နိုင်ငံတော်သမ္မတကြီး ဦးသိန်းစိန် အိန္ဒိယနိုင်ငံသို့ ယနေ့ သွားရောက်

 
အာဆီယံ-အိန္ဒိယ အထိမ်းအမှတ် ထိပ်သီးအစည်းအဝေးသို့ တက်ရောက်ရန် နိုင်ငံတော်သမ္မတ ဦးသိန်းစိန် အိန္ဒိယနိုင်ငံသို့ ဒီဇင်ဘာလ ၂၀ ရက်တွင် သွားရောက်မည်ဖြစ်ကြောင်း နိုင်ငံတော်သမ္မတရုံးမှ တာဝန်ရှိသူတစ်ဦးက ဒီဇင်ဘာလ ၁၉ ရက်က ပြောကြားခဲ့သည်။ 

သမ္မတ ဦးသိန်းစိန်၏ အိန္ဒိယနိုင်ငံခရီးစဉ်မှာ နှစ်ညအိပ် သုံးရက်ခရီးဖြစ်ကြောင်း အဆိုပါတာဝန်ရှိသူက ဆက်လက်ပြောကြားခဲ့သည်။

အာဆီယံ-အိန္ဒိယ အထိမ်းအမှတ် ထိပ်သီးအစည်းအဝေးကို အိန္ဒိယနိုင်ငံ နယူးဒေလီမြို့တွင် ဒီဇင်ဘာလ ၂၀ ရက်မှ ၂၁ ရက်အထိ ကျင်းပမည်ဖြစ်ပြီး ယခုနှစ်သည် အာဆီယံနှင့် အိန္ဒိယနိုင်ငံတို့၏ မိတ်ဖက်ဖြစ်မှု နှစ် (၂၀) ပြည့်မြောက်သောနှစ် ဖြစ်သည်။

အာဆီယံ-အိန္ဒိယ အထိမ်းအမှတ် ထိပ်သီးအစည်းအဝေး၏ ခေါင်းစဉ်မှာ "ASEAN-India Partnership for Peace and Shared Prosperity" ဖြစ်ကြောင်းနှင့် အဆိုပါထိပ်သီးအစည်းအဝေးသို့ အာဆီယံနိုင်ငံများမှ ခေါင်းဆောင်များနှင့် အိန္ဒိယနိုင်ငံ ၀န်ကြီးချုပ် ဒေါက်တာမန်မိုဟန်ဆင်းတို့ တက်ရောက်မည်ဖြစ်ကြောင်း သိရသည်။

အိန္ဒိယနိုင်ငံ ၀န်ကြီးချုပ် ဒေါက်တာမန်မိုဟန်ဆင်းသည် သမ္မတ ဦးသိန်းစိန်၏ ဖိတ်ကြားချက်အရ မြန်မာနိုင်ငံသို့ ၂၀၁၂ ခုနှစ် မေလ ၂၇ ရက်မှ ၂၉ ရက်အထိ ချစ်ကြည်ရေးခရီး လာရောက်ခဲ့ပြီး အဆိုပါခရီးစဉ်အတွင်း နှစ်နိုင်ငံခေါင်းဆောင်များသည် အာဆီယံ-အိန္ဒိယ အထိမ်းအမှတ် ထိပ်သီးအစည်းအဝေးနှင့် ပတ်သက်သည့် လုပ်ဆောင်ဖွယ်ရာများကို နီးကပ်စွာ ပူးပေါင်းဆောင်ရွက်သွားရန်လည်း သဘောတူညီခဲ့သည်။ အဆိုပါခရီးသည် နှစ်ပေါင်း ၂၅ နှစ်အတွင်း အိန္ဒိယ၀န်ကြီးချုပ်တစ်ဦး၏ ပထမဦးဆုံး မြန်မာနိုင်ငံ ခရီးစဉ်ဖြစ်သည်။

သမ္မတ ဦးသိန်းစိန်သည် အိန္ဒိယနိုင်ငံသို့ ၂၀၁၁ ခုနှစ် အောက်တိုဘာလအတွင်း ချစ်ကြည်ရေးခရီး သွားရောက်ခဲ့သည်။

 www.MyanmarExpress.net
 

Posted in: သတင်း