ရှမ်းပြည်နယ် NLD ကိုယ်စားလှယ်လောင်း ရွေးချယ်ခြင်းအပေါ် မကျေနပ်မှုများ ဒေါ်အောင်ဆန်းစုကြည်ထံ တင်ပြမည်

From : ..The Voice Weekly.

အမျိုးသားဒီမိုကရေစီအဖွဲ့ချုပ် (NLD ပါတီ) ဗဟိုက ရွေးချယ်ထားသော ရှမ်းပြည်နယ် ကိုယ်စားလှယ်လောင်း အမည်စာရင်းအပေါ် ကျေနပ်မှု မရှိခြင်းကို NLD ပါတီ ဥက္ကဋ္ဌ ဒေါ်အောင်ဆန်းစုကြည်၏ ရှမ်းပြည်နယ်ခရီးစဉ်တွင် တင်ပြသွားမည် ဖြစ်ကြောင်း တောင်ကြီးမြို့နယ် NLD ပါတီဝင်များထံမှ သိရသည်။
ဒေါ်အောင်ဆန်းစုကြည်သည် ရှမ်းပြည်နယ်တောင်ပိုင်း ပအိုဝ်းကိုယ်ပိုင်အုပ်ချုပ်ခွင့်ရ ဒေသသို့ သွားရောက်မည် ဖြစ်ပြီး သြဂုတ်လ ၁၄ ရက်နှင့် ၁၅ ရက် နှစ်ရက်ကြာမည့် ယင်းခရီးစဉ်တွင် ပါတီ (ဗဟို) က ရှမ်းပြည်နယ် မဲဆန္ဒနယ်များတွင် ယှဉ်ပြိုင်ရန် ရွေးချယ်ထားသော ကိုယ်စားလှယ်လောင်းများစာရင်း အပေါ် ကျေနပ်မှုမရှိသည့် ကိစ္စရပ်ကို တင်ပြသွားမည် ဖြစ်ကြောင်း ၎င်းတို့က ဆိုသည်။
“အမေစု လက်ထဲရောက်အောင် စာထည့်မယ်၊ ကိုယ်စားလှယ်လောင်းစာရင်းကို ပြန်ပြင်တာ မပြင်တာထက် ကျွန်တော်တို့ ဒီလိုဖြစ်နေတာ အဖြစ်မှန်ကို သိအောင်တော့ လုပ်မယ်” ဟု တောင်ကြီးမြို့နယ် NLD ပါတီဝင် ဦးရွှေက ဆိုသည်။
အလားတူ ရှမ်းပြည်နယ်အတွင်း ယှဉ်ပြိုင်ရန် ကိုယ်စားလှယ်လောင်း ၁၅၂ ဦး ၏ အမည်စာရင်းကို NLD ပြည်နယ်ရွေးကောက်ပွဲ အောင်နိုင်ရေးကော်မတီက ဗဟိုသို့ ပေးပို့ခဲ့သော်လည်း ရွေးချယ်ခံရသော ကိုယ်စားလှယ်လောင်း အမည်စာရင်းတွင် ပြည်နယ်မှ တင်သွင်းသူ သုံးဦးသာ ပါရှိကြောင်း NLD ပါတီ ရှမ်းပြည်နယ်ဥက္ကဋ္ဌ ဒေါ်ခင်မို့မို့က ဆိုသည်။
“ကျွန်မကိုယ်တိုင် ဗဟိုကို ပို့ခဲ့တာပဲ။ ဒါပေမဲ့ တကယ်စာရင်းထွက်လာတော့ ကျွန်မတို့ တင်ပေးလိုက်တဲ့သူတွေထက် ဗဟိုက သတ်မှတ်ပေးတာတွေ ဖြစ်တော့ အောက်ခြေပါတီဝင်တွေကလည်း မမျှတဘူး ဖြစ်ကုန်တာပေါ့” ဟု ၎င်းက ဆိုသည်။
အလားတူ ရှမ်းပြည်နယ်အတွင်း ကိုယ်စားလှယ်လောင်း အမည်စာရင်းကို ပါတီဝင်များ အထင်အမြင်လွဲမှားမှု မရှိစေရေး ပြန်လည်စိစစ်ပေးရန် NLD ပါတီ (ဗဟို) အောင်နိုင်ရေးကော်မတီ ဥက္ကဋ္ဌ သူရဦးတင်ဦးထံ စာပေးပို့ထားကြောင်း ရှမ်းပြည်နယ် NLD ပါတီထံမှ သိရသည်။
အလားတူ အထွေထွေရွေးကောက်ပွဲတွင် ယှဉ်ပြိုင်မည့် NLD ပါတီ၏ ကိုယ်စားလှယ်လောင်း အမည်စာရင်းကို ထုတ်ပြန်ခဲ့ပြီး နောက်ပိုင်းတွင် တိုင်းဒေသကြီးနှင့် ပြည်နယ်အချို့ရှိ မြို့နယ်အဆင့် ပါတီဝင်များက ကန့်ကွက်ဝေဖန်မှုများ ထွက်ပေါ်လျက်ရှိသည်။

.. https://www.facebook.com/MyanmarExpress
 

Posted in: NLD ပါတီတွင်း အကွဲအပြဲများ နှင့် လမ်းခွဲရှင်းတမ်းများ