မြန်မာ့နိုင်ငံရေး တိုးတက် ပြောင်းလဲလာမှုကို အာဆီယံကကြိုဆို

အောက်တိုဘာလကုန်ပိုင်းက မြန်မာနိုင်ငံသို့ လာရောက်ခဲ့သော အင်ဒိုနီးရှား နိုင်ငံခြားရေးဝန်ကြီးအား သတင်းထောက်များက ၀ိုင်းဝန်းမေးမြန်းနေစဉ်။

ဓာတ်ပုံ-ရတနာ

မြန်မာနိုင်ငံ၌ လက်ရှိ အရပ်သားအစိုးရသစ်တက်ပြီး နောက်ပိုင်း အကျဉ်းသားအချို့ကို လွှတ်ပေးခြင်း၊ စာပေစိစစ် ဖြတ်တောက်မှု လျှော့ပေါ့ပေးခြင်း၊ဒေါ်အောင်ဆန်းစုကြည်နှင့် တိုက်ရိုက် တွေ့ဆုံဆွေးနွေးခြင်းတို့သည် မြင်သာထင်ရှားသော တကယ့် နိုင်ငံရေးပြောင်းလဲမှုများဖြစ်ကြောင်း အရှေ့တောင်အာရှ နိုင်ငံများအသင်း (အာဆီယံ)က ကြိုဆိုခဲ့သည်။

လွန်ခဲ့သောနှစ် နိုဝင်ဘာလ ၇ ရက်နေ့က ကျင်းပခဲ့သော အထွေ ထွေရွေးကောက်ပွဲသည် မြန်မာနိုင်ငံ ဒီမိုကရေစီနိုင်ငံတော်အဖြစ် ပေါ်ထွက်လာရေးအတွက် အရေးကြီးသောရွေးကောက်ပွဲဖြစ်ရာ အာဆီယံအနေဖြင့် ကြိုဆိုကြောင်း ထိုစဉ်က အာဆီယံ ဥက္ကဌအဖြစ် တာဝန် ယူဆောင်ရွက်ခဲ့သည့် ဗီယက်နမ်နိုင်ငံခြားရေးဝန်ကြီးက ရွေးကောက်ပွဲအပြီးတွင် ထုတ်ပြန်ကြေညာခဲ့သည်။

အဆိုပါကြေညာချက်တွင် မြန်မာနိုင်ငံအနေဖြင့် အိမ်နီးချင်းနိုင်ငံများနှင့်သာမက ကမ္ဘာ့ကုလသမဂ္ဂ အဖွဲ့အစည်းနှင့်ပါ ရှေ့ဆက် ပူးတွဲဆောင်ရွက်ရန် လိုအပ်ကြောင်း ဖော်ပြထားသည်။

အထွေထွေရွေးကောက်ပွဲ အောင်မြင်စွာကျင်းပ နိုင်ခဲ့ခြင်း၊ ရွေးကောက်ပွဲအပြီး ဒေါ်အောင်ဆန်းစုကြည်အား နေအိမ်အကျယ်ချုပ်မှ လွှတ်ပေးလိုက်ခြင်းတို့ကို နိုင်ငံတကာ အသိုင်းအ၀ိုင်းက အသိအမှတ်ပြုပြီး လက်ရှိမြန်မာနိုင်ငံအပေါ် စီးပွားရေးအရ ပိတ်ဆို့ ထားမှုများ ကို အမြန်ဆုံးစဉ်းစားရုတ်သိမ်းပေးရန် လိုအပ်ကြောင်း ယခုနှစ် ဇန်န၀ါရီလက ပြုလုပ်ခဲ့သော အာဆီယံနိုင်ငံခြားရေး ၀န်ကြီးများ တွေ့ဆုံဆွေးနွေးပွဲတွင် နိုင်ငံခြားရေးဝန်ကြီး အားလုံးက တညီတညွတ်တည်း တောင်းဆိုခဲ့ကြသည်။

အဆိုပါ နိုင်ငံခြားရေးဝန်ကြီးများ တွေ့ဆုံဆွေးနွေးပွဲ တွင် ထိုင်းနိုင်ငံခြားရေးဝန်ကြီး မစ္စတာကာဆစ်ပီရိုမြ ကလည်း နိုင်ငံတကာ အသိုင်းအ၀ိုင်းအနေဖြင့် မြန်မာနိုင်ငံ ၏ ဒီမိုကရေစီစနစ်ကူးပြောင်းမှုကို ထောက်ခံအားပေးရန် လိုအပ်ကြောင်း အကြံပြုတိုက်တွန်း ခဲ့သည်။

ထို့အပြင် အာဆီယံအဖွဲ့ဝင် နိုင်ငံတိုင်းသည် မြန်မာနိုင်ငံ၏ ဒီမိုကရေစီစနစ်ကူးပြောင်းရေး၊ အမျိုးသား ညီညွတ်ရေး၊ လူနေမှုဘ၀ အဆင့်အတန်း၊ ကုန်သွယ်မှု၊ ရင်းနှီးမြုပ်နှံမှုနှင့် ခရီးသွားလုပ်ငန်းများတွင် ပူးပေါင်း ကူညီဆောင်ရွက်ပေးရန်လိုကြောင်း ၎င်းက ထည့်သွင်း ပြောကြားခဲ့သည်။

ထို့အပြင်လက်ရှိ မြန်မာအစိုးရသစ်လက်ထက် လူ့ အခွင့်အရေးနှင့် အမျိုးသားညီညွတ်ရေးအတွက် ဆောင်ရွက် နေမှုများသည် အမေရိကန်နှင့် ဥရောပသမဂ္ဂတို့မှ နှစ်ပေါင်းများစွာ မြန်မာနိုင်ငံအပေါ် စီးပွားရေးအရ ပိတ်ဆို့ ထားမှုများကိုရပ်တန့်စေနိုင်သည့် အခြေအနေရှိလာကြောင်း ၎င်းက ဆက်ပြောသည်။

သို့သော် လက်ရှိအခြေအနေတွင် ဥရောပသမဂ္ဂ အနေဖြင့် မြန်မာနိုင်ငံအား စီးပွားရေးအရ ပိတ်ဆို့ထားမှုနှင့် ပတ်သက်ပြီး ညှိနှိုင်းဆွေးနွေးရန် အစီအစဉ်မရှိကြောင်း ယခုနှစ် မေလ ၅ ရက်နေ့က အင်ဒိုနီးရှားနိုင်ငံ၊ ဂျကာတာ မြို့တွင် ကျင်းပခဲ့သည့် ပထမအကြိမ် အီးယူ-အာဆီယံ စီပွားရေး ထိပ်သီးဆွေးနွေးပွဲတွင် အီးယူကုန်သွယ်ရေး ကော်မရှင်အဖွဲ့ဝင် Karel De Gucht က မြန်မာတိုင်း(မ်)ကို ပြောခဲ့သည်။

သို့သော် အဆိုပါ ထိပ်သီးဆွေးနွေးပွဲသို့တက်ရောက်လာသည့် အီးယူစီးပွားရေးလုပ်ငန်းရှင် အတော်များများက မြန်မာနိုင်ငံတွင် အထူးသဖြင့် ထုတ်ကုန်၊ စွမ်းအင်၊ သတ္ထု တူးဖော်ရေးနှင့် စိုက်ပျိုးရေးကဏ္ဍများတွင် ရင်းနှီးမြှုပ်နှံရန် စိတ်ဝင်စားကြပြီး အီးယူ၏ မြန်မာနိုင်ငံအပေါ် စီးပွားရေး ပိတ်ဆို့ထားမှုကိုလည်း ရပ်တန့်စေလိုကြသည်။

ဥရောပသမဂ္ဂသည် အာဆီယံ၏ ဒုတိယ အင်အား အကြီးဆုံး ကုန်သွယ်ဖက်ဖြစ်ပြီး နှစ်ဦးနှစ်ဖက်ကုန်သွယ်မှု ပမာဏမှာ 'ကန်'ဒေါ်လာ ၂၁၀ ဘီလျံအထိ ရှိသည်။

ထို့အပြင် ၂၀၁၄ ခုနှစ်တွင် အာဆီယံဥက္ကဌအဖြစ် လာအိုနိုင်ငံကိုယ်စား မြန်မာနိုင်ငံက လက်ခံဆောင်ရွက်ရန် အတွက် ယခုနှစ် မေလက ကျင်းပခဲ့သော (၁၈)ကြိမ်မြောက် အာဆီယံ ထိပ်သီးအစည်းအဝေးတွင် သမ္မတ ဦးသိန်းစိန်မှ တင်ပြတောင်းဆိုထားရာ လက်ရှိ အာဆီယံ- မြန်မာ ဆက်ဆံရေးကို အမေရိကန်နှင့် ဥရောပသမဂ္ဂတို့က ပိုမို အာရုံစိုက်လာကြသည်။

အက္ခရာအစဉ်အလိုက်ကြည့်ပါက မြန်မာနိုင်ငံအနေဖြင့် ၂၀၁၅ ခုနှစ်တွင်သာ အာဆီယံဥက္ကဌအဖြစ် ဆောင်ရွက်နိုင်မည့် အလား အလာရှိသည်။

မြန်မာနိုင်ငံ၏ ၂၀၁၄ခုနှစ် အာဆီယံဥက္ကဌ အဖြစ် ဆောင်ရွက်ရေးနှင့် ပတ်သက်ပြီး အာဆီယံ၏ဆွေးနွေး ဖက်ဖြစ်သည့် အမေရိကန်နှင့် ဥရောပသမဂ္ဂတို့က ဆန့်ကျင်ကြပြီး မြန်မာနိုင်ငံ ဥက္ကဌအဖြစ်ဆောင်ရွက်ပါက မြန်မာနိုင်ငံတွင် ပြုလုပ်မည့် အာဆီယံနှင့်ပတ်သက်သည့် မည်သည့်အစည်းအဝေးမှ တက်ရောက်မည်မဟုတ်ဟု ပြောဆိုကြသည်။

အခြား အာဆီယံအဖွဲ့ဝင် နိုင်ငံအချို့ ကလည်း မြန်မာနိုင်ငံ အာဆီယံ ဥက္ကဌအဖြစ် ဆောင်ရွက် လိုမှုကို ကန့်ကွက်ကြသည်။

မြန်မာအစိုးရအနေဖြင့် ၂၀၁၄ ခုနှစ်တွင် ဥက္ကဌအဖြစ် ဆောင်ရွက်လိုရေးအတွက် အထောက်အကူဖြစ်စေရန် နိုင်ငံတော်သမ္မတ ဦးသိန်းစိန်သည် (၁၈)ကြိမ်မြောက် အာဆီယံ ထိပ်သီးအစည်းအဝေးသို့ အခြားနိုင်ငံခေါင်း ဆောင်များနှင့် ဆွေးနွေးပွဲမပြုလုပ်မီ လက်ရှိ အာဆီယံဥက္ကဌ ဖြစ်သည့် အင်ဒိုနီးရှားနိုင်ငံသမ္မတ စူဆီလိုဘန်ဘန်း ယူဒိုယူနိုနှင့် ကနဦးတွေ့ဆုံပြီး ၂၀၁၄ ခုနှစ်တွင် အာဆီယံ ဥက္ကဌအဖြစ် ဆောင်ရွက်လိုကြောင်း တင်ပြဆွေးနွေးခဲ့သည်။ အဆိုပါ (၁၈)ကြိမ်မြောက် အာဆီယံ ထိပ်သီး အစည်းအဝေး အပြီးတွင် အဖွဲ့ဝင်နိုင်ငံခေါင်းဆောင်များက လက်ရှိဥက္ကဌအဖြစ် ဆောင်ရွက်နေသည့် အင်ဒိုနီးရှား နိုင်ငံခြားရေးဝန်ကြီး ဒေါက်တာ မာတီ နာတာလီဂါဝါအား မြန်မာနိုင်ငံသို့စေလွှတ်ပြီး မြန်မာနိုင်ငံ၏ လက်ရှိ နိုင်ငံရေး အခြေအနေနှင့် အာဆီယံဥက္ကဌအဖြစ် ဆောင်ရွက်နိုင်ရန် အဆင့်သင့်ဖြစ်မဖြစ်တို့ စိစစ်လေ့လာရန် သဘောတူ ဆုံးဖြတ်ခဲ့ကြသည်။

အဆိုပါ သဘောတူညီချက်အရ အင်ဒိုနီးရှား နိုင်ငံခြားရေးဝန်ကြီးသည် မြန်မာနိုင်ငံသို့ အောက်တိုဘာလ ၂၈ရက်နေ့က ရောက်ရှိခဲ့ပြီး သမ္မတ ဦးသိန်းစိန်၊ အခြားအစိုးရအဖွဲ့ဝန်ကြီးများ၊ ဒေါ်အောင်ဆန်းစုကြည် နှင့် အခြားထင်ရှားသော ပုဂ္ဂိုလ်များ၊ နိုင်ငံရေးပါတီများ နှင့်မြန်မာလူ့အခွင့်အရေးကော်မရှင် ဥက္ကဌတို့နှင့် တွေ့ဆုံခဲ့သည်။

အောက်တိုဘာလ ၂၉ရက်နေ့ ရန်ကုန်မြို့တွင် ပြုလုပ်ခဲ့ သော သတင်းစာရှင်းလင်းပွဲတွင် မြန်မာနိုင်ငံ အာဆီယံ ဥက္ကဌဖြစ်ရေးနှင့် ပတ်သက်ပြီး ဒေါ်အောင်ဆန်းစုကြည်နှင့် အခြားထင်ရှားသောပုဂ္ဂိုလ်တို့၏ ထင်မြင်ယူဆချက်ကိုလည်း ၎င်းအနေဖြင့် အလေးထား ကြောင်းပြောကြားသည်။

"ဒီကိစ္စနဲ့ပတ်သက်ပြီး ကျွန်တော့အထင် သူတို့ရဲ့ ထင်မြင်ယူဆချက်တွေက အရမ်းအရေးကြီးပါတယ်။ဒေါ်အောင်ဆန်းစုကြည် သာမက အာဆီယံ အသိုက်အ၀န်း တခုလုံးရဲ့ ထင်မြင်ယူဆချက်လည်း အရေးကြီးပါတယ်။ အာဆီယံဆိုတဲ့ အဖွဲ့အစည်းက ပြည်သူတွေရဲ့အသံကို အမြဲစောင့်ကြည့်နားထောင်ပါတယ်။ သူနဲ့တွေ့ဆုံဆွေးနွေးတုန်းက ဒီကိစ္စနဲ့ပတ်သက်ပြီး သူရဲ့ထင်မြင်ချက် ယူဆချက်တွေကို သိရှိခဲ့ပါတယ်။ သူ ဒီကိစ္စကို ကောင်းကောင်း နားလည်ထားတယ်လို့ ကျွန်တော် ယုံကြည်ပါတယ်။ မြန်မာနိုင်ငံဟာ အာဆီယံအဖွဲ့ဝင်နိုင်ငံ တစ်နိုင်ငံအနေနဲ့ ဥက္ကဌအဖြစ် တာဝန်ယူချင်ရတဲ့ ဆန္ဒကို လည်း နားလည်သဘောပေါက်ကြောင်း ကျွန်တော့ကို ရှင်းပြပါတယ်"ဟု မစ္စတာ နာတာလီဂါဝါက ပြောသည်။

"ဒီရောက်တုန်းတွေ့ခဲ့တဲ့ တခြားပုဂ္ဂိုလ်တွေရဲ့ သဘော တရားတွေ၊ ထင်မြင်ယူဆချက်တွေကို နားထောင်ခဲ့ပါတယ်။ ဒါတွေကို ကျွန်တော်ရဲ့လုပ်ဖော်ကိုင်ဖက် တခြားနိုင်ငံခြားရေး ၀န်ကြီးတွေကို ပြန်လည်ဆွေးနွေးပြီး ဘာလီမှာ လုပ်မယ့် (၁၉)ကြိမ်မြောက် အာဆီယံ ထိပ်သီးအစည်းအဝေးမှာ ကျွန်တော်တို့ရဲ့ သက်ဆိုင်ရာနိုင်ငံ့ခေါင်းဆောင်တွေကို တင်ပြသွားမှာဖြစ်ပါတယ်"ဟု ၎င်းက ပြောခဲ့သည်။

http://groups.google.com/group/mayanmardailymail မှ ကူးယူဖော်ပြပါကြောင်း

Myanmar Express

Posted in: ကူးယူဖော်ပြ