ဗုဒ္ဒဘာသာဝင်များ ပညာရေးအားနည်း ဟု ဟိန္နူဘာသာရေးအဖွဲ့ သုံးသပ်

From : ..myanma age

ပညာရေး အားနည်းခြင်းများနှင့် မြန်မာပြည်သူတို့ အယုံလွယ်ခြင်းများကြောင့် လတ်တလော ပဋိပက္ခများ ဖြစ်ပွားနေခြင်းဖြစ်ကြောင်း ဟိန္နူဘာသာရေးအဖွဲ့အစည်းမှ တာဝန်ရှိသူတစ်ဦးက မြန်မာ့ငြိမ်းချမ်းရေးစင်တာ (MPC)တွင် ပြုလုပ်သည့် လူ့အရပ်ဖက်အဖွဲ့အစည်းများနှင့် ဘာသာပေါင်းစုံဆွေးနွေးပွဲတွင် ပြောကြားခဲ့သည်။

“ကျွန်တော်က အရင်ပညာရေးပိုင်းတခုမှာ တာဝန်ထမ်းဆောင်ဖူးတယ်။ အဲဒါကြောင့် ဒီလိုမျိုး ပြဿနာတွေဖြစ်အောင် ကောလာဟလတွေနဲ့ ပြောတာကို ပြည်သူတချို့ရဲ့ ပညာရည်အားနည်းမှုတခုကြောင့် ဖြစ်ရတယ်လို့ ကျွန်တော် ထင်တယ်။ ပြီးတော့ မြန်မာနိုင်ငံသူ နိုင်ငံသားတွေကလည်း သဘောထားပြည့်ဝပြီး အယုံလွယ်ကြတာရယ် အထိမခံရွှေပန်းကန်တွေဖြစ်နေတာရယ်ကြောင့် ဖြစ်ပါတယ်”ဟု ၎င်းက ပြောကြားသည်။

အဆိုပါဆွေးနွေးပွဲအား ယနေ့ မွန်းလွဲ ၂နာရီခန့်မှ စတင်ကျင်းပခဲ့ရာ ဘာသာရေးအဖွဲ့အစည်းများ အပါအဝင် အရပ်ဖက်အဖွဲ့အစည်း စုစုပေါင်း ၄၉ဖွဲ့ တက်ရောက် ဆွေးနွေးကြောင်း သိရှိရသည်။

သီတဂူဆရာတော်မှလည်း အဆိုပါ အကြမ်းဖက်မှုကိစ္စရပ်နှင့် ပါတ်သက်၍ ဘာသာရေးခေါင်းဆောင်တစ်ယောက် အနေဖြင့် အင်မတန်ရှုံ့ချကြောင်း၊ မြန်မာနိုင်ငံသည် လူ့အရိုင်းအစိုင်းများနေသည့် နိုင်ငံမဟုတ်ကြောင်းနှင့် မြန်မာနိုင်ငံတွင် နေထိုင်ကာ မြန်မာနိုင်ငံ ရေသောက်သည့်အတွက် မြန်မာ့မူအား လေးစားလိုက်နာရန် လိုကြောင်း သဝဏ်လွှာပေးပို့ကာ ဖတ်ကြားစေခဲ့သည်။

နိုင်ငံရေး ပါတီအချို့နှင့် လွှတ်တော်ကိုယ်စားလှယ်အချို့ ကိုယ်စား ဒီမိုကရက်တစ်ပါတီ(မြန်မာ)၏ အတွင်းရေးမှူး ဒေါ်သန်းသန်းနုက ဆွေးနွေးပွဲသို့ တက်ရောက်လာသည့် လူဦးရေ ၁၀၀နီးပါးခန့်ရှိသည့်အတွက် တစ်ဦးချင်းစီ၏ ပါတ်သက်မှုနှုန်းနှင့် ပြန်လည်ပြုပြင်မည်ဆိုပါက ယခုကိစ္စရပ်များ ဆက်လက်ဖြစ်ပွားစရာ အကြောင်း ရှိတော့မည်မဟုတ်ကြောင်း သုံးသပ်ပြောကြားသည်။
အဆိုပါ တွေ့ဆုံဆွေးနွေးပွဲသို့ တက်ရောက်လာသည့် မြန်မာနိုင်ငံရုပ်ရှင်အစည်းအရုံး ဥက္ကဋ္ဌ ဦးဇင်ဝိုင်းကလည်း ယခုကဲ့သို့ ဖြစ်ရခြင်းမှာ နောက်ကွယ်တွင် အဖွဲ့အစည်းတစ်ခု ရှိနေသည်ကို သိရှိသည့် နိုင်ငံတော်အစိုးရအဖွဲ့ အနေနှင့်လည်း ယင်း ကိစ္စရပ်အား မြန်မြန်ဖေါ်ထုတ်၍ သိရှိရုံတင်သိရှိသည် မဟုတ်ဘဲ အရေးယူမှုများ ပြုလုပ်သွားသင့်ကြောင်း ပြောကြားသည်။
ထို့ပြင် လက်ရှိဖြစ်ပွားနေသည့် အဓိကရုဏ်းများ ဆက်လက်မဖြစ်ပွားစေရန်အတွက် နိုင်ငံတော်အစိုးရအဖွဲ့သာမက ယခုတက်ရောက်လာကြသည့် အဖွဲ့အစည်းအသီးသီးတို့မှလည်း ပါဝင်ကာ သက်ဆိုင်ရာအာဏာ ပိုင်အဖွဲ့အစည်းများနှင့် ပူးပေါင်းဆောင်ရွက်ရန် ကတိပြုသင့်ကြောင်း သဘောတူ လက်မှတ်ရေးထိုးကာ ကြေညာချက် ၁၀ ချက် ထုတ်ပြန်ခဲ့သည်။
ယင်းဆွေးနွေးပွဲအား မြန်မာနိုင်ငံတည်ငြိမ်အေးချမ်းရေးနှင့် သဟဇာတဖြစ်ရေးအတွက် အရပ်ဖက်လူ့အဖွဲ့အစည်းနှင့် ဘာသာပေါင်းစုံ ဆွေးနွေးပွဲ ခေါင်းစဉ်ဖြင့် မြန်မာ့ ငြိမ်းချမ်းရေးစင်တာနှင့် စီးပွားရေးနှင့် လူမှုရေးအကြံပေးအဖွဲ့တို့မှ ဦးစီးကျင်းပ ခြင်းဖြစ်ပြီး ဆွေးနွေးပွဲအပြီးတွင် ဘာသာရေးပေါင်းစုံအတူ တကွယှဉ်တွဲနေထိုင်ရေးနှင့် စပ်လျဉ်း၍ ပညာပေးဆွေးနွေးမှုများနှင့် ကျောင်းသင်ခန်းစာများတွင် ပြဠာန်းပေးရန် အချက်တို့ပါကြောင်း သိရသည်။

.. www.MyanmarExpress.net
 

Posted in: သတင်း