၂၀၁၅ ပြမည်ဟုကြွေးကြော်ထားသည့် ဗိုလ်ချုပ်ရုပ်ရှင် ၂၀၁၄ နှစ်ကုန်ထိ ရိုက်ဖြစ်မည်မဟုတ်

၂၀၁၅ ပြမည်ဟုကြွေးကြော်ထားသည့် ဗိုလ်ချုပ်ရုပ်ရှင် ၂၀၁၄ နှစ်ကုန်ထိ ရိုက်ဖြစ်မည်မဟုတ်ဘဲ လာမယ့်(၂၀၁၅)ခုနှစ်မှာ ပြည်တွင်းက အနုပညာရှင်တွေနဲ့ပဲ ရိုက်ကူးသွားမယ်လို့ သိရပါတယ်။

ဗိုလ်ချုပ်ရုပ်ရှင်ဖြစ်မြောက်ရေးအတွက် ဗိုလ်ချုပ်မွေးဖွားတဲ့ ရာပြည့်နှစ်ဖြစ်တဲ့ ၂၀၁၅ မတိုင်ခင် ရိုက်ကူးပြီးစီးနိုင်ဖို့ ရည်မှန်းထားပြီး ဇာတ်ညွှန်းကိုတော့ လက်ရှိရေးသားထားပြီးသား ဇာတ်ညွှန်းကိုပဲသုံးစွဲသွားမယ်လို့ သိရပါတယ်။ ဗိုလ်ချုပ်အောင်ဆန်းရုပ်ရှင်မှာ ဗိုလ်ချုပ်ရဲ့ ငယ်ဘ၀၊ ကျောင်းသားဘ၀၊ စစ်သားဘ၀နဲ့ ကျဆုံးချိန်ထိ အခြေအနေတွေကို ထည့်သွင်းရိုက်ကူးသွားမှာဖြစ်ပြီး ဗိုလ်ချုပ်စစ်ပညာသင်တဲ့ ဂျပန်နိုင်ငံနဲ့ အခြားဇာတ်ဝင်ခန်းအချို့ကို အီတလီမှာရှိတဲ့စတူဒီယိုမှာ ရိုက်ကူးဖို့ သဘောတူညီမှုရရှိထားပြီပြီလို့ သိရပါတယ်။

ဗိုလ်ချုပ်ရုပ်ရှင်မှာပါဝင်မယ့်  အဓိကဇာတ်ဆောင်တွေကို (၂၀၁၂)ခုနှစ်၊ သြဂုတ်လက အပြီးရွေးချယ်ခဲ့ပြီး ဗိုလ်ချုပ်နေရာမှာ ကမ္ဘောဇဘောလုံးအသင်းမှ ကစားသမားကျော်ကျော်မျိုးကို ရွေးချယ်ထားပြီး ဗိုလ်ချုပ်ဇနီး ဒေါ်ခင်ကြည်နေရာမှာ သရုပ်ဆောင်ဖို့ကို ပုသိမ်မြို့မှကျောင်းဆရာမ မဇာခြည်လင်းကို ရွေးချယ်ထားကြောင်း သိရပါတယ်။ 

ဗိုလ်ချုပ်ရုပ်ရှင် ရိုက်ကူးရေးအဖွဲ့ဥက္ကဌမှာ ဒေါ်အောင်ဆန်းစုကြည် ဖြစ်ပြီး ဦးဆောင်မှုညံ့ဖျင်းခြင်း၊ အလှူငွေများ ပျောက်ဆုံးခြင်း၊ အဖွဲ့ဝင်များ သဘောထားကွဲခြင်း များကြောင့် ဗိုလ်ချုပ်ရုပ်ရှင်နှင့်ပတ်သက်ပြီး ဝေဖန်ခံနေရပါတယ်။

.. www.MyanmarExpress.net
 

Posted in: သတင်း