အစိုးရ နှင့် ABSDF အပစ်အခတ် ရပ်စဲရေး ဘားအံတွင် လက်မှတ်ထိုးမည်

From : ..the voice

ရှစ်လေးလုံး ဒီမိုကရေစီ အရေးတော်ပုံတွင် ပါဝင်ခဲ့သော ကျောင်းသား အများစုဖြင့် ဖွဲ့စည်းထားပြီး ကျောင်းသားအချင်းချင်း ရက်ရက်စက်စက် သတ်ဖြတ်ခဲ့မှုဖြင့် နာမည်ပျက်နေသော  မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ် တပ်ဦး (ABSDF) နှင့် ပြည်ထောင်စု ငြိမ်းချမ်းရေး ဖော်ဆောင်ရေးလုပ်ငန်း ကော်မတီတို့သည် ကရင်ပြည်နယ် ဘားအံမြို့၌ အပစ်အခတ် ရပ်စဲရေး လက်မှတ်ရေးထိုး မည် ဖြစ်ကြောင်း မြန်မာ ငြိမ်းချမ်းရေး စင်တာမှ တာဝန်ရှိသူ တစ်ဦးက ပြောကြားသည်။

ပြည်ထောင်စု ငြိမ်းချမ်းရေး ဖော်ဆောင်ရေးလုပ်ငန်း ကော်မတီ ဒုတိယ ဥက္ကဋ္ဌ ဦးအောင်မင်းနှင့် ABSDF ဥက္ကဋ္ဌ ဦးသံခဲ ဦးဆောင်သော ကိုယ်စားလှယ်အဖွဲ့သည် သြဂုတ်လ ၄ ရက်နေ့တွင် ကရင် ပြည်နယ် ဘားအံမြို့၌ ပြည်နယ်အဆင့် အပစ်အခတ် ရပ်စဲရေး လက်မှတ်ရေးထိုး မည် ဖြစ်ကြောင်း ၎င်းကဆိုသည်။

“တွေ့ဆုံ ညှိနှိုင်းမှုတွေ အဆင့်ဆင့် လုပ်ပြီးပြီဆိုတော့ ဒီတစ်ခါ အပြီးသတ် လက်မှတ်ထိုးနိုင်မှာပါ” ဟု မြန်မာ ငြိမ်းချမ်းရေးစင်တာမှ ဦးညိုအုန်းမြင့် က ပြောကြားသည်။

ABSDF အဖွဲ့သည် ရန်ကုန်မြို့ မင်းဓမ္မလမ်းရှိ MCC ခန်းမတွင် သြဂုတ်လ ၆ ရက်နေ့မှ ၈ရက်နေ့အထိ ကျင်းပမည့် ရှစ်လေးလုံး အရေးတော်ပုံ ငွေရတု အခမ်းအနား မတိုင်မီ နှစ်ရက် အလိုတွင် ယင်းကဲ့သို့ အပစ်အခတ် ရပ်စဲရေး လက်မှတ်ရေးထိုးရန် ဆုံးဖြတ်ခဲ့ခြင်း ဖြစ်သည်။

အဆိုပါ MCC အဖွဲ့၏ ကိုယ်စားလှယ်များသည် ယင်းအခမ်းအနား တွင် မြန်မာ့နိုင်ငံရေး ရှေ့ခရီးနှင့် ပတ်သက်သည့် စာတမ်းများ တင်သွင်း မည် ဖြစ်ကြောင်း အဆိုပါ အဖွဲ့မှ တာဝန်ရှိသူ တစ်ဦးက ပြောကြားသည်။

ပြည်တွင်း ငြိမ်းချမ်းရေးနှင့် အမျိုးသား ပြန်လည် သင့်မြတ်ရေးတို့ကို ဦးတည်၍ ဆွေးနွေး ညှိနှိုင်း သွားမည် ဖြစ်ပြီး ဆွေးနွေးပွဲ ရလဒ်ကို ပြည်သူ အားလုံးထံ ပြန်လည် တင်ပြမည် ဖြစ်ကြောင်း ABSDF ဗဟို ကော်မတီက ထုတ်ပြန် ကြေညာထားသည်။

ABSDF နှင့် ပြည်ထောင်စုဝန်ကြီး ဦးအောင်မင်း ဦးဆောင်သည့် ငြိမ်းချမ်းရေး ကိုယ်စားလှယ်များ ၂၀၁၂ ခုနှစ်မှ စတင်ကာ ငါးကြိမ်တိတိ အလွတ် သဘော တွေ့ဆုံ ညှိနှိုင်းမှုများ ပြုလုပ်ခဲ့ပြီးနောက် ယင်းသို့ အပြီးသတ် သဘောတူ လက်မှတ် ရေးထိုးရန် သဘောတူလိုက်ခြင်း ဖြစ်ကြောင်း အဆိုပါ ထုတ်ပြန်ချက်အရ သိရသည်။

.
. www.MyanmarExpress.net
 

Posted in: တိုက်ပွဲသတင်း