မန္တလေး၌ မြန်မာနိုင်ငံကူး လက်မှတ် ထုတ်ပေးရေး ရုံးခွဲ ဖွင့်လှစ်မည်

From : MRTV4

မြန်မာနိုင်ငံကူး လက်မှတ် ထုတ်ပေးရေး အဖွဲ့မှ တာဝန်ရှိသူ တစ်ဦးရဲ့ ပြောကြားချက် အရ လာမယ့် ဇူလိုင်လ ပထမပတ်မှ စတင်ကာ မန္တလေးတိုင်း ဒေသကြီးမှာ
မြန်မာနိုင်ငံကူး လက်မှတ် ထုတ်ပေးရေး ရုံးခွဲကို ဖွင့်လှစ် သွားမှာ ဖြစ်တယ်လို့ သိရပါတယ်။ အဆိုပါ လက်မှတ် ထုတ်ပေးရေး ရုံးခွဲဟာ မန္တလေးတိုင်း ဒေသကြီး အောင်မြေသာစံ မြို့နယ်၊ ဒေါနဘွား ရပ်ကွက်၊ ၇ လမ်း၊ ၆၄ လမ်းနဲ့ ၆၅ လမ်း ကြားရှိ မြန်မာနိုင်ငံ ရဲတပ်ဖွဲ့ရဲ့ မန္တလေးတိုင်း ဒေသကြီး သတင်း တပ်ဖွဲ့ခွဲမှူးရုံးမှာ ဖွင့်လှစ်မှာ ဖြစ်တယ်လို့ သိရပါတယ်။ အဆိုပါ မြန်မာနိုင်ငံကူး လက်မှတ် ထုတ်ပေးရေး ရုံးခွဲကို ဖွင့်လှစ် ရခြင်းဟာ မန္တလေးတိုင်း ဒေသကြီး အပါအ၀င် အဆိုပါ တိုင်းဒေသကြီး အနီး တ၀ိုက်နဲ့ ရန်ကုန်သို့ လာရောက်ဖို့ အခက်အခဲရှိတဲ့ ပတ်(စ်)ပို့ လျှောက်ထား သူများ အဆင်ပြေ စေရေး အတွက် ဖွင့်လှစ်တာ ဖြစ်တယ်လို့ သိရပါတယ်။

အဆိုပါ ရုံးခွဲကို ဖွင့်လှစ်ပါက ရန်ကုန်တိုင်း ဒေသကြီး မှာရှိနေတဲ့ မြန်မာနိုင်ငံကူး လက်မှတ် ထုတ်ပေးရေး ရုံးအတိုင်း ပတ်စပို့(စ်) များကို ၂၁ ရက် အတွင်း ရရှိအောင် ဆောင်ရွက် ပေးမှာ ဖြစ်သလို ကုန်ကျစရိတ် များဟာလည်း ပုံမှန် အတိုင်း ၃ သောင်းခွဲ ၀န်းကျင်သာ ကုန်ကျမှာ ဖြစ်တယ်လို့ သိရပါတယ်။ ဒါပေမယ့် အဆိုပါ ပတ်စ်ပို့ ရုံးခွဲမှာ မြန်မာ့ စီးပွားရေး ဘဏ်အတွက် ကျသင့်ငွေ သွင်းခြင်းဟာ ရန်ကုန် ပတ်စ်ပို့ရုံး မှာလို တစ်ရုံးထဲမှာ သွင်းရမှာ မဟုတ်ပဲ ရုံးပြင်ပ မှာရှိတဲ့ မြန်မာ့ စီးပွားရေး ဘဏ်မှာ ငွေပေးသွင်း ရမှာ ဖြစ်တယ်လို့ သိရပါတယ်။

အဆိုပါ တိုင်းဒေသကြီးမှာ ပတ်စ်ပို့ လျှောက်ထား လိုသူတွေဟာ မူလ အတိုင်း မှတ်ပုံတင် မူရင်း၊ အိမ်ထောင်စု စာရင်း မူရင်းနဲ့ တက္ကသိုလ် ဘွဲ့ရဖြစ်ပါက ပညာရေး ကင်းရှင်းကြောင်း ထောက်ခံချက်၊ အသက် ၁၀ နှစ်အောက် ကလေးများ ဖြစ်ပါက မွေးစာရင်း ပါရှိရမှာဖြစ်ပြီး အငြိမ်းစား ၀န်ထမ်းများ ဖြစ်ပါက အလုပ်မှ နုတ်ထွက်စာ ဒါမှမဟုတ် ပင်စင်စာတို့ ယူဆောင်ကာ ပတ်စပို့ လျှောက်ထား နိုင်တယ်လို့ သိရပါတယ်။

 Myanmar Express 

Posted in: သတင်း