ရွှေဆိုင် သုံးဆိုင် ဖျက်စီးခံလိုက်ရ၊ ဗလီတလုံး မီးတင်ရှို့ခံလိုက်ရပြီး၊ မြို့နယ်ပညာရေးမှူးရုံးလည်း မီးလောင်သွား

From : ..bbc

မိတ္ထီလာမြို့က ရွှေဆိုင်တဆိုင်မှာ အရောင်းအ၀ယ် ပြဿနာက အစပြုလို့ တိုက်ခိုက်မှုတွေ ဖြစ်ခဲ့ပြီး ရွှေဆိုင် သုံးဆိုင် ဖျက်စီးခံလိုက်ရပါတယ်။

အဲဒီနောက်ပိုင်းမှာတော့ ဗလီတလုံး မီးတင်ရှို့ခံလိုက်ရပြီး၊ မြို့နယ်ပညာရေးမှူးရုံးလည်း မီးလောင်သွားတယ်လို့ မိတ္ထီလာ အမှတ် ၂ ရဲစခန်းက ဘီဘီစီကို ပြောပါတယ်။

မီးက ဆက်လက် လောင်ကျွမ်းဆဲဖြစ်ပြီး တခြားအိမ်တွေကို ကူးစက် လောင်ကျွမ်းခြင်း မရှိဘူးလို့ သိရပါတယ်။

ပြဿနာအရင်းခံကတော့ ဒီမနက်က ရွှေဆိုင်ရှင် မွတ်ဆလင်က ရွှေလာရောင်းတဲ့ လင်မယားနဲ့ အချင်းများပြီး လာရောင်းသူကို ရိုက်နှက်ခဲ့ရာကနေ မကျေနပ်လို့ ရွှေဆိုင်တွေ ဖျက်စီးခံရတဲ့အထိ ဖြစ်သွားတာ ဖြစ်ပါတယ်။

မိတ္ထီလာမြို့ဈေးကြီးအနားက ရွှေဆိုင်တဆိုင်ကို လင်မယားနှစ်ယောက် ရွှေလာရောင်းရာက အရောင်းအ၀ယ်မှာ ပြဿနာတက်ပြီး ဆိုင်ရှင်က ရိုက်နှက်ခဲ့လို့ ရုန်းရင်းဆန်ခတ် ဖြစ်ခဲ့ပေမယ့် အခုတော့ အခြေအနေတွေကို ရဲတွေက ထိန်းသိမ်းထားလိုက်တယ်လို့ ဘီဘီစီက စုံစမ်းသိရပါတယ်။

မိတ္ထီလာမြို့က နယူးဝိန့်စိန်ရွှေဆိုင်ကို မွတ်ဆလင်က ပိုင်တယ်လို့ သိရပြီး၊ မိတ္ထီလာမြို့နား ပြွန်ကောက်ရွာက ကိုခင်မောင်ဝင်းတို့ လင်မယားက အလှူအတွက် ဒီမနက်က ရွှေလာရောင်းရာက ဈေးနှိမ်တဲ့အပြင် ရွှေလက်ကောက်လည်း ကျိုးပဲ့သွားပြီး ပြန်လုပ်ပေးဖို့ တောင်းဆိုရာက ဆိုင်ရှင်က ကိုခင်မောင်ဝင်းကို ရိုက်နှက်ခဲ့လို့ ပြွန်ကောက်ရွာခံတွေက ဆိုင်ကို ပြန်လာပြီး တိုက်ခိုက်မှုတချို့ လုပ်ခဲ့တယ်လို့ သိရပါတယ်။

မိတ္ထီလာအမှတ် ၂ ရဲစခန်း တာဝန်ကျ အရာရှိကတော့ ရဲအင်အား ၈၀ နဲ့ အခြေအနေကို တည်ငြိမ်အောင် ထိန်းသိမ်းထားလိုက်ပြီလို့ ဘီဘီစီကို ပြောပါတယ်။

အခုလို ဖြစ်ပျက်ခဲ့ပြီးနောက်မှာ မိတ္ထီလာဈေးကြီးက ဈေးဆိုင်တချို့လည်း မွန်းလွဲပိုင်းကစလို့ ပိတ်လိုက်ကြတယ်လို့ သိရပါတယ်။
.
 www.MyanmarExpress.net
 

Posted in: မြန်မာ-ကုလား အဓိကရုဏ်းများ,သတင်း