နိုင်ငံရေးသမား မျက်ကန်းများ၊ အဘိုးကြီးများ နှင့် ဝီကီလိစ်

ယခု ရက်ပိုင်းအတွင်း တစ်ကမ္ဘာလုံးကို လှုပ်လှုပ်ရွရွဖြစ်စေပြီး အမေရိကန်ကို အရှက်တကွဲ အကျိုးနည်းမှုတွေ ဖြစ်စေခဲ့သော ဝီကီလိစ် ၏ သတင်းထုတ်ပြန်မှု မှာ NLD က အဖိုးကြီးတို့ရဲ့ အကြောင်းတွေပါ ပါလာခဲ့ပါတယ်။ ဒီသတင်းက မြန်မာ့နိုင်ငံရေး လှုပ်ရှားသူတို့ကို မျက်စိများ ကန်းနေကြောင်း ထုတ်ဖော်ပြောလိုက်တာနဲ့ အတူတူပါပဲ။ ဒီအဖိုးကြီးတွေ အစည်းဝေးတိုင်းမှာ တောင်ဝှေးကိုယ်စီ၊ ဒုတ်ကောက်ကိုယ်စီနဲ့ ရှေ့ဆုံးက ထိုင်နေတာကို မြန်မာ့နိုင်ငံရေး လှုပ်ရှားသူတို့ မမြင်အောင် ကန်းနေခဲ့ကြပါတယ်။ အဘိုးကြီးတွေကို ဝေဖန်ရေးသားထားတာ တစ်ခုမှ မရှိခဲ့ဖူးပါဘူး။ အမြဲ ထောက်ခံ ရေးသားပြောဆိုမှုတွေပဲ ရှိခဲ့ကြပါတယ်။ အဘိုးကြီးများကို အပြစ်တင်ဝေဖန်သူအားလုံးကိုလည်း ရန်သူ လို သဘောထား ဆက်ဆံခဲ့ကြပါတယ်။ ဒါကြောင့်လည်း ရလဒ်တွေက မျက်ကန်းလမ်းလျှောက်သလို စမ်းတဝါးဝါး တွေ ဖြစ်နေပြီး၊ ဆင်ကန်း တောတိုး သလို ထင်ရာစိုင်း အစွန်းရောကမှုတွေ ပဲ ရရှိခဲ့ကြပါတယ်။



တကယ်တော့ NLD အတွင်းပိုင်းမှာ ခြစားနေတာ အတော်ကြာခဲ့ပါပြီ။ ပြည်တွင်းပြည်ပ ဒေါ်လာစား နိုင်ငံရေးလှုပ်ရှားသူတို့အနေနဲ့ ပြည်ပ အထောက်အပံ့များကြောင့် တစ်ကြောင်း၊ တော်လှန်ရေး အတွန့်ရှည်စေချင်စေချင်တာက တကြောင်း မသိချင်ဟန်ဆောင်ပြီး လွှတ်ပေးထားခဲ့ပါတယ်။ ဒီလိုနဲ့ NLD ဆိုတာ နာမည် တစ်ခုပဲ ကျန်တော့ပြီး ဘာမှ အရည်အချင်းမရှိတော့တဲ့ အဖွဲ့တစ်ခု ဖြစ်လာပါတယ်။ အခုဆိုရင်တော့ နာမည်တောင် မကျန်တော့ပါဘူး။

NLD က အဖိုးကြီးများအကြောင်းကို ဝီကီလိစ် က ပြင်းပြင်းထန်ထန် ဝေဖန် ရှုံ့ချထားပါတယ်။ ဒီအဘိုးကြီးတွေကြောင့် မြန်မာနိုင်ငံရေးအတွက် အင်မတန်မှ စိုးရိမ်မကင်းဖြစ်ရပါကြောင်း၊ အင်မတန်မှ စိတ်ပျက်မိပါကြောင်း ပြောဆိုထားပါတယ်။ ဝီကီလိစ်ရဲ့ ထင်မြင်ချက်အရ မြန်မာပြည်သူတို့အနေနဲ့လည်း ရိုးတွင်းချဉ်ဆီခန်းနေတဲ့ ဒီအဘိုးကြီးတွေရဲ့ ခေါင်းဆောင်မှုကို တော်တော် စိတ်ပျက်နေကြတယ်လို့ ယူဆထားပါတယ်။ သံတမန် တစ်ဦးက မြန်မာ ပြည်သူတို့ကို အသိဥာဏ် မြင့်မားနေပြီ၊ မျက်လုံးများ ကောင်းနေပြီ လို့ ယူဆ ထားပြီး မြန်မာပြည်သူတို့က စိတ်ပျက်နေတယ် လို့ထင်ခဲ့ပါတယ်။ ဒါပေမယ့် ဒီအဘိုးကြီးတွေကို အသက်ကြီးနေလို့ စိတ်ပျက်နေကြောင်း ဘယ်နိုင်ငံရေး သမား တစ်ဦးတစ်ယောက်ကမှ မပြောခဲ့ကြပါဘူး။ အဘိုးကြီးတွေရဲ့ ခေါင်းဆောင်မှုအောက်မှာ ကျေကျေနပ်နပ်နဲ့ပဲ ထောက်ခံအားပေးနေကြပါတယ်။ ဒီအကြောင်းကို သာ သိရင် ဒီမိုကရေစီ နာမည်ခံ အတိုက်အခံ နိုင်ငံရေးသမားအားလုံးကို ပြင်းပြင်းထန်ထန် ရှုံ့ချမယ့် အနေအထားရှိပါတယ်။ နိုင်ငံရေးသမားအားလုံးအပေါ်မှာလည်း အကြီးအကျယ် စိတ်ပျက်သွားပါလိမ့်မယ်။ ဒါ့အပြင် မြန်မာပြည်သူများထက် နိုင်ငံရေးသမား မျက်ကန်းများကို ကို ပိုပြီး သနားသွားမှာ သေချာပါတယ်။

နောက်တစ်ခုက စက်တင်ဘာအရေးအခင်းခေါ် ဘုန်းကြီးဆူပူမှုကို NLD အဘိုးကြီးများက လူသိရှင်ကြား ရှုံ့ချထားပါတယ်။ ဒါကိုလည်း နိုင်ငံရေးလှုပ်ရှားသူတို့က အပြစ်မမြင်ခဲ့ကြပါဘူး။ ဘယ်သူဖက်က မှန်တယ် ဘယ်သူ့ဖက်က မှားတယ် ဆိုတာထက် ကြက်ကန်းက တစ်နေ့ ဆန်အိုး တိုးမှာပဲ ဆိုတဲ့ ရူးသွပ်တဲ့ မျှော်လင့်ချက်နဲ့ပဲ ဆက်ပြီး လျှောက်လှန်းနေကြပါတယ်။ ဒါပေမယ့် နောက်ဆုံးမှာတော့ ကြက်ကန်း ဆန်အိုးမတိုးပဲ ခွေးကန်း ချေးပုံတိုးတဲ့ ဘဝ မျိုး ရောက်ခဲ့ပါတယ်။ ဒါပေမယ့်လည်း အတိုက်အခံ တို့အနေနဲ့ ချေးပုံကို အရသာရှိရှိ စားသုံးနေကြတာ ခုထိပါပဲ။

NLD အနေနဲ့ မြန်မာလူထုအတွက် ဘာတွေများလုပ်ခဲ့ဖူးပါလဲ?? အင်မတန် စိတ်ဝင်စားဖို့ကောင်းတဲ့ မေးခွန်းပါ။ အဖြေကတော့ အကြာကြီး စဉ်းစားဖို့ မလိုပါဘူး။ ဘာတစ်ခုမှ မလုပ်ခဲ့ဖူးဘူးလို့ ချက်ချင်းဖြေလို့ရပါတယ်။ အဘိုးကြီးတွေအနေနဲ့ မြန်မာပြည်သူတွေ အရေးကို စိတ်ဝင်တစား ဘာမှမရှိခဲ့ကြပါဘူး။ ဒါပေမယ့် NLD ကို အာဏာရ ပါတီ တစ်ခုဖြစ်ဖို့တော့ အသည်းအသန် လိုလားကြပါတယ်။ မသေခင် ဝန်ကြီးတစ်နေရာရဖို့ ခုချိန်ထိ မျှော်လင့်နေကြတုန်းပါ။ ဒေါ်အောင်ဆန်းစုကြည်ကိုယ်တိုင်က မြန်မာပြည်သူတို့ရဲ့ စီးပွားရေးကို ကောင်းမွန်အောင် မကြိုးစားတဲ့အပြင် နိုင်ငံခြားသားတို့ မြန်မာပြည်တွင်းသို့ အလည်အပက်လာခြင်းတွေကို လူသိရှင်ကြား ကန့်ကွက်ခြင်းတွေ၊ စီပွားရေး ပိတ်ဆို့မှုကို ထောက်ခံခြင်းတွေ လုပ်ခဲ့ပါတယ်။ ဒေါ်အောင်ဆန်းစုကြည်နဲ့ NLD ကြောင့် ရလာတဲ့ ရလဒ်ကောင်းကို ပြပါဆိုလျှင် ဘာတစ်ခုမှ မရှိပါဘူး။ NLD ရဲ့ မြန်မာပြည်သူတို့အပေါ် လူမှုစီးပွား တိုးတက်ရာတိုးတက်ကြောင်း စိတ်မဝင်စားခြင်းကို ဝီကီလိစ် က စိတ်ပျက်စွာ ဖော်ပြထားပါတယ်။

အဘိုးကြီးတို့အနေနဲ့ ၁၉၉၀ ရွေးကောက်ပွဲပြီးကတည်းက အချိန်ဖြုန်းနေတာ အခုထိပါပဲ။ စာရွက်ပေါလို့ ကြေငြာချက် ထုတ်နေတာကလွဲပြီး ဘာမှ မလုပ်နိုင်ခဲ့ကြပါဘူး။ တစ်နေ့တော့ ဝန်ကြီးဖြစ်ရမှာပဲ ဆိုတဲ့ စီတ်ကူးအိပ်မက်နဲ့ပဲ ရူးသွပ်နေကြပါတယ်။ အဲ့ဒီ ရူးသွပ်မှုက အခုဆိုရင် လူငယ်တွေဆီကိုလည်း ရောက်ရှိနေကြပါပြီ။ ထစ်ကနဲ ဆိုတာနဲ့ ၉၀ ရွေးကောက်ပွဲကို ပါးစပ်က မချတဲ့ အတိုက်အခံ ပညာမဲ့ လူငယ်တွေ ဒီနေ့ခေတ်မှာ သိပ်များနေပါပြီ။ ဒီအကြောင်းနဲ့ ပတ်သက်ပြီးလည်း ဝီကီလိစ် က ထောက်ပြထားပါတယ်။

NLD ထဲမှာ လူကြီး နဲ့ လူငယ်ဆိုပြီး သွေးကွဲနေတာ ကြာပါပြီ။ ဒေါ်စုကြည်ကတော့ လူကြီးတွေကို နိပ်ကွပ်လိုက် လူငယ်တွေကို ဆရာလုပ်လိုက်နဲ့ ရပ်တည်နေခဲ့ပါတယ်။ အသက်ကို တန်ဖိုးထားသော အဘိုးကြီးတို့က ဒေါ်စုကြည်ထက် ငယ်တဲ့ လူမှန်သမျှ ဘာပြောပြော လက်မခံခဲ့ကြပါဘူး။ စစ်တပ်ကို သွေးကွဲတယ် အမျိုးမျိုး ပြောနေတဲ့ နိုင်ငံရေး မီဒီယာတို့ကလည်း NLD ရဲ့ အမှန်တကယ် သွေးကွဲ နေခဲ့တာကို မသိခဲ့ပါဘူး။ ဒါဟာ အင်မတန် စိတ်ပျက်ဖို့ကောင်းတဲ့ ရလဒ်ဖြစ်ပါတယ်။ စစ်တပ်မှာ ဖြုတ်ထုတ်သတ် လုပ်နေပါတယ် ဆိုပြီး ရေးသားနေတဲ့ လူတွေကလည်း NLD ထဲမှာ အမှန်တကယ် ဖြုတ်ထုတ်သတ် လုပ်နေတာတွေကို မသိရှာကြပါဘူး။ ဒီနေ့ခေတ်မှာ ဘလော့ရေးပြီး သူရဲကောင်းလုပ်နေတဲ့ အတိုက်အခံ ဘလော့ဂါတွေကိုလည်း အဘိုးကြီးများက ပြင်းပြင်းထန်ထန် ရှုံ့ချခဲ့ပြီး NLD ထဲမှာ အဘိုးကြီးများကို ဆရာလုပ်သောလူငယ်များ နဲ့ အဘိုးကြီးများရဲ့ အဆိုပြုချက်များကို မထောက်ခံတဲ့ လူငယ်များအားလုံးကို ပါတီမှ ထုတ်ပယ်ခဲ့ကြောင်း ဝီကီလိစ် က ရေးသားထားပါတယ်။

NLD ဟာ အဖွဲ့အတွင်းမှာတင် သဘောထားကွဲနေတာ မဟုတ်ပါဘူး။ လူတိုင်းနဲ့ မတည့်တဲ့ ချက်ကြီးဖြစ်နေပါတယ်။ အစိုးရလုပ်သမျှကို ဘာလုပ်လုပ် ကန့်ကွက်နေခဲ့ပါတယ်။ တိုင်းရင်းသား လက်နက်ကိုင်အဖွဲ့တွေနဲ့လည်း တွေ့ဆုံစကားပြောတာတွေ မရှိခဲ့ပါဘူး။ ၁၉၉၀ ရွေးကောက်ပွဲကို ပါးစပ်က မချပေမယ့်လည်း ၉၀ ရွေးကောက်ပွဲ တုန်းက အနိုင်ရခဲ့တဲ့ အမတ်လောင်းတွေ ပေါင်းပြီးဖွဲ့ထားတဲ့ CRPP က ခေါင်းဆောင်များနဲ့လည်း အဆင်မပြေခဲ့ပါဘူး။ ဘယ်သူနဲ့မှ ပေါင်းလို့မရသလို ဘယ်သူ့အကြုံကိုမှ လက်မခံတဲ့ တယူသန် တစောက်ကန်း အစွန်းရောက်နေတဲ့ အဖွဲ့ကြီးဖြစ်ကြောင်း အမေရိကန် သံတမန်က သတင်းပေးပို့ထားပါတယ်။“

NLD ပါတီရဲ့ ရုံးမှာ အစည်ကားဆုံးနေ့ဆိုတာ သက်ကြီးပူဇော်ပွဲနေ့ဖြစ်ပါတယ်။ အဘိုးကြီးတွေက ရွေးကောက်ပွဲ မဝင်ဖို့ ဆုံးဖြတ်ခဲ့ပြီးချိန်မှာ အာဏာရဖို့ မဖြစ်နိုင်တော့ဘူးလို့ ယူဆခဲ့တာကြောင့် သက်ကြီးပူဇော်ပွဲနေ့ကလွဲပြီး ကျန်တဲ့ရက်တွေမှာ ရုံးကို လုံးဝ မသွားကြတော့ပါဘူး။ အခုနောက်ပိုင်း ဒေါ်စုကြည် လွတ်လာမှ ထူးထူးခြားခြားနေ့တွေမှာ ရုံးပြန်တက်ဖို့ ကြိုးစားလာကြပါတယ်။

NLD ရဲ့ အဘိုးကြီးများကို စိတ်ပျက်လာတဲ့ လူငယ်တချို့က NDF ဆိုပြီး ဖွဲ့စည်းချိန်မှာ NLD နဲ့ အတိုက်အခံ နိုင်ငံရေးသမားတို့က အဘိုးကြီးတွေကို ဆန့်ကျင်သဖြင့် ပြင်းပြင်းထန်ထန် ဝေဖန်ရှုံ့ချခဲ့ကြပါတယ်။ NLD လူကြီးနဲ့ လူငယ်တင်မက ပါဘူး။ လူငယ်အချင်းချင်းလည်း မတည့်ကြပါဘူး။ အမျိုးမျိုး သဘောထားကွဲနေကြပါတယ်။ ဦးခင်မောင်ဆွေ တို့ကို အမျိုးမျိုး ထိုးနှပ်ခဲ့ကြပြီး၊ မင်းကိုနိုင်နဲ့ ကိုကိုကြီးတို့ နှစ်ယောက်ကလည်း ထောင်ထဲမှာနေရင်း ရွေးကောက်ပွဲ ဝင်ဖို့ မဝင်ဖို့ကို ကြီးကြီးကျယ်ကျယ် သဘောထား ကွဲခဲ့ကြကြောင်း ဝီကီလိစ် က ဖွင့်ချသွားပါတယ်။

နောက်တစ်ခုက မြန်မာ့နိုင်ငံရေး အတိုက်အခံတို့ အလွန်အင်မတန် အထင်ကြီးလေးစား အားကိုးတဲ့ အမေရိကန် နိုင်ငံအနေနဲ့ ရင်းနီးတဲ့ နိုင်ငံ အချင်းချင်းကိုတောင် သူလျှိုများစွာ လွှတ်ထားကြောင်း ဝီကီလိစ်က ပိုးစိုးပက်စက် ဖွင့်ချထားတာကို ကြည့်ပြီး အမေရိကန် နိုင်ငံရဲ့ သဘောထားအမှန်ကို သိသင့်ပါတယ်။ အမေရိကန် အနေနဲ့ ရင်းရင်းနီးနီး ဆက်ဆံမှုနောက်ကွယ်မှာ မရိုးသားမှုတွေ အများကြီးရှိခဲ့ကြောင်း ဝီကီလိစ် ကို သေချာ လေ့လာကြည့်ရင် သိနိုင်ပါတယ်။ ဒီတော့ သိပ်ပြီး အထင်ကြီး အားကိုးနေသူများ သတိချပ်သင့်ပါပြီ။

ဒီနေ့ နိုင်ငံရေးလောကမှာရှိတဲ့ အတိုက်အခံအားလုံးကတော့ အဘိုးကြီးတွေကိုပဲ ထောက်ခံပါတယ်။ နေရာတိုင်းမှာ ဘဘ၊ ဘဘ ဆိုပြီး ထောက်ခံရေးသားထားပါတယ်။ လူငယ်တွေကို အားပေးရေးသားထားတာ တစ်နေရာမှာမှ မရှိပါဘူး။ NDF ကိုလည်း အားမပေးခဲ့ကြပါဘူး။ ဘာမှ အစွမ်းအစ မရှိတော့တဲ့ အဘိုးကြီးတွေဆီမှာပဲ တပည့်ခံပြီး မြန်မာပြည်သူတို့အကျိုးအတွက် ဆိုးကျိုးတွေပဲ ပေးနေကြဖို့ ကြိုးစားနေကြပါတယ်။ NLD အကြောင်းနဲ့ ဒေါ်စု အကြောင်း မကောင်းပြောသူမှန်သမျှကို ရန်သူလိုသဘောထားပြီး မျက်စိစုံမှိတ် ဖင်ပိတ်ငြင်းနေခဲ့ကြပါတယ်။ မျက်ကန်းတစေ မကြောက် ဆိုသလိုပဲ ဘာမှ ပြည်သူလူထု ရဲ့ အနာဂါတ်အတွက် စိုးရိမ် ကြောက်လန့်မှု မရှိခဲ့ကြပါဘူး။ ခု ဆိုရင် ဝီကီလိစ်က NLD ရဲ့ အမှန်တရားတွေနဲ့ အမေရိကန်ရဲ့ သဘောထားမှန်တွေကို ဖွင့်ချချိန်မှာတော့ အားလုံး ကိုယ့်အလုပ်တွေက ပြည်သူလူထုအတွက် အဆိပ်အတောက် ဖြစ်နေပါလားဆိုတာ ပြန်လည် သုံးသပ်ဖို့လိုအပ်လာပါပြီ။ မျက်ကန်းတစ်ယောက်ကဲ့သို့ ကိုယ့်ကိုယ်ကို အမှောင်ချ ထားတဲ့ ဘဝကို စွန့်ပြီး အလင်းရှာသင့်ပါပြီ။ မျှမျှတတ နဲ့ မှန်မှန်ကန်ကန်တွေးတက်အောင် အသိပညာနဲ့ အတက်ပညာ အားနည်းမှုကို ဖြည့်စည်းဖို့ လေ့လာသင့်ပါပြီ။ မြန်မာ စာဆိုတစ်ခု ရှိခဲ့ဖူးပါတယ်.. ”ပညာမတတ်သောသူသည်.. အကန်းနှင့် တူသည်” တဲ့။ ပညာမဲ့သော အကန်းများ ဘဝမှ မြန်မာအတိုက်အခံ နိုင်ငံရေးသမားတို့ အမြန်လွတ်မြောက်ကြပါစေ.....။

မျက်ကန်းထဲမှာ ကျွန်တော် မောင်ဒေါ်လာစား မပါဘူး။ ဘာကြောင့်လဲဆိုတော့ အစကတည်းက ကျွန်တော် အောက်ပါအတိုင်း ဖွင့်ချထားပြီးသားဖြစ်လို့ပါ။

• မြန်မာ့အသက်အကြီးဆုံး ပုဂ္ဂိုလ်များ စုဝေးရာ ထူးဆန်းသော အဖွဲ့ကြီး

ဒုတ်ကောက်ကိုယ်စီ တက်ညီလက်ညီ၊

အသက်(၆၀) မပြည့်က မဝင်ရ၊

တောင်ဝှးကိုင်ပြီး နိုင်ငံကို ကာကွယ်မယ်၊

ကမ္ဘာ့အသက်အကြီးဆုံး ပါတီခေါင်းဆောင်များ၊

ပြည်သူအားလုံး ပါရမယ် (ဆံပင်ဖြူသူ၊ သွားမရှိသူ၊ ထိပ်ပြောင်သူ၊ မျက်စိမှုန်သူ၊ နားလေးသူ)၊

ဗာရာနသီပြည်ကို ဗြဟ္မဒတ်မင်းကြီးရဲ့ အုပ်ချုပ်ခဲ့တဲ့ အခြေခံဥပဒေ မူကြမ်းကိုပဲ ထောက်ခံရမယ်၊

ဘာမှမပူနဲ့ အဘိုးတို့ရှိတယ်၊

၁၂ ကို စိတ်ထဲမှာ မှတ် လက် ၁၀ ချောင်းထောင်၊

ဒါတော့ အဘယူလိုက်မယ် ကျန်တာတော့ ကိုယ့်ဘာကို ဝေစုခွဲကြ

ကျယ်ကျယ်ပြော မကြားရဘူး၊

မသေခင် ဝန်ကြီးတစ်နေရာလောက်ရရင် ကျေနပ်ပါပြီ၊

ရှေ့ကနေ ဦးဆောင်ပြီး တကမ္ဘာလုံးကို ကျော်တက်ပြမယ်၊

• သင့်နိုင်ငံရဲ့ အနာဂါတ်ကို ဤ အဖွဲ့ကြီးသို့သာ ပုံအပ်လိုက်ပါ

အဓိက ခန်းဝင်ပစ္စည်း - အိုးတွေ၊ ပန်းကန်တွေ

အဓိက ရည်ရွယ်ချက်က - စားဖို့၊ သောက်ဖို့

အဓိက အမာခံ အဖွဲ့ဝင်တွေက - ၇၀ ကျော် အဖိုးကြီးတွေနဲ့ ၇ နှစ်အောက် ကလေးတွေ

အဓိက အလုပ်က - အားတိုင်း အစည်းအဝေးလုပ်၊ များများအိပ်ငိုက်

အဓိက တာဝန်ယူနေတာက - ဝန်ကြီး (အိပ်မက်ထဲမှာ)

Myanmar Express

Posted in: အသုံးမကျတဲ့ ဒေါ်စု နဲ့ NLD