တရုတ်စာတွေကို ဘာသာပြန် သည့် စာရေးဆရာမ ဘလော့ဂါ နိုင်းနိုင်းစနေ ကို အားပေးသူ များပြား

နိုင်းနိုင်းစနေ ဆိုရင် ဒီနေ့ အင်တာနက် သုံးနေတဲ့ လူတိုင်း သိကြပါတယ်။ အင်တာနက် စာမျက်နှာပေါင်းများစွာ၊ ဖော်ဝတ် မေးပေါင်းများစွာမှာ နိုင်းနိုင်းစနေ ရေးထားတဲ့ စာတွေ ကို အများကြီး တွေ့နိုင်ပါတယ်။

နိုင်းနိုင်းစနေဟာ တရုတ်စာကို ကျွမ်းကျွမ်းကျင်ကျင် တက်မြောက်ထားပြီး တရုတ်စာဖြင့်ရေးသားထားသော စာအုပ်များ၊ ဝဘ်ဆိုက်များမှ စာကောင်းပေကောင်းများကို အမြဲ ဘာသာပြန်ပြီး ပိုစ့်တင်တတ်သူဖြစ်ပါတယ်။ နိုင်းနိုင်းစနေဟာ ၂၀၀၆ ခုနှစ်မှစတင်ပြီး ဘလော့ရေးသားခဲ့သူဖြစ်ပြီး ယနေ့အချိန်အထိ www.99sanay.comတွင် ကြည့်ရှုသူအရေအတွက်(hits) ၂၅ သိန်းကျော် ရရှိထားသူဖြစ်ပါတယ်။ ထို့အပြင် Facebook လူမှုကွန်ရက် ၀က်ဘ်ဆိုက်၌ ပြုလုပ်ထားသော fan page၌ ပရိသတ် ၁၄၈၇၅ ဦးရရှိထားခဲ့သူ ဖြစ်ပါတယ်။ ဘလော့၌ ရေးသားထားသောစာများကို စုစည်းထုတ်ဝေထားသည့် လုံးချင်းစာအုပ် ၁၁ အုပ်လည်း ထွက်ရှိထားခဲ့ပြီးဖြစ်ပါတယ်။

ဘလော့ဂါတစ်ယောက်အဖြစ် ဘယ်လို စိတ်ကူးနဲ့ စာတွေကို စရေးဖြစ်ခဲ့လဲ။ အောင်မြင်ရေး နဲ့ တက်ကျမ်းဆန်တဲ့ ဘာသာပြန်စာတွေကို ဘာကြောင့် ဦးစားပေးရေးခဲ့ပါသလဲ။ လို့ မေးချိန်မှာတော့

နိုင်းနိုင်းစနေက "အရင်တုန်းကတော့ စာဖတ်တာ ပဲ ၀ါသနာပါခဲ့တယ်။ အခုလို စာတွေ ရေးဖြစ်လိမ့်မယ်လို့လည်း စိတ်ကူးမရှိခဲ့ဘူး။ စာတွေ ရှာဖတ်တော့ မြန်မာစာ တွေအပြင် ကိုယ်တတ်ကျွမ်းတဲ့ တခြားဘာသာက စာတွေလည်း ဖတ်ခဲ့မိတယ်။ အဲဒီမှာ ကိုယ်ဖတ်မိတဲ့၊ ကောင်းတဲ့စာတွေကို တခြားဘာသာ စကားမတတ် တဲ့၊ အားနည်းတဲ့ သူငယ်ချင်းတွေကိုလည်း မျှဝေချင်စိတ်တွေ ဖြစ်လာခဲ့တယ်။ အဲဒီလိုနဲ့ မြန်မာလိုကြိုးစား ဘာသာပြန်ကြည့်ရင်းက စာတွေစရေး ဖြစ်ခဲ့ပါတယ်။ မိသားစုနဲ့ခွဲပြီး တခြားနိုင်ငံမှာ ကျောင်းသွားတက်တော့ စိတ်ဓာတ်မြှင့်တင်ဖို့ တက်ကျမ်းဆန်တဲ့ စာမျိုးတွေ ပိုရှာဖတ်ဖြစ်တယ်။ ကိုယ့်ကိုယ်ကိုယ်နှစ်သိမ့်၊ အားပေးတာမျိုး ပေါ့။ အဲဒီလိုစာတွေ ပိုဖတ်ဖြစ်တော့ အဲဒီလိုစာတွေကိုပဲ ပိုဘာသာပြန်ရေး ဖြစ်သွားတာပါ။ ဘလော့ကို ၂၀၀၆ ခုနှစ်မှာ စရေးဖြစ်ခဲ့ပါတယ်။ ဘလော့ စရေးတုန်းက နိုင်ငံခြား ရောက်နေပါတယ်။ အိမ်လွမ်းစိတ်ကြောင့်နဲ့လည်း ကိုယ့်မိသားစုအကြောင်း၊ ရွာအကြောင်း၊ ကိုယ့်ငယ်စဉ်အကြောင်းတွေ ရေးဖြစ် ပါတယ်။ ဘာရည်ရွယ်ချက်မှတော့ မရှိပါဘူး။ တခြားသူနဲ့ ခံစားမျှဝေရုံ သက်သက်ပါပဲ။ " လို့ ဖြေခဲ့ပါတယ်။

နိုင်းနိုင်းစနေရဲ့ စာဖတ်ပရိတ်သက် တစ်ဦးဖြစ်တဲ့ ဘလော့ဂါတစ်ဦးက တော့ " မနိုင်းနိုင်းရဲ့ စာတွေကတော့ ဒီနေ့လူငယ်တွေ အကြိုက်ဆုံးပဲ... အထူးသဖြင့် ဘာသာပြန်တွေပေါ့.. မနိုင်နိုင်ကိုယ်တိုင်ကလည်း ဘာသာပြန်တွေကို အသားပေးရေးတယ်လေ.. သူ ဘာသာပြန်ထားတဲ့ တရုတ်စာပေတွေက လူငယ်တွေအတွက် သိပ်ကို တန်ဖိုးရှိတယ်.. အထူးသဖြင့် သူ့စာတွေကို လူငယ်တွေ ပိုကြိုက်ကြတယ်... အင်္ဂလိပ်စာ ဆိုတာက လူတိုင်း သင်လာတာဆိုတော့ မလက်ဖူးလေ.. တရုတ်စာ ကျတော့ ခက်လည်းခက်တယ်.. လူတိုင်းလည်း မသိကြဘူး.. ပြီးတော့ တရုတ်က စာရေးစရာတွေနဲ့ အတွေးအခေါ် အရေးအသားတွေက အရမ်းကောင်းကြတယ်.. ဒါတွေကို မနိုင်းနိုင်းက ဘာသာပြန်ပြီး စာဖတ်သူအားလုံးက လိုက်ပြီး အတုယူတာပေါ့.. အများကြီး အကျိုးရှိပါတယ်... တကယ်ကောင်းတဲ့ ဘလော့ပါ.." လို့ ပြောခဲ့ပါတယ်။

တရုတ်လူမျိုးတွေရဲ့ ထူးချွန်ပုံနဲ့ စင်္ကာပူရောက်မြန်မာ အားလုံးနီးပါးက တရုတ်လူမျိုးတွေရဲ့ လက်အောက်မှာ ကျွန်ခံနေရပုံကို စင်္ကာပူရောက် မြန်မာ အလုပ်သမားတစ်ဦးက အခုလို ပြောခဲ့ပါတယ်..။

"ဒီမှာတော့ အလုပ် ကြီးကြီးမားမားတွေရဲ့ ၇၀ ရာခိုင်နှုံးက တရုတ်တွေ ပိုင်တယ်.. စင်္ကာပူ လူမျိုးဆိုတာကလည်း တရုတ်နဲ့ မထူးဘူး.. မဟာရာန ကိုးကွယ်ကြတယ်.. ကွိင်ရင် မယ်တော် ကိုးကွယ်ကြတယ်... စလုံးက မြန်မာ အားလုံးနီးပါးက တရုတ် လက်အောက်မှာပဲ ပျော်ပျော်ကြီး ကျွန်ခံနေကြတာပဲ..." လို့ ပြောပါတယ်။

တရုတ်နိုင်ငံဟာ စာပေပညာရှင်ပေါင်းများစွာကို မွေးထုတ်နိုင်ခဲ့ပြီး တရုတ်ပညာရှင်တွေရဲ့ အတွေးအခေါ်တွေက တကမ္ဘာလုံးကို ပျံ့နှံ့နေပြီဖြစ်ကြောင်းကိုလည်း ဘလော့ဂါ တစ်ဦးကပဲ အခုလို ဆက်ပြောပါတယ်။

"တရုတ်က ဟိုး ရှေးခေတ်ကတည်းက အစဉ်အလာနဲ့ တော်တာဗျ..ဒဿန ပညာရှင်တွေ အများကြီးပဲ။ ကမ္ဘာကျော်တဲ့ စာအုပ်ကောင်းတွေလည်း အများကြီးပဲ.. ဥပမာ Whose cheese can i move ဆိုတာမျိုးပေါ့... အရမ်းကောင်းပြီး လူတိုင်းဖတ်သင့်တယ်လေ... တရုတ်အတွေးအခေါ်တွေက တကမ္ဘာလုံးက အတုခိုးရလောက်တယ်.. မနိုင်းနိုင်းလို တစ်ယောက် ရှိတော့ မြန်မာတွေလည်း ပြန်အတုခိုးလို့ ရတာပေါ့.." လို့ ဆက်ပြောပါတယ်။

ဒါကြောင့်လည်း တရုတ်စာတွေကို ဘာသာပြန် တင်တဲ့ နိုင်းနိုင်းစနေ ဘလော့ဟာ လူကြိုက် အများဆုံး ဘလော့တစ်ခုဖြစ်ခဲ့ပါတယ်။ အင်တာနက် သုံးစွဲသူတွေဆီက ဆန္ဒမဲကောက်ယူပြီးရွေး ချယ်ခဲ့ဘလော့အကယ်ဒမီ ဆုတောင်ရခဲ့သေးတယ်။ နောက်ပိုင်းမှာ ဘလော့ရေးနေရာကနေ စာအုပ်ထုတ် ဖြစ်လာတယ်။ အဲဒါနဲ့ ပတ်သက်ပြီး နိုင်းနိုင်းစနေက

"စာအုပ်ထုတ်ထားတာ လောလောဆယ် ၁၀ အုပ်ရှိခဲ့ပါပြီ။ ဘလော့ထဲကစာတွေကိုပဲ စာအုပ်အနေနဲ့ ပြန် ထုတ်ထားတာပါ။ အွန်လိုင်းစာဖတ် ပရိသတ်က အခုပဲ ဘလော့မှာ ကျွန်မ စာတစ်ပုဒ်တင်လိုက်တယ်။ အခုပဲ အ ပြင်အဆင်မရှိတဲ့ စာကို (ဆင်ဆာ မတင်တဲ့စာ) သူတို့ လာဖတ်နိုင်တယ်။ သူတို့ခံစားချက်ကို ချက်ချင်းချရေးခဲ့နိုင်တယ်။ အွန်လိုင်းပေါ်မှာတော့ စာရေးသူနဲ့စာဖတ်သူ တိုက်ရိုက်ဆက်ဆံနိုင်တယ်၊ စာတွေကို အခမဲ့ ဖတ်နိုင်သလို ထင်မြင်ချက်ကိုလည်း လွတ်လွတ်လပ်လပ် ချရေးခဲ့နိုင်တာပေါ့။ ပြင်ပစာဖတ်ပရိသတ်က စာရေးသူနဲ့ တိုက်ရိုက်ဆက်ဆံရတာမျိုး မရှိ သလို စာအုပ်ဖတ်ချင်ရင် ၀ယ်ရတယ်၊ ငှားရတယ်။ နောက်ပြီး စာရေးသူကို ကိုယ်ပေးချင်တဲ့ ထင်မြင်ချက်တွေ မြန်မြန်ဆန်ဆန် မပေးနိုင်တာမျိုးပေါ့။ စာ အုပ်ထုတ်ဖို့က ထုတ်ဝေသူတစ်ယောက် နဲ့ သူငယ်ချင်း တစ်ယောက်က မိတ် ဆက်ပေးတယ်။ ထုတ်ဝေသူကလည်း အရင်ကတည်းက ကျွန်မ ဘလော့ကို ၀င်ဖတ်ဖူးတယ်၊ စာတွေကို ကြိုက်တယ်ဆိုလို့ ထုတ်ဖြစ်သွားတာပါ။ ဘလော့မှာ ကိုယ်ရေးထားတဲ့စာကို ပုံနှိပ် စာအုပ်အဖြစ် ခိုင်ခိုင်မာမာ ထုတ်ဝေခွင့်ရတော့ ၀မ်းသာတာပေါ့...။" ပြောပါတယ်။

နိုင်းနိုင်းစနေရဲ့ ကိုယ်ရေးအကျဉ်းကတော့

အမည် နိုင်းနိုင်းစနေ
မွေးနေ့ ဒီဇင်ဘာ ၈ရက်
လူမျိုး လားဟူ
ဘာသာ ဗုဒ္ဓဘာသာ
ဇာတိ တောင်ကြီးမြို့ ဖြစ်ပါတယ်...။

ထုတ်ဝေထားပြီး စာအုပ်များ ကတော့
(၁) အမေ့လက်ရေးစာစုများ
(၂) ပျော်ရွှင်ခြင်းရဲ့ လျှို့ဝှက်အမှတ် အောင်မြင်သူရဲ့လမ်း
(၃) လင်းလက်တဲ့ ချစ်မီးအိမ်
(၄) ဟိုတုန်းက အမှတ်တရ
(၅) စမ်းချောင်းလေးရဲ့ခရီးစဉ်
(၆) ဥယျာဉ်ထဲက ပန်းတစ်ပွင့်
(၇) မေတ္တာတို့ ပေါင်းစုရာ
(၈) ရတနာများနှင့် ဆက်သွယ်ခြင်း
(၉) သတ္တိရှိတဲ့ ပထမခြေလှမ်း
(၁၀) နှလုံးသားဝန်ဆောင်မှု
(၁၁) ကျွန်မဖတ်ဖို့ တို့ပဲဖြစ်ပါတယ်....။

Myanmar Express

Posted in: ဆင်ခြင်စရာ