လေးစားဖွယ်ရာကောင်းသော (မြန်မာနိုင်ငံတော်အလံနှင့်ပတ်သက်၍) ပေးစာ - ၁၀၄

မြန်မာနိုင်ငံတော်အလံကို လွတ်လပ်ရေးရပြီးသည့်အချိန်မှစတင်ပြီး ကျွန်မအရွယ်ရောက်သည်အထိ တလေးတစား တရိုတသေ ဦးညွှတ်အလေးပြုခဲ့ကြပါသည်။ သို့သော်လည်း ယနေ့ခေတ်တွင် ထိုအလေ့အထများမှာ ပျောက်ကွယ်သွားခဲ့သည်။ ဒီမိုကရေစီကို လိုချင်သည်ဆိုသော်လည်း မိမိတို့နိုင်ငံ၏ အလံကိုပင် အလေးမပြုနိုင်လောက်အောင် ဖြစ်နေသည်။ ကျွန်မတို့အိမ်အနီးတွင်ရှိသော ရုပ်ရှင်ရုံတစ်ရုံသို့ ညီမများနှင့်မကြာခဏသွားရောက်ကြည့်ရှုသည့်အခါတိုင်း သတိထားမိသည်မှာ ရုပ်ရှင်စပြတော့မည်ဆို သည်နှင့် အလံတော်ကို အလေးပြုပါစာတမ်းပေါ်ပြီး လေထဲတွင် လွှင့်ထားသော အလံကို မည်သူကမှ မတ်တပ်ရပ်အလေးပြုခြင်းမပြုကြတော့ပါ။ တခါတရံ ကျွန်မနှင့်အတူညီမများသာ မတ်တပ်ရပ်နေပါသည်။ အားလုံးကမူ အစားမပျက်၊ ထိုင်လျှက်မပျက်ကြပါ။ တိုင်းတပါးယဉ်ကျေးမှုတွေကို လိုက်နာနေကြပြီး မိမိတို့ နိုင်ငံကို လေးစားရကောင်းမှန်း၊ လွတ်လပ်ရေးကိုတန်ဖိုးထားရကောင်းမှန်း မသိသည့် ခေတ်ဖြစ်နေသည်။ အဖွားတို့ခေတ်က လွတ်လပ်ရေးမရသေးသဖြင့် အခက်အခဲအမျိုးစုံကြုံတွေ့ခဲ့ရသည်ကို ပြောပြခဲ့သဖြင့် သိရှိခဲ့ရသည်။ လွတ်လပ်ရေးရပြီးသည့်နောက်မှသာ မိမိတို့အလံတော်ကို တိုင်ထိပ်သို့ တင်ခွင့်ရရှိခဲ့ သည်။ သို့ဖြစ်၍ မိမိတို့နိုင်ငံအလံတော်ကိုတော့ ခေတ်တွေ စနစ်တွေမည်သို့ပင်ဖြစ်စေ တလေးတစား ရှိသင့်သည်ဟု ထင်မြင်မိသည်။



ဤသည်ကို ကြည့်ခြင်းဖြင့် မြန်မာနိုင်ငံတိုးတက်သည်မှာ ဘာတိုးတက်တာလာသလဲ။ ရိုင်းစိုင်းမှုတွေ၊ ယဉ်ကျေးမှုပျက်ပြားမှုတွေ၊ ၀တ်စားဆင်ယင်မှုပျက်ပြားမှုတွေ၊ စိတ်ဓါတ်ပျက်ပြားမှုတွေသာ တိုးတက်လာသည်။ အဓိက မိဘတွေကလဲ သားသမီးကိုမနိုင်၊ အချို့မိဘတွေအနေဖြင့် သားသမီးကို မဆုံးမသည့်အပြင် မြှောက်ပင့်ပေးကြသည်။ ဆရာ၊ဆရာမများမှ မသင့်တော်သည်များကို ဆုံးမသည်ကို မိဘများမှ ရန်လိုစွာ ပြောဆိုနေသည်ကို ကိုယ်တွေ့ကြုံနေရပါသည်။ လက်ဦးဆရာဆိုသည့် မိဘများအနေဖြင့် ဤကဲ့သို့ဖြစ်နေလျှင် ကျောင်းက ဆရာမများအနေဖြင့် မည်သို့ ဆုံးမပြောဆိုနိုင်မည်နည်း။ ယဉ်ကျေးမှုသင်တန်းများဖွင့်နေသော်လည်း တာဝန်အရသာ တက်ရောက်ကြသည်။ မည်သူမှ မလိုက်နာကြပါ။ မိမိတို့နိုင်ငံယဉ်ကျေးမှုကို လိုက်နာကြရန် မိဘနှင့်ဆရာ၊ဆရာမများမှ ဆုံးမသွန်သင် သင့်သည်ဟု ထင်မြင်မိပါသည်။

Myanmar Express

Posted in: ဆင်ခြင်စရာ,အလံ,ပေးစာ