ယောက်ကော်ဆရာတော် ရုပ်ကလာပ်တော်ကို ဖန်သား အခေါင်းနှင့် နဂါးမောက်တောင်တွင် ဆက်လက်ထားရှိ

From : Myanmar Times

စည်သူလွင်
အတွဲ ၂၈ ၊ အမှတ် ၅၅၅ ( ၃ - ၉ ၊ ၂ ၊ ၂၀၁၂)

ယောက်ကော်အဖေကြီး ဈာပနအခမ်းအနားသို့ လာရောက်ဖူးကြသူများကို တွေ့ရစဉ်။
ဓာတ်ပုံ - စည်သူလွင်

မန္တလေးတိုင်းဒေသကြီး စဥ့်ကူးမြို့နယ် နဂါးမောက်တောင် နယ်လှည့် သာသနာ ပြု ယောက်ကော်ကျွန်းမြတ်ဆရာတော်၊ သို့မဟုတ် ယောက်ကော်အဖေကြီးသည် ယခုလ ၂၁ ရက် စနေနေ့ နံနက် ၄ နာရီ အချိန်တွင် မဟာဂန္ဓာရီ ထွက်ရာ စခန်းသို့ ကူးပြောင်းကြွမြန်းသွားရာ ၎င်း၏ ရုပ်ကလာပ်အား နဂါးမောက်တောင် ဗိမာန်အဆောင်တွင် ဖန်သားအခေါင်းဖြင့် ထားရှိထားကြောင်းသိရသည်။

ယောက်ကော် အဖေကြီး၏ ရုပ် ကလာပ်အား နဂါးမောက်တောင်ရှိ ယာယီစံကျောင်းတော်တွင် ထားရှိစဉ် ထူးဆန်းမှုများလည်း ဖြစ်ပေါ် လျက်ရှိ ကြောင်းသိရသည်။

"ခုတောင်တော်မှာ ရုပ်ကလာပ်ကို ထားတာ ခြောက်ရက်လောက် ရှိပြီ။ထူးခြားတာကတော့ ဆံပင်တွေနဲ့ မျက်ခုံးမွေးတွေကတော့ သိသိသာသာ ရှည်လာတယ်။ မျက်နှာပြင်မှာလည်း ချွေးထွက်တယ်။ တစ်ရက်နဲ့တစ်ရက် မျက်လုံးပိတ်တဲ့ အနေအထားကလည်း မတူဘူး။ "အဖေကြီး ဆုံးပြီဆိုကတည်းက သူ့ရဲ့တပည့်တွေက တောင်တော်ကို လာကြတယ်။ ရပ်ဝေးကသူတွေလည်း လာကြတယ်။ အဖေကြီးရဲ့ အဓိဋ္ဌာန်ကလည်း ဘယ်လိုရှိမှန်း မသိဘူးလေ။ အားလုံးတိုင်ပင်ပြီး ရုပ်ကလပ်ကို ဗိမာန်မှာ မှန်သားအခေါင်းနဲ့ပဲထားဖို့ ဆုံးဖြတ်လိုက်တယ်။ နောက်ပိုင်းအခြေအနေ ကြည့်ပြီးမှ ဂူသွင်းမှဖြစ်မယ်ဆိုရင်လည်း ဂူသွင်းမှာပါ"ဟု ယောက်ကော် အဖေကြီး၏ မွေးစားသား ဖြစ်သူ ဦးကျော်ဇောအောင်က ပြောသည်။

ယောက်ကော် အဖေကြီးသည် ကျန်းမာရေး အခြေအနေအရ ရန်ကုန်ရှိ ဆေးရုံတွင် ဆေးကုသမှုခံယူစဉ် နဂါးမောက်တောင်တော်သို့ ပြန်လည် အနားယူချင်သဖြင့် ရန်ကုန်မှ မန္တလေးသို့ အပြန် လေးဆယ့်ကိုးမိုင် ခြောက်ဖာလုံ တွင် မဟာဂန္ဓာရီထွက်ရာစခန်းသို့ ကူးပြောင်းကြွမြန်းသွားကြောင်း ဆေး ကုသမှုခံယူရန် လိုက်ပါသွားသူများထံမှ သိရသည်။

"အဖေကြီးက ရန်ကုန်ဆေးရုံကနေ နဂါးမောက်တောင်ကို ပြန်ချင်တယ်ဆို လို့ပြန်ခေါ်တာ၊ လမ်းမှာတင် ဆုံးသွားတယ်။ ဆေးရုံမှာကို ထူးဆန်းတာတွေ ဖြစ်တယ်။ ဆေးရုံမှာ အဖေကြီးရဲ့ သွေး ပေါင်ချိန်က သုညထိကျသွားတယ်။ သွေးပေါင်ချိန်က အရမ်းကျသွားတော့ ဆရာဝန်တွေက ဆင်းခွင့်ပြုမှာမဟုတ် ဘူးလို့ အဖေကြီးကိုပြောတော့ နာရီပိုင်း အတွင်းမှာကို သွေးပေါင်ချိန်က ရှစ်ဆယ်နဲ့ တစ်ရာ လောက်ကိုဖြစ်သွားတာ၊ အရမ်းထူးဆန်းတယ်။ဆရာဝန်တွေကလည်းပြောတယ်။သာမန်လူဆိုရင် သွေးပေါင်ချိန်က သုံးဆယ် လောက် ဆိုရင်ကို နေလို့မရတော့ဘူးလေ။ဆင်းခွင့်ရလို့ ပြန်လာရင်း လမ်းကျမှပဲ ဆုံးတာ"ဟု ဆေးကုသရာသို့ လိုက်ပါသွား သူ မမီးမီးက မြန်မာတိုင်း(မ်)ကို ပြောသည်။

ယောက်ကော် ဆရာတော်သည် ယက္ကန်းစင်တောင် ဆရာတော် ဥူးဩဘာသ၏ တပည့်အရင်းဖြစ်ပြီး ယောက်ကော်ကျွန်း တစ်ခုလုံးကို သာသနာပြုခဲ့သောကြောင့် ယောက်ကော်ကျွန်းမြတ် ဆရာတော် ဥူးသဒ္ဓမ္မသိဒ္ဓိဟု အမည် တွင်ခဲ့ပြီး မြန်မာပြည် တစ်ပြည်လုံးရှိ ထူးခြားသော နေရာများကိုလည်း သာသနာပြုခဲ့သော ရဟန်းတစ်ပါးလည်း ဖြစ်သည်။

၁၉၈၁ ခုနှစ်တွင် မဟာဂန္ဓာရီအရိယာ ၀ိဇ္ဇာလမ်းစဉ်ကို ပိုမိုအားစိုက် ထုတ်နိုင်ရန် ရဟန်းဘ၀မှ ယောဂီဘ၀သို့ ကူးပြောင်းကာ ၀ိဇ္ဇာလမ်းစဉ်များကို ကျင့်ကြံအားထုတ်ခဲ့သည်။

ယောက်ကော်အဖေကြီး၏ မိဘများမှာ ရန်ကုန်မြို့နေ ကွယ်လွန်သူ အဖ (ဦးအေးမောင်)၊ အမိ (ထိပ်တင်ထွန်း) တို့ဖြစ်ပြီး ၁၃၀၂ ခုနှစ်၊ တပို့တွဲလဆန်း ၆ ရက်နေ့ ညနေ ၄ နာရီအချိန်တွင် မိခင် ဒေါ်အမိ(ထိပ်တင်ထွန်း)က မွေးဖွားခဲ့သည်။

Myanmar Express

Posted in: သတင်း