အင်ဒိုနီးရှားဆီးဂိမ်းပြိုင်ပွဲမှာ နိုင်ငံ့ဂုဏ်ဆောင်နိုင်ခဲ့တဲ့ မြန်မာ့လှေလှော်အဖွဲ့

အောင်စည်ဟိန်း
အတွဲ ၂၈ ၊ အမှတ် ၅၄၆ ( ၂ - ၈ ၊ ၁၂ ၊ ၂၀၁၁)

နိုင်ငံ့ဂုဏ်ဆောင် ရိုးရာလှေအဖွဲ့မှ အမျိုးသမီး အားကစားသမား များကို ဆုရယူအပြီးတွေ့ရစဉ်။
ဓာတ်ပုံ - မြန်မာနိုင်ငံလှေလှော်အဖွဲ့ချုပ်

အင်ဒိုနီးရှားနိုင်ငံ၌ ကျင်းပခဲ့သော(၂၆)ကြိမ်မြောက် ဆီးဂိမ်းပြိုင်ပွဲတွင် မြန်မာ လှေလှော်အဖွဲ့ သည် ရွှေတံဆိပ် (၁၀)ခု၊ ငွေတံဆိပ် ငါးခုနဲ့ ကြေး တံဆိပ် လေးခုဆွတ်ခူးပေးခဲ့ပြီး ယင်းပြိုင်ပွဲသို့ သွား ရောက်ယှဉ်ပြိုင် သည့် မြန်မာ့အားကစားတွေထဲတွင် အအောင်မြင်ဆုံး အားကစား အသင်းအဖြစ် မဏ္ဍိုင်စိုက်ထူနိုင်ခဲ့ပါတယ်။

ထို့ပြင် မြန်မာ လှေလှော်အဖွဲ့အနေဖြင့် လှေလှော်အားကစား နည်းမှ ဆုရရှိမှုဇယားတွင်လည်း ထိပ်ဆုံးမှ ရပ်တည်နိုင်ခဲ့ပါတယ်။

ရိုးရာနဂါး လှေလှော် အဖွဲ့မှ ရွှေကိုးခုနဲ့ အပြည်ပြည်ဆိုင်ရာ လှေလှော် အဖွဲ့မှ ရွှေတစ်ခု ရယူခဲ့တဲ့အပြင် ရိုးရာလှေလှော် အဖွဲ့မှ ငွေတစ်ခု၊ အပြည်ပြည်ဆိုင်ရာလှေမှ ငွေနှစ်ခု၊ ကြေးတစ်ခုနဲ့ ကနူးလှေက ငွေ နှစ်ခု၊ ကြေး သုံးခု ထပ်ဆောင်း၍ အရောင်စုံခဲ့ပါတယ်။

ယခင် ဆီးဂိမ်းပြိုင်ပွဲတွေမှာ အများဆုံး ရွှေခုနစ်ခုထိသာ ရခဲ့တဲ့အတွက် အဖွဲ့ချုပ်အနေနဲ့ ဒီတစ်ကြိမ် အအောင်မြင်ဆုံးဖြစ်သလို မြန်မာနိုင်ငံက ဒီနှစ် ဆီးဂိမ်းမှာ မြန်မာနိုင်ငံအနေနဲ့ ရွှေ ၁၆ခု ဆွတ်ခူး တဲ့ အနက်လှေလှော် အဖွဲ့က ရွှေ ၁၀ ခုရယူပေး နိုင်ခဲ့လို့ အားကစားတွေ အားလုံးမှာလဲ လှေလှော် က အအောင်မြင်ဆုံးဖြစ်ခဲ့ပါတယ်။

နည်းစနစ်၊ နည်းဗျူဟာပိုင်းမှာ ကောင်းမွန်မှုနဲ့ ကစားသမားတွေရဲ့လုံ့လ ၀ိရိယစိုတ်ထုတ်မှု ကြောင့် ပြိုင်ပွဲတွေမှာ လွတ်လွတ် ကျွတ်ကျွတ် အနိုင်ရခဲ့တာ လည်းဖြစ်ပါတယ်။

ဒါ့ပြင် အာရှ ပြိုင်ပွဲမှာ ရှုံးနိမ့်ခဲ့ပြီးနောက် အဆုံးသတ်ပိုင်းကို အဓိကထား လေ့ကျင့်ပြီး နှစ်ဆအားထုတ် ပြင်ဆင် ခဲ့ခြင်းလည်းဖြစ် ပါတယ်။

ဆီးဂိမ်းပြိုင်ပွဲကိုလည်း ရက်ကြိုသွားပြီး ပြိုင်မယ့်ရေလမ်းကြောင်းရဲ့ အတိမ်အနက်၊ ရေချိန်ကို နည်းပြကိုယ်တိုင် ရေထဲထိ လိုက်ဆင်းပြီး စူးစမ်းစမ်းသပ်တဲ့အထိ ဂရုတစိုက် ပြင်ဆင်ခဲ့ပါတယ်။

မြန်မာအမျိုးသမီးအသင်းမှာ အားကစားသမား တွေ ရှားပါးခဲ့တယ်။ "ဒီအားနည်းချက်ကိုသိလို့ အမျိုးသမီးအသင်းကို အပြင်းအထန် မောင်းခဲ့တယ်။ ဒါ့ကြောင့်လည်း အမျိုးသမီးလှေလှော် အသင်းက မျှော်လင့်မထားတဲ့အတိုင်းအတာထိ စွမ်းဆောင်နိုင်ခဲ့တာပေါ့" ရိုးရာနဂါးလှေအသင်း နည်းပြဦးဝင်းဖေက ပြောတယ်။

"အောင်မြင်မှုတွေနဲ့ နိုင်ငံကို ကျေးဇူးဆပ်လိုက် နိုင်တဲ့အတွက် အရမ်းပျော်ပါတယ်။ နောက်ထပ် လည်း ဒီထက်ပိုပြီး အောင်မြင်ဖို့ ကြိုးစားသွား မယ်လို့ ဆုံးဖြတ်ထားပါတယ်" မရွှေဇင်လတ်က ပြောကြားခဲ့ပါတယ်။

ပွဲစဉ်တွေ ပြီးသွားတဲ့အခါ မလေးရှား၊ ဖိလစ်ပိုင် နှင့် ထိုင်းအသင်းတို့က သူတို့အသင်းတွေကို ခြောက်လတန်သည်၊ တစ်နှစ်တန်သည် ကိုင်တွယ် ပေးဖို့ ရိုးရာနဂါးလှေနည်းပြ ဦးဝင်းဖေကို ကမ်းလှမ်းမှုတွေပြုလုပ်ခဲ့ပါတယ်။

သူတို့ကမ်းလှမ်း မှုကိုလက်မခံခဲ့ရင် မြန်မာပြည်မှာလာရောက် ပူးပေါင်းလေ့ကျင့်ဖို့အထိတင်ပြတောင်းဆိုလာပါတယ်။ "ဒီစံချိန်က ကျမသွားဖို့တော့ နည်းပြတွေရော၊ အားကစားသမားတွေရော၊ အုပ်ချုပ်သူတွေရော ဆက်ပြီး ကြိုးစားဖို့လိုပါတယ်။ ထိပ်ဆုံးရောက် သွားရင် ကျဖို့ပဲရှိတယ်။ ၁၀ ခု ရရင် ၁၁ ခု ရဖို့ မရှိတော့ဘူး။ ဒါ့ကြောင့် ကျမသွားအောင် ထိန်း ထားရမယ်။ ဖေဖော်ဝါရီလမှာ ယိုးဒယားနိုင်ငံ ပတ္တရားမှာ အာရှနဂါးလှေ ဖိတ်ခေါ်ပြိုင်ပွဲရှိတယ်။ သွားမယ်။ အနည်းဆုံး ပွဲတွေရှိနေရင် Training မပြတ်ဘူးလေ"ဟု အတွင်းရေးမှူး ဦးဖေ၀င်းက ပြောကြားသွားပါတယ်။

http://groups.google.com/group/mayanmardailymail မှ ကူးယူဖော်ပြပါကြောင်း

Myanmar Express

Posted in: ကူးယူဖော်ပြ,သတင်း