မြန်မာ - တိုင်ပေ သရေကျ

From :7day

ရန်ကုန်မြို့တွင် ယနေ့(မတ်လ ၄ ရက်) ကျင်းပလျက်ရှိသည့် AFC Challenge Cup 2014 ပြိုင်ပွဲ၏ အုပ်စု(က)ခြေစစ်ပွဲစဉ်တွင် အိမ်ရှင်မြန်မာအသင်းသည် တရုတ်(တိုင်ပေ)အသင်းနှင့် တစ်ဂိုးစီသရေကျခဲ့သောကြောင့် အုပ်စုနောက်ဆုံးပွဲစဉ်တွင် အိန္ဒိယအသင်းအား အနိုင်ရရှိမှသာ ခြေစစ်ပွဲအောင်မြင်တော့မည်ဖြစ်သည်။

အဆိုပါအုပ်စုတွင် အိန္ဒိယအသင်းသည် နှစ်ပွဲနိုင်ရမှတ်ခြောက်မှတ်ဖြင့် အုပ်စုပထမနေရာတွင် ရပ်တည်နေပြီး အုပ်စုနောက်ဆုံးပွဲစဉ်တွင် မြန်မာအသင်းကို သရေရလဒ်ကစားရုံဖြင့် ခြေစစ်ပွဲ အောင်မြင်မည်ဖြစ်သည်။

အုပ်စု(က)နောက်ဆုံးပွဲစဉ်များအဖြစ် မတ်လ(၆)ရက်တွင် ဆက်လက်ကျင်းပမည်ဖြစ်ရာ ပထမပွဲစဉ် အဖြစ် ဂူအမ်အသင်းနှင့်တရုတ်(တိုင်ပေ)အသင်းတို့သည် ပထမပွဲစဉ်အဖြစ်လည်းကောင်း၊အိမ်ရှင် မြန်မာအသင်းနှင့်အိန္ဒိယအသင်းတို့သည် ဒုတိယပွဲအဖြစ်လည်းကောင်း ယှဉ်ပြိုင်ကစားကြမည်ဖြစ် သည်။

၂၀၁၄ ခုနှစ်တွင် မော်လဒိုက်နိုင်ငံက အိမ်ရှင်အဖြစ်လက်ခံကျင်းပမည့် AFC Challenge Cup နောက်ဆုံးအဆင့်ပွဲစဉ်များအတွက် ခြေစစ်ပွဲစဉ်များကို အသင်းစုစုပေါင်း(၂၀) ၀င်ရောက်ယှဉ်ပြိုင် လျက်ရှိသည်။ခြေစစ်ပွဲအုပ်စု(၃)ခုအားသက်ဆိုင်ရာနိုင်ငံများ၌ လက်ရှိကျင်းပလျက်ရှိပြီး ကျန်အုပ်စု(ခ)နှင့်အုပ်စု(င) ပွဲစဉ်များ ကို ယခုလအတွင်းအပြီး ကျင်းပသွားမည်ဖြစ်သည်။

နောက်ဆုံးအဆင့်ပြိုင်ပွဲကို အုပ်စုတစ်ခုစီမှ ပထမရသည့် အသင်း(၅)သင်း၊အကောင်းဆုံးအုပ်စု ဒုတိယရသည့် အသင်း(၂)သင်းနှင့်အိမ်ရှင်မော်လဒိုက် စုစုပေါင်းအသင်း(၈)သင်းဖြင့် ကျင်းပသွား မည်ဖြစ်သည်။

အဆိုပါပြိုင်ပွဲ၏ ၂၀၁၂ ချန်ပီယံမြောက်ကိုရီးယားအသင်းနှင့်အတူ လာမည့် ၂၀၁၄ ပြိုင်ပွဲတွင် ဗိုလ်စွဲ မည့် အသင်းသည် ၂၀၁၅ အာရှဖလားပြိုင်ပွဲသို့ ၀င်ရောက်ယှဉ်ပြိုင်ခွင့်ရရှိမည်ဖြစ်သည်။

  www.MyanmarExpress.net
 

Posted in: သတင်း