၂၀၁၂ တွင် အာဆီယံသတ်မှတ်အကောက်ခွန် ကုန်ပစ္စည်းများမှ ၈၀ ရာခိုင်နှုန်းကို အကောက်ခွန်သုညအထိ လျှော့ချပေးသွားမည်

အာဆီယံအဖွဲ့ဝင်ဖြစ်တဲ့ မြန်မာနိုင်ငံအနေနဲ့ လာမယ့် ၂၀၁၂ ခုနှစ်မှာ အာဆီယံသတ်မှတ်အကောက်ခွန် ကုန်ပစ္စည်းစာရင်းမှ ၈၀ ရာခိုင်နှုန်းကို အခွန်နှုန်း သုညရာခိုင်နှုန်းအထိ လျှော့ချပေးသွားမယ်လို့ အကောက်ခွန်ဦးစီးဌာနမှ သိရတယ်။ တာဝန်ရှိသူက “မူလအာဆီယံမှာ ခြောက်နိုင်ငံက ၂၀၁၀ ပြည့်နှစ်မှာ ကုန်အားလုံးကို အခွန်သုညရာခိုင်နှုန်းအထိ လျှော့လိုက်ပြီ၊ နောက်ဝင်တဲ့ လေးနိုင်ငံက နှစ်အလိုက် လျှော့ရမှာဖြစ်တယ်၊ ၂၀၀၈ ခုနှစ်မှာ ကုန်ပစ္စည်း ၆၀ ရာခိုင်နှုန်းအတွက် လျှော့ချခဲ့ပြီးပြီး၊ အခု ၂၀၁၂ ခုနှစ်မှာ ကုန်ပစ္စည်း ၈၀ ရာခိုင်နှုန်းအတွက် လျှော့ချပေးရမယ်၊ လာမယ့် ၂၀၁၅ ခုနှစ်မှာ ၉၃ ရာခိုင်နှုန်းအတွက် ၂၀၁၈ ခုနှစ်မှာ ၁၀၀ ရာခိုင်နှုန်းအထိ လျှော့ရတော့မယ်” လို့ ပြောပြတယ်။ မြန်မာနိုင်ငံအနေနဲ့လည်း အာဆီယံပေါင်းစည်းရေး ဦးစားပေးကဏ္ဍ ၁၁ ရပ်ထဲက သစ်အခြေခံကုန်ပစ္စည်း၊ ယာဉ်နဲ့သက်ဆိုင်တဲ့ ကုန်ပစ္စည်း၊ ရော်ဘာအခြေခံကုန်ပစ္စည်း၊ အထည်အလိပ်နဲ့ အဝတ်အထည်၊ စိုက်ပျိုးရေးအခြေခံပစ္စည်း၊ ရေထွက်ကုန်ပစ္စည်း၊ အီလက်ထရွန်းနစ်ပစ္စည်း၊ ကျန်းမာရေးစောင့်ရှောက်မှု ဆိုင်ရာပစ္စည်း၊ သတင်းနဲ့ ဆက်သွယ်ရေးဆိုင်ရာပစ္စည်း၊ လေကြောင်းခရီးသွားကဏ္ဍနဲ့ ကမ္ဘာလှည့်ခရီးသွားကဏ္ဍအလိုက် သတ်မှတ်ထားတဲ့ အခွန်လျှော့ချမှုတွေကို ပြုလုပ်နေကြောင်း ၂၀၁၁ ခုနှစ် ဒီဇင်ဘာ ၃၀ ရက်နေ့ထုတ် မော်ဒန် ဂျာနယ်တွင် ဖော်ပြထားပါသည်။

ခေတ်လူငယ်

Posted in: သတင်း