ရေကြီးရေလျှံ အဖျက်ခံရသော လယ်မြေများအရေး သဘာဝဘေးရန်ပုံငွေမှ သမ္မတ သုံးစွဲခွင့်ပြု

From : ခေတ်လူငယ်

ရေကြီးနစ်မြုပ်မှုကြောင့် ပျက်စီးဆုံးရှုံးသွားခဲ့သည့် လယ်ယာမြေများ ပြန်လည်စိုက်ပျိုးနိုင်ရန် သမ္မတက သဘာဝဘေးအန္တရာယ် ရန်ပုံငွေထဲမှ ထုတ်ယူသုံးစွဲခွင့်ပြုလိုက်ကြောင်း သိရသည်။ ခရိုက် ၆ ခုအနက် ၅ ခု ရေလွှမ်းမိုးမှုဒဏ် ခံခဲ့ရပြီး စိုက်ဧက သုံးသိန်းနီးပါးခန့် ရေနစ်ခြင်းခံခဲ့ရသော ဧရာဝတီတိုင်းဒေသကြီးအတွက် လိုအပ်သော မျိုးစပါးများ ပံ့ပိုးပေးသွားနိုင်ရန် နိုင်ငံတော်သမ္မတက ထိုသို့ခွင့်ပြုပေးခဲ့ခြင်း ဖြစ်သည်ဟု ဧရာဝတီတိုင်းဒေသကြီး ဝန်ကြီးချုပ် ဦးသိန်းအောင်က စီးပွားရေးလုပ်ငန်းရှင်တို့နှင့် တွေ့ဆုံစဉ် ထည့်သွင်း ပြောကြားလိုက်ကြောင်း သိရသည်။ “ဝန်ကြီးချုပ်က တောင်သူတွေကိုလည်း ပြောပါတယ်။ ဘာမှမပူနဲ့ပေါ့။ ဒီကိစ္စအတွက်ကို သမ္မတကြီးက ကူညီပေးမယ်ပေါ့။ ဒီလိုပါ” ဟု မြန်မာနိုင်ငံ ဆန်စပါးလုပ်ငန်းရှင် အသင်းချုပ်မှ ဗဟိုအလုပ်အမှုဆောင် ဒေါက်တာစိုးထွန်းက ပြောသည်။ လက်ရှိ ခိုင်မာသော စာရင်းဇယားများအရ ဧရာဝတီတိုင်းဒေသကြီးတွင် မဖြစ်မနေ ပြန်လည်စိုက်ပျိုးရန်လိုသည့် စိုက်ဧကမှာ တစ်သိန်းနီးပါးခန့်သာရှိပြီး အခြားသော လယ်ဧက တစ်သိန်းခုနှစ်သောင်းတို့မှာ အခြေအနေ ကောင်းမွန်နိုင်သေးသည်ဟု ၄င်းက ဆက်ပြောသည်။ “ရေနစ်တိုင်း ပျက်စီးတာမျိုးမှ မဟုတ်တာဘဲ၊ ရက်ရှည်မှ ပျက်စီးတာ၊ ဒါတွေကို အပိုင်းသုံးပိုင်းခွဲပြီး လုပ်ဖို့ရှိတယ်။ အဓိကလိုမှာကတော့ မျိုးပါပဲ” ဟု ဒေါက်တာစိုးထွန်းက ဆိုသည်။ သဘာဝဘေးအန္တရာယ် ရန်ပုံငွေထဲမှ မည်ရွေ့မည်မျှ ထုတ်သုံးမည် ဆိုခြင်းအပေါ် အတည်ပြုထုတ်ဖော် ပြောဆိုခြင်း မရှိဟု ဧရာဝတီဝန်ကြီးချုပ်၏ အပြောကို ကိုးကား၍ ဒေါက်တာစိုးထွန်းက ထပ်မံပြောသည်။ စားနပ်ရိက္ခာ ဖူလုံရေးအဖွဲ့မှ စိုက်ပျိုးရေးဆိုင်ရာ ဒေါက်တာဘွဲ့ရ အမျိုးသမီး အရာရှိက “အခုရသလောက် ဒေတာတွေ ကောက်ယူနေပါတယ်။ စာရင်းက မငြိမ်သေးတော့ ပြောဖို့ ခက်နေသေးတယ်။ အခုကတော့ ကယ်ဆယ်ရေးစခန်းတွေအတွက် လိုတာတွေပဲ လှူနေပါတယ်။ ရှေ့ဆက်ပြီး လှူမှာကတော့ မျိုးပါပဲ။ ဒေသနဲ့ကိုက်ညီပြီး စိုက်ပျိုးလို့ရမယ့် မျိုးပါ” ဟု ပြောသည်။ ဆန်စပါးလုပ်ငန်းရှင် အသင်းချုပ်မှ ရရှိသော သတင်းများအရ ဧရာဝတီတိုင်းဒေသကြီး၊ ပဲခူးတိုင်းဒေသကြီး၊ ရန်ကုန်တိုင်းဒေသကြီး၊ တနင်္သာရီတိုင်းဒေသကြီး၊ မွန်ပြည်နယ်တို့တွင် ဆုံးရှုံးမှုများနေပြီး ခန့်မှန်းဧက လေးသိန်းနီးပါးခန့် ရေမြုပ်ခြင်းခံခဲ့ရကြောင်း ကျန်ပြည်နယ်နှင့် တိုင်းဒေသကြီး တို့တွင်မူ ဧကတစ်သောင်း အောက်တွင်သာ ရှိသည်ဟု သိရသည်။ လက်ရှိတွင် ပြန်လည်စိုက်ပျိုးရန်လိုသော မိုးစပါး စိုက်ဧကမှာ တစ်နိုင်ငံလုံးတွင် နှစ်သိန်းမကျော်ဟု ပညာရှင်အများစုက သုံးသပ်ကြကြောင်း ၂၀၁၂ ခုနှစ် သြဂုတ်လ ၂၃ ရက်နေ့ထုတ် Popular News ဂျာနယ်တွင် ဖော်ပြထားပါသည်။

Myanmar Express

Posted in: သတင်း