ကက်သရင်းအက်ရ်ှတန်၏ သမိုင်းဝင် ပထမဆုံးခရီးစဉ်အပြီး ပိတ်ဆို့မှုအားလုံး ပယ်ဖျက်မည်ဟု ယူဆ

From : ခေတ်လူငယ်

EU ၏ နိုင်ငံခြားရေးမူဝါဒဆိုင်ရာ အကြီးအကဲဖြစ်သူ မစ္စကက်သရင်းအက်ရ်ှတန်အနေဖြင့် သူ၏သမိုင်းဝင်ခရီးစဉ်အဖြစ် မြန်မာနိုင်ငံသို့ လာမည့်ဧပြီလတွင် လာရောက်မည်ဖြစ်ကာ ယင်းအလည်အပတ်ခရီးစဉ်တွင် ပိတ်ဆို့မှုပယ်ဖျက်ပေးရေးအတွက် သေချာပေါက်နီးပါး ဖြစ်ပေါ်လာလိမ့်မည်ဟု ယူဆကြောင်း ပြည်တွင်းမှ နိုင်ငံရေးနှင့် စီးပွားရေးလောကမှ ထင်ရှားသူအချို့က သုံးသပ်ပြောကြားသည်။ ကက်သရင်းအက်ရ်ှတန်အနေဖြင့် မြန်မာနိုင်ငံ၏ ကြားဖြတ်ရွေးကောက်ပွဲ အနေအထားကို လာရောက်လေ့လာရန်နှင့် မြန်မာနိုင်ငံအပေါ် ပိတ်ဆို့အရေးယူထားမှုများကို ပယ်ဖျက်ရန် လာရောက် လေ့လာခြင်းဖြစ်ကြောင်း သိရသည်။ “လက်တွေ့မြင်မှ ယုံကြည်မယ်ဆိုသလိုပဲ။ အနီးကပ်လာကြည့်မှ ယုံကြည်မှုတွေ တိုးပွားစေမှာပါပဲ။ မြန်မာအစိုးရအပေါ် လာရောက်လေ့လာတာဖြစ်သလို မြန်မာက အသင်းအဖွဲ့အစည်းကြီးတွေကိုလည်း ဝင်ရောက်လေ့လာ တွေ့ဆုံသွားပါလိမ့်မယ်။ အသင်းချုပ်အနေနဲ့ကတော့ လက်ရှိအနေအထားအရှိကို အရှိအတိုင်း ရှင်းပြသွားမှာပါပဲ။ ပိတ်ဆို့မှုတွေ ပယ်ဖျက်သွားလိမ့်မယ်လို့ တွက်ဆထားသလို အစိုးရနဲ့ ပြည်သူလူထုက အလုပ်စွမ်းအား (Capacity) ထိန်းညှိပြီး လုပ်ဆောင်သွားဖို့လိုတယ်” ဟု UMFCCI ဒုတိယ ဥက္ကဋ္ဌ ဒေါက်တာမောင်မောင်လေးက ပြောကြားသည်။ “မြန်မာနဲ့ EU ရဲ့ ဆက်ဆံရေးက ဧပြီလမှာတော့ အရေးကြီးဆုံးကာလ တစ်ခုဖြစ်လာပါပြီ။ ဧပြီလမှာ ပိတ်ဆို့မှုတွေ ပယ်ဖျက်ပေးဖို့ကိစ္စနဲ့ ကက်သရင်းအက်ရ်ှတန်ရဲ့ ခရီးစဉ်က အများကြီးဆက်စပ်နေတယ်။ ဧပြီမှာ သူတို့က ပြည်လည်ဆွေးနွေးကြမှာဖြစ်ပြီး မြန်မာပြည်ကို လာရောက်ခြင်းက ကောင်းသောပြုပြင်ပြောင်းလဲမှုတွေ လုပ်နေတဲ့အနေအထားကို မြင်တွေ့ပြီး ပိတ်ဆိုမှုပယ်ဖျက်ဖို့ ဆွေးနွေးကြပါလိမ့်မယ်” ဟု သမ္မတ၏ နိုင်ငံရေးအကြံပေးအဖွဲ့ ခေါင်းဆောင် ဦးကိုကိုလှိုင်က ပြောကြားသည်။ “EU အကြီးအကဲအနေနဲ့ မြန်မာအစိုးရခေါင်းဆောင်တွေကို အချက်သုံးချက်အရ လာတွေ့တာဖြစ်နိုင်တယ်။ ပိတ်ဆို့မှု တွေပယ်ဖျက်ဖို့၊ မြန်မာအစိုးရသစ် တက်ပြီးကတည်းက EU အကြီးအကဲအနေနဲ့ သူ့ကိုယ်သူ နိုင်ငံအားလုံး ကိုယ်စားပြု မိတ်ဆက်ဖို့နဲ့ မြန်မာနိုင်ငံမှာ EU ရဲ့ ရင်းနှီးမြှုပ်နှံမှုတွေအတွက် လာတာဖြစ်မှာပါ။ အဖွဲ့အစည်းတွေကို လာတွေ့တဲ့အချိန်မှာတော့ ပြောလို့ရသမျှ တိုက်တွန်းလို့ရသမျှကို တိုက်တွန်းပြောကြားသွားမှာပါ” ဟု ငါးလုပ်ငန်းအဖွဲ့ချုပ် ဒုတိယဥက္ကဋ္ဌ ဦးနှင်းဦးက သုံးသပ်ပြောကြားသည်။ EU အနေဖြင့် မြန်မာတွင် ကိုယ်စားလှယ်ရုံးခွဲ ဖွင့်လှစ်မည်ဖြစ်ပြီး ရေလုပ်ငန်းတွင်လည်း ဝင်ရောက်ရင်းနှီးမြှုပ်နှံသွားရန် ဆန္ဒရှိနေကြောင်း ၂၀၁၂ ခုနှစ် ဖေဖော်ဝါရီ ၂ ရက်နေ့ထုတ် ပြည်မြန်မာ ဂျာနယ်တွင် ဖော်ပြထားပါသည်။

Myanmar Express

Posted in: သတင်း