အာဆီယံဒေသတွင်းနိုင်ငံများသို့ မိုဘိုင်းဖုန်းသယ်ဆောင်အသုံးပြုနိုင်ရန် ခေါ်ယူခနှုန်းထားများ ညှိနှိုင်းဆွေးနွေးလျက်ရှိ

ပြည်တွင်းမှ မိုဘိုင်းဖုန်းယူဆောင်၍ အာဆီယံဒေသတွင်း နိုင်ငံများတွင် အသုံးပြုပြောဆိုနိုင်ရန် ဖုန်းခေါ်ဆိုခနှုန်းထားများ ဆွေးနွေးလျက်ရှိကြောင်း မြန်မာ့ဆက်သွယ်ရေးလုပ်ငန်းမှ သိရှိရသည်။ မြန်မာနိုင်ငံမှ မိုဘိုင်းဖုန်း အသုံးပြုသူများအနေဖြင့် အာဆီယံဒေသတွင်းနိုင်ငံများနှင့် ဆက်သွယ်အသုံးပြုနိုင်ရန် ၂၀၁၁ ခုနှစ်က သဘောတူ စာချုပ်ချုပ်ဆိုခဲ့ပြီး ခေါ်ဆိုခနှုန်းထားများကို သက်ဆိုင်ရာ တာဝန်ရှိသူများက ညှိနှိုင်းဆွေးနွေးလျက်ရှိကြောင်း၊ လက်ရှိအချိန်တွင် အာဆီယံဒေသတွင်းနိုင်ငံများနှင့် အာရှဒေသအချို့မှ မိုဘိုင်းဖုန်းများ မြန်မာနိုင်ငံအတွင်း အသုံးပြုလျက်ရှိပြီး မြန်မာနိုင်ငံမှ မိုဘိုင်းဖုန်း အသုံးပြုသူများ နေဖြင့် ပြည်ပနိုင်ငံများတွင် သယ်ယူအသုံးပြုနိုင်ရန် ဆွေးနွေးမှုများ ပြုလုပ်လျက်ရှိကြောင်း မြန်မာ့ဆက်သွယ်ရေးလုပ်ငန်းမှ တာဝန်ရှိသူတစ်ဦးက ပြောပြသည်။ “ကျွန်တော့်လုပ်ငန်းက မြန်မာ- စင်ကာပူ ဖက်စပ်ဆိုတော့ အမြဲတမ်း နိုင်ငံခြားကို သွားနေရတယ်။ အဲဒါကြောင့်ဖုန်းကို ဟိုနိုင်ငံရောက်ရင် နံပါတ်အသစ် ဝယ်ကိုင်ရတယ်။ အဲလိုဆိုတော့ အလုပ်ရှုပ်တယ်။ ငွေအပိုကုန်တယ်ပေါ့။ အခုလို အမြဲသုံးနေတဲ့ဖုန်းကို ယူသွားပြီး အသုံးပြုလို့ရတော့ ပိုအဆင်ပြေတာပေါ့” ဟု စီးပွားရေးလုပ်ငန်းရှင်တစ်ဦးက ပြောကြားခဲ့ကြောင်း ၂၀၁၂ ခုနှစ် ဇန်နဝါရီ ၂၄ရက်နေ့ထုတ် News Watch Weekly ဂျာနယ်တွင် ဖော်ပြထားပါသည်။

ခေတ်လူငယ်

Posted in: သတင်း