အဆင်မပြေမှုများကြောင့် NLD ၏အခြေခံဥပဒေ လူထုဆန္ဒကောက်ခံမှု အချိန်တစ်လ တိုးမြှင့် ~ Myanmar Express

From : .. the voice

အမျိုးသား ဒီမိုကရေစီ အဖွဲ့ချုပ် NLD ပါတီ၏ အခြေခံဥပဒေ ပြင်ဆင်ရေး (သို့မဟုတ်) အသစ်ပြန်လည် ရေးဆွဲရေး လူထုဆန္ဒ ကောက်ခံမှုကို အချိန်တစ်လ တိုးမြှင့်လိုက်ကြောင်း NLD အခြေခံဥပဒေ ပြင်ဆင်ရေး ကော်မတီဝင် တရားလွှတ်တော် ရှေ့နေ ဦးကိုနီက ပြောကြားသည်။

၂၀၀၈ ဖွဲ့စည်းပုံ အခြေခံဥပဒေ ပြင်ဆင်ရေး (သို့မဟုတ်) အသစ်ပြန်လည် ရေးဆွဲရေးကို မူလက နိုဝင်ဘာ ၁၀ ရက်နေ့တွင် အပြီးသတ်မည် ဖြစ်သော်လည်း ဒီဇင်ဘာ ၁၅ ရက်အထိ တိုးမြှင့်ကာ လူထုဆန္ဒ ကောက်ခံမှုများ ပြုလုပ်သွားမည် ဖြစ်ကြောင်း ၎င်းကရှင်းပြသည်။
“ဖွဲ့စည်းပုံ အခြေခံဥပဒေ လေ့လာသုံးသပ်ရေး ပူးပေါင်း ကော်မတီက ထပ်ပြီးတော့ အချိန် တိုးပေးလိုက်တာကြောင့်ပါ” ဟု ၎င်းကဆိုသည်။

ပြည်ထောင်စုလွှတ်တော်က ဖွဲ့စည်း ပေးထားသော အခြေခံဥပဒေ လေ့လာသုံးသပ်ရေး ပူးပေါင်းကော်မတီသို့ အခြေခံဥပဒေနှင့် ပတ်သက်သော အကြံပြုချက်များကို မူလက နိုဝင်ဘာ ၁၅ ရက်နေ့ နောက်ဆုံးထား ပေးပို့ရမည် ဖြစ်သော်လည်း ဒီဇင်ဘာ ၃၁ ရက်နေ့ မတိုင်မီ ပေးပို့ရန် အဆိုပါ ကော်မတီက သတင်းထုတ်ပြန်ထားသည်။
NLD ပါတီ အခြေခံဥပဒေ ပြင်ဆင်ရေး ကော်မတီကို စက်တင်ဘာ ပထမပတ်အတွင်း ဖွဲ့စည်းခဲ့ပြီး၂၀၀၈ အခြေခံဥပဒေ ပြင်ဆင်ရေး (သို့မဟုတ်) အသစ်ပြန်လည် ရေးဆွဲရေးကို ပြည်သူ့ဆန္ဒ ကောက်ခံကာ အခြေခံဥပဒေ လေ့လာသုံးသပ်ရေး ပူးပေါင်းကော်မတီသို့ ပေးသွားမည် ဖြစ်ကြောင်း NLD ပါတီမှ ထုတ်ပြန် ကြေညာထားသည်။

ဖွဲ့စည်းပုံ အခြေခံဥပဒေ ပြင်ဆင်ရေး လေ့လာသုံးသပ်ရေး ပူးပေါင်းကော်မတီ၏ ၂၀၀၈ ဖွဲ့စည်းပုံ အခြေခံဥပဒေမှ တွေ့ရှိချက် အစီရင်ခံစာကို လာမည့် ဒီဇင်ဘာလ ၃၁ ရက်နေ့ မတိုင်မီ ပြည်ထောင်စုလွှတ်တော်သို့ တင်ပြရန် အမိန့်ကြော်ငြာစာ ထုတ်ပြန် ထားသော်လည်း ၂၀၁၄ ခုနှစ် ဇန်နဝါရီလ ၃၁ ရက်တွင် တင်ပြရန် နိုဝင်ဘာလ ၇ ရက် ကျင်းပသော ပြည်ထောင်စုလွှတ်တော် အစည်းအဝေးတွင် အတည်ပြုထားသည်။

အဆိုပါ အခြေခံဥပဒေ ဥပဒေ ပြင်ဆင်ရေး (သို့မဟုတ်) အသစ်ရေးဆွဲရေး ရန်ကုန် တိုင်းလုံးကျွတ် လူထုဆန္ဒ ကောက်ယူမှုကို နိုဝင်ဘာ ၁၀ ရက်နေ့တွင် ကျင်းပမည် ဖြစ်ပြီး ပြည်ထောင်စုလွှတ်တော်မှ အချိန်ထပ်မံ တိုးမြှင့်လိုက်သောကြောင့် မြို့နယ်အဆင့်နှင့် ရပ်ကျေးအဆင့် လူထုဆန္ဒ ကောက်ခံမှုများကို ဆက်လက် ပြုလုပ်သွားမည် ဖြစ်ကြောင်း NLD ပါတီမှ သိရသည်။