မြန်မာ့ရုပ်ရှင်ထူးချွန်ဆု အကယ်ဒမီပွဲကို ဖေဖော်ဝါရီလ ၇ ရက်နေ့တွင် ပြုလုပ်မည်

၂၀၁၀ ပြည့်နှစ်အတွက် ပေးအပ်ချီးမြှင့်မည့် မြန်မာ့ရုပ်ရှင်ထူးချွန်ဆု အကယ်ဒမီပွဲအား ဖေဖော်ဝါရီလ ၇ ရက်နေ့တွင် ပြုလုပ်မည်ဟု သိရသည်။ ရုပ်ရှင်လောကသားများ အနေဖြင့် ပြုလုပ်ရန် အစီအစဉ်ရှိသည့် ဖျော်ဖြေပွဲများနှင့် ရုပ်ရှင်ရိုက်ကူးမှု အချို့အား ယင်းရက်နှင့် တိုက်ဆိုင်မှု မရှိစေရန် ရွှေ့ဆိုင်းခြင်းများ ပြုလုပ်ထားသည်ဟု သိရသည်။ “ဒီနှစ် အကယ်ဒမီဆုပေးပွဲကို ဖေဖော်ဝါရီလ ပထမပတ်မှာ ပြုလုပ်မယ်လို့ သိရပါတယ်။ ဒါကြောင့် ဖေဖော်ဝါရီ ပထမပတ်မှာလုပ်ဖို့ အစီအစဉ်ရှိတဲ့ ဖျော်ဖြေပွဲ တချို့ကို ဖေဖော်ဝါရီ လလယ်ပိုင်းကို ရွှေ့ထားလိုက်ကြပါပြီ။ ဘယ်လို ရွေးချယ်တယ်ပဲပြောပြော အချိန်တန်ရင်တော့ အနုပညာရှင်တိုင်းက တစ်နှစ်တစ်ခါလုပ်တဲ့ အကယ်ဒမီပွဲကို သွားကြစမြဲပါပဲ” ဟု ဒါရိုက်တာ မောင်မျိုးမင်း (ရင်တွင်းဖြစ်)က ရှင်းပြခဲ့သည်။ ထို့အပြင် မြန်မာနိုင်ငံ ရုပ်ရှင်အစည်းအရုံးဥက္ကဋ္ဌ ဦးမြင့်သိန်းဖေကလည်း “အကယ်ဒမီက ဖေဖော်ဝါရီလ ၇ ရက်နေ့မှာ ပြုလုပ်မှာပါ။ တစ်နှစ်တစ်ခါလုပ်တဲ့ပွဲ ဖြစ်သလို ရုပ်ရှင်လောကသားအားလုံး စိတ်ပါဝင်စားကြတဲ့ ပွဲတစ်ပွဲ ဖြစ်တာကြောင့် သပ်သပ်ရပ်ရပ် ခမ်းခမ်းနားနား လုပ်နိုင်အောင် စီစဉ်နေပါတယ်။ ဒီနှစ် အကယ်ဒမီပွဲမှာ အရင်နှစ်တွေကထက် ထူးခြားမှုအနေနဲ့ လျှောက်လမ်းသီးခြား စီစဉ်ထားတာမျိုး၊ LED နဲ့ပြသတာမျိုးတွေ ပါဝင်ပါမယ်” ဟု အကယ်ဒမီပွဲနှင့် ပတ်သက်၍ ရှင်းပြခဲ့သည်။ ယခုနှစ်ပေးအပ်မည့် အကယ်ဒမီပွဲသည် အစိုးရသစ် ရွေးချယ်ပြီးနောက် ပထမဆုံးအကြိမ် ပြုလုပ်မည့် အကယ်ဒမီပွဲဖြစ်ပြီး စင်မြင့်နှင့် မီးအလှဆင် လုပ်ငန်းများ ဆောင်ရွက်ရန် တင်ဒါခေါ်ယူခဲ့ရာ လျှောက်ထားသူ ခြောက်ဦး ရှိခဲ့သည်ဟု သိရသည်။ ရွေးချယ်ခံရသူက နေပြည်တော် မြို့တော်ခန်းမ၀င်းအတွင်းတွင် စင်မြင့်တည်ဆောက်မှုများအား ဇန်န၀ါရီ လကုန်ပိုင်းတွင် ပြုလုပ်ရန် စီစဉ်ထားပြီး အကယ်ဒမီ ဗန်းကိုင်အဖြစ် ရွေးချယ်ခံရသူများကို ဇန်န၀ါရီ လကုန်ပိုင်းတွင် ကြေညာသွားမည်ဟု သိရသည်။ ၂၀၁၀ ပြည့်နှစ်အတွင်း စာရင်းဝင်သည့် ဇာတ်ကားများမှာ နတ်ဖြစ်ရတဲ့ဒုက္ခ၊ ဆွေတစ်ရာ မောင်တစ်ကျိပ်၊ နတ်ဖက်တဲ့စုံတွဲများ၊ ဟတ်ထိတယ်၊ ကျောက်သင်ပုန်းတွေ မိုးထားတဲ့အိမ်၊ ဂွတ်ရှယ်သမက်၊ ဘာမီတွန်၊ အချစ်လား လာထား၊ အငိုမျက်လုံး အပြုံးမျက်နှာ၊ ရင်ဘတ်ကြီးနဲ့ ချစ်လိုက်မယ်၊ နယူးမော်ဒယ်လ်၊ အာဒမ်ရယ် ဧ၀ရယ် ဒဿရယ်၊ အမေ့ကျေးဇူး ဆပ်ဖူးချင်တယ်၊ လာထားအာဘွား၊ ပင်လယ်ထက်က နေ၀န်းနီတို့ဖြစ်ကြောင်း ၂၀၁၂ ခုနှစ် ဇန်နဝါရီလ ၁၈ ရက်နေ့ထုတ် Weekly Eleven ဂျာနယ်တွင် ဖော်ပြထားပါသည်။

ခေတ်လူငယ်

Posted in: သတင်း