အငှားယာဉ်များကို ထိန်းသိမ်းကြပ်မတ်တော့မည်

From :7Days News

ရန်ကုန်မြို့အတွင်း ပြေးဆွဲသွားလာနေသော အငှားယာဉ် (Taxi)များအား စည်းကမ်းထိန်းသိမ်း ကြပ်မတ်နိုင်ရန်အတွက် အဖွဲ့အစည်းတစ်ရပ် ဖွဲ့စည်းဆောင်ရွက်သွားရန် စီစဉ်နေပြီဖြစ်ကြောင်း ရန်ကုန်တိုင်းဒေသကြီး မော်တော်ယာဉ်လုပ်ငန်းပေါင်းစုံ ထိန်းသိမ်းရေးကြီးကြပ်မှု ဗဟိုကော်မတီဥက္ကဋ္ဌ ဦးလှအောင်ကပြောသည်။ “အငှားယာဉ်တွေ စည်းကမ်းဖောက်မှု လျော့နည်းလာအောင် အဖွဲ့အစည်းတစ်ခုဖွဲ့ပြီး ဆောင်ရွက်ဖို့ တိုင်းဒေသကြီးအစိုးရအဖွဲ့က ညွှန်ကြားလာတဲ့အတွက် ခရီးသည်တင်ယာဉ်လိုင်းတွေကို ကြပ်မတ်တဲ့ အဖွဲ့အစည်းတွေလို အဖွဲ့တစ်ခုဖွဲ့ဖို့ စတင်ဆောင်ရွက်နေပါပြီ”ဟု ဦးလှအောင်ကပြောသည်။ လက်ရှိတွင် အငှားယာဉ်များကို ခရိုင်စည်ပင်သာယာရေးကော်မတီများက စိစစ်လျက်ရှိပြီး အငှားယာဉ်များနှင့် ပတ်သက်သည့် စာရင်းဇယားအတိအကျကို ၎င်းတို့ထံမှ တောင်းယူစုဆောင်းနေကြောင်း၊ ယခုနောက်ပိုင်း အင်္ဂလိပ်အက္ခရာနံပါတ်များနှင့် ၀င်ရောက်လာသော အငှားယာဉ်များမှာမူ သက်ဆိုင်ရာ စည်ပင်ဌာနတွင် စာရင်းသွင်းထားခြင်း မရှိသေးသဖြင့် အဆိုပါကားများ၏ စာရင်းများကို အတိအကျရရှိနိုင်ရန် ဆောင်ရွက်ရမည်ဖြစ်ကြောင်း ၎င်းကပြောသည်။ အသင်းတစ်ခုဖွဲ့စည်းရန် အခက်အခဲများရှိသဖြင့် အချိန်အနည်းငယ်ယူ ဆောင်ရွက်ရမည်ဖြစ်ပြီး လတ်တလောတွင် မထသ(ဗဟို)မှ ယာဉ်စည်းကမ်းထိန်းသိမ်းမှု စစ်ဆေးရေးအဖွဲ့များက ယာဉ်ထိန်းရဲများနှင့်ပူးပေါင်းကာ အငှားယာဉ်များအား စစ်ဆေးသွားမည်ဖြစ်ကြောင်း၊ ယာဉ်စည်းကမ်း၊ လမ်းစည်းကမ်းနှင့် မညီညွတ်သည့် ယာဉ်များကို အရေးယူဆောင်ရွက်သွားခြင်းများကို ပြုလုပ်မည်ဖြစ်ပြီး တွေ့ရှိချက်များကို တိုင်းဒေသကြီးအစိုးရသို့ တင်ပြရမည်ဖြစ်ကြောင်း ဥက္ကဋ္ဌကပြောသည်။

 Myanmar Express 

Posted in: သတင်း