမဏ္ဍိုင် ဘုန်းကြီးကျောင်းပေါ်သို့ ပြန်ကြွကာ ကျောင်းထိုင်ဆရာတော် ဦးနရာပတိအား အကြောင်းစုံ ပြောပြလျှောက်ထားပြီး ဘူးသီးတောင် အကျဉ်းထောင်ရှိ လုံခြုံရေးရဲတပ်ဖွဲ့သို့ အကြောင်းကြားခဲ့ကြောင်း သိရသည်။
ယင်းဖြစ်စဉ်နှင့် စပ်လျဉ်း၍ ဘူးသီးတောင်မြို့နယ် လက်ဝဲတက် ပုဇွန်ချောင်းကျေးရွာမှ မာမက်အီနုနှင့် ဇူဘိုင်တို့နှစ်ဦးအား (ပ) နံပါတ် ၄၅/၁၃ ပြစ်မှု ပုဒ်မ ၄၅၂/၂၉၅ တို့ဖြင့် ဘူးသီးတောင် ရဲစခန်းတွင် အမှုဖွင့် စစ်ဆေးဆောင်ရွက်လျက်ရှိကြောင်း သိရသည်။
အဆိုပါဖြစ်စဉ်ပြီးနောက် ဘူးသီးတောင်မြို့ပေါ်သို့ စစ်တပ်မှ လုံခြုံရေး ကင်းလှည့်မှုများ ရှိခဲ့ကြောင်း မြို့ခံများက ပြောကြားခဲ့သည်။

.. www.MyanmarExpress.net
 

Posted in: သတင်း