ပုဂ္ဂလိက ကုမ္ပဏီ (၁၂) ခုကို အာမခံလုပ်ငန်း လုပ်ကိုင်ခွင့်ပြုမည်

From : ခေတ်လူငယ်

မြန်မာ့အာမခံလုပ်ငန်း အနေဖြင့် အာမခံလုပ်ငန်း (၄၈)မျိုးကို လက်ခံဆောင်ရွက်လျက် ရှိသည်။ လက်ရှိ ပြည်သူများ စိတ်ဝင်စားဆုံး အာမခံအမျိုးအစားမှာ ငလျင်၊ မုန်တိုင်း၊ ရေကြီးရေလျှံခြင်းများနှင့် တွဲဖက်ထား ရှိနိုင်သော မီးအာမခံနှင့် ကိုယ်အင်္ဂါထိခိုက်မှု အာမခံတို့ဖြစ်ကြောင်း၊ ထို့ပြင် မော်တော်ယာဉ်အလုံးစုံ အာမခံ၊ သူတစ်ပါး ထိခိုက်မှုအာမခံ၊ ရေကြောင်းအာမခံ၊ လေကြောင်းအာမခံ၊ ခရီးသွားအာမခံ၊ အသက်အာမခံ လုပ်ငန်းများကိုလည်း ဆောင်ရွက်လျက်ရှိကြောင်း သိရှိရသည်။ မြန်မာ့အာမခံလုပ်ငန်းမှ တာဝန်ရှိသူတစ်ဦးက “မကြာမီ အာမခံလုပ်ငန်းကို ပုဂ္ဂလိကကုမ္ပဏီ (၁၂)ခုကိုပါ လုပ်ကိုင်ခွင့်ပြုတော့မှာ ဖြစ်ပါတယ်။ ပုဂ္ဂလိကအာမခံ ကုမ္ပဏီတွေကတော့ အသက်အာမခံလုပ်ငန်း၊ မီးအာမခံလုပ်ငန်း၊ အလုံးစုံမော်တော်ယာဉ် အာမခံလုပ်ငန်း၊ ငွေပို့ငွေသယ် အာမခံလုပ်ငန်း၊ ငွေသားလုံခြုံမှု အာမခံလုပ်ငန်းနဲ့ သမာဓိအာမခံလုပ်ငန်းတို့ကို လုပ်ကိုင်ခွင့်ရရှိမှာ ဖြစ်ပါတယ်။ တိုးတက်လာတဲ့ ဈေးကွက်စီးပွားရေး စနစ်နဲ့အညီ ပြည်တွင်းပြည်ပ ရင်းနှီးမြှုပ်နှံမှုတွေ များပြားလာတဲ့အတွက် ကောင်းမွန်တဲ့ အာမခံစနစ်ဟာ မရှိမဖြစ် လိုအပ်ပါတယ်။ အာမခံစနစ်ဟာ ပြည်သူလူထုရဲ့ အကြောင်းအမျိုးမျိုးကြောင့် ဆုံးရှုံးနစ်နာမှုတွေကို အာမခံထားခြင်းနဲ့ အကာအကွယ်ပေးတဲ့ စနစ်ဖြစ်ပါတယ်။ ဒါကြောင့် ပြည်သူလူထုကို အကာအကွယ်ပေးတဲ့ အကျိုးပြုတဲ့ ကောင်းမွန်တဲ့စနစ် ဖြစ်ပါတယ်” ဟု ပြောကြားသည်။ မြန်မာ့အာမခံလုပ်ငန်း ရုံးခွဲများကို မြန်မာနိုင်ငံတစ်ဝန်း တိုင်းဒေသကြီးနှင့် ပြည်နယ်၊ ခရိုင်များတွင် ရုံးခွဲပေါင်း (၃၈) ရုံးဖွင့်လှစ်ထားရှိပြီး မြန်မာ့အာမခံလုပ်ငန်း (ရုံးချုပ်) ကို ရန်ကုန်မြို့၊ အမှတ်- ၆၂၇-၆၃၅ ကုန်သည်လမ်း၊ ပန်းဘဲတန်းမြို့နယ်၌ ဖွင့်လှစ်ထားကြောင်း ၂၀၁၂ ခုနှစ် နိုဝင်ဘာလ ၃၀ ရက်နေ့ထုတ် မြန်မာ့အလင်း သတင်းစာတွင် ဖော်ပြထားပါသည်။  

 Myanmar Express 

Posted in: သတင်း