ကန့်ကွက်မည်ဟု မီဒီယာများက ဝါဒဖြန့်ထားသော်လည်း ပြည်နယ်လွှတ်တော် အစည်းအဝေးတွင် ဗိုလ်ချုပ်မောင်မောင်အုန်း ကို ရခိုင်ပြည်နယ် ၀န်ကြီးချုပ် အဖြစ် ကန့်ကွက်သူမရှိ တင်မြှောက်

ဗိုလ်ချုပ်မောင်အောင်အုန်းကို ရခိုင်ပြည်နယ် ၀န်ကြီးချုပ်အဖြစ် ဒီကနေ့ကျင်းပတဲ့ ရခိုင်ပြည်နယ်လွတ်တော် အရေးပေါ်အစည်းအဝေးမှာ ကန့်ကွက်သူမရှိဘဲ သဘောတူခဲ့ကြပါတယ်။

ဗိုလ်ချုပ်မောင်မောင် အုန်း ကို   ရခိုင်ပြည်နယ် ၀န်ကြီးချုပ်အဖြစ် ခန့်အပ်ဖို့ သမ္မတဦးသိန်းစိန်က သ၀ဏ်လွှာပို့ခဲ့ပြီး တဲ့နောက် အရေးပေါ်အစည်း အဝေးခေါ်ယူပြီး အတည်ပြုခဲ့တာလို့ ကိုယ်တိုင် တက်ရောက်ခဲ့တဲ့ စစ်တွေအမှတ် ၂ မဲဆန္ဒနယ်မြေ က ပြည်နယ်လွှတ်တော်ကိုယ်စားလှယ် ဦးအောင်မြတ်ကျော်က ပြောပါတယ်။

“၂၅ ရက်နေ့က ဗိုလ်ချုပ်မောင်မောင်အုန်းကို ၀န်ကြီးချုပ်အဖြစ် ခန့်အပ်မယ့်ဟာကို ကန့်ကွက်မယ့်သူ ရှိတယ်ဆိုရင် ကန့်ကွက်လွှာတင်နိုင်တယ်ဆိုပြီး ၂၇ ရက်နေ့ နောက်ဆုံးထား တင်ပါဆိုပြီး ပြောထားတဲ့ဟာက ၂၇ ရက်နေ့ထိ အဲလိုမျိုး ကန့်ကွက်လွှာတင်တဲ့ လွှတ်တော်ကိုယ်စားလှယ်တယောက်မှ မရှိတဲ့အတွက်ကြောင့် ဒီနေ့ကျနော်တို့ လွှတ်တော်ကျင်းပတဲ့အချိန်မှာ ကန့်ကွက်မယ့်သူ မရှိတဲ့အတွက်ကြောင့် ရခိုင်ပြည်နယ်လွှတ်တော် ၀န်ကြီးချုပ်အဖြစ် ခန့်အပ်ဖို့ သဘောတူလိုက်တာပေါ့။ သဘောတူတယ်လို့ လွှတ်တော်ဥက္ကဋ္ဌကကြေညာပြီး လွှတ်တော်ကို ရုပ်သိမ်းလိုက်တာပေါ့။”

ဗိုလ်ချုပ်မောင်မောင်အုန်းက သူသာ ပြည်နယ်ဝန်ကြီးချုပ်တာဝန်ယူတဲ့အခါ ၁၉၈၂ ခုနှစ် နိုင်ငံသားဥပဒေကို တိတိကျကျအကောင်အထည်ဖော်မယ့်အကြောင်း။ သမ္မတက ပေးတဲ့ ထောက်ပံ့ကြေး ၁၅ ဘီလီယံကို ရခိုင်ပြည်နယ်အတွက် အကျိုးရှိရှိသုံးမယ့်အကြောင်း၊ ကျောက်ဖြူအထူးစီးပွားရေးဇုန်ကိစ္စကို အကောင်အထည်ဖော်မယ့်အကြောင်း ကတိပြုထားတယ်လို့ ဦးအောင်မြတ်ကျော်က ပြောပါတယ်။

ရခိုင်ပြည်နယ် လမ်းပန်းဆက်သွယ်ရေးဝန်ကြီး ဦးလှဟန်ကလည်း ၀န်ကြီးချုပ်အဖြစ် သဘောတူတာနဲ့ ပတ်သက်ပြီး အခုလို ပြောပါတယ်။

“သမ္မတက တာဝန်ပေးတယ်ဆိုတာက အကောင်းဆုံးအနေအထားကို စဉ်းစားပြီးတော့မှ သင့်တော်မယ်ထင်လို့ အကြီးအကဲနေရာ တင်လိုက်တယ်။ သူ့အနေနဲ့လည်း ရခိုင်ပြည်နယ်နဲ့ပတ်သက်ပြီးတော့ အတွေ့အကြုံလေးတွေ ရှိပါတယ်။ ရခိုင်ပြည်နယ်အကြောင်းကို နည်းနည်လေးသိနေတဲ့သဘောရှိပါတယ်။ ဒီမတိုင်ခင် ရခိုင်ပြည်နယ် ပဋိပက္ခကိစ္စမှာ သူလာပြီး ကိုင်တွယ်တာရှိတယ်။ ဒါကြောင့် ရခိုင်ပြည်နယ်ဟာ သူ့အတွက် မစိမ်းဘူး။ သူကိုယ်တွယ်တဲ့အခါမှာလည်း လွယ်လွယ်ကူကူနဲ့ အဆင်ပြေနိုင်မယ်။”

ရခိုင်ပြည်နယ် ဝန်ကြီးချုပ်အဖြစ် ခန့်အပ်ရန် ဗိုလ်ချုပ်မောင်မောင်အုန်းကို ရခိုင်တိုင်းရင်းသား မဟုတ်ခြင်း တပ်မတော်လာသည့် ဝန်ကြီးချုပ်ဖြစ်ခြင်းကို မေ့ထားရန် ရခိုင်အမျိုးသားပါတီမှ ဒု-ခေါင်းဆောင် ဒေါက်တာအေးမောင်က ဇွန် ၂၈ ရက်တွင် ပြောကြားခဲ့သည်။


ပြည်နယ်လွှတ်တော်ရဲ့ ဒီကနေ့ အဆုံးအဖြတ်ကို သမ္မတထံပေးပို့ပြီးတဲ့အခါ လွှတ်တော်မှာ ထပ်မံအတည်ပြုပြီးမှ ပြည်နယ်ဝန်ကြီးချုပ်အဖြစ် ကျမ်းသစ္စာကျိန်ဆို တာ ၀န်ထမ်းဆောင်ဖို့ဖြစ်ပြီး သက်တမ်းအားဖြင့် ၁ နှစ်ခွဲဝန်းကျင် ထမ်းဆောင်ရမှာဖြစ်ပါတယ်။

.. www.MyanmarExpress.net
 

Posted in: သတင်း